నవతెలంగాణ-హైద‌రాబాద్‌: బృహన్‌ ముంబై మున్సిపల్‌ కార్పొరేషన్‌ (బిఎంసి) ఎన్నికల కోసం శుక్రవారం విడుదల చేసిన ముసాయిదా ఓటర్ల జాబితాలో 11 లక్షల మంది నకిలీ ఓటర్లు ఉన్నారని ముంబై కాంగ్రెస్‌ ఆరోపించింది. ముంబై కాంగ్రెస్‌ అధ్యక్షురాలు వర్ష గైక్వాడ్‌ నేతృత్వంలోని కాంగ్రెస్‌ పార్టీ ప్రతినిధి బృందం రాష్ట్ర ఎన్నికల కమిషనర్‌ను కలిసి.. ఈ చర్యలపై తక్షణమే వివరణ ఇవ్వాలని కోరింది. జిల్లా కలెక్టర్లు, పౌర డిప్యూటీ కమిషనర్లు కూడా నకిలీ పేర్లను గానీ, వాటిని పరిష్కరించే విధానాన్ని వివరించలేకపోయారని గైక్వాడ్‌ పేర్కొన్నారు.
కాగా, ఈ విషయంపై గైక్వాడ్‌ మాట్లాడుతూ.. ‘నకిలీ ఓటర్ల నుండి అఫిడవిట్లు అవసరం కావచ్చు అని అధికారులు చెబుతున్నారు. ఇది మరింత గందరగోళాన్ని సృష్టిస్తుంది. ఓటర్ల సంఖ్యను తగ్గిస్తుంది. ఈ విషయంపై అధికారులు పౌరులను అనవసర వేధింపులకు గురి చేస్తున్నారు. రాష్ట్ర ఎన్నికల సంఘానికి, బృహాన్‌ ముంబయి కార్పొరేషన్‌ పరిపాలన మధ్య సరైన సమన్వయం లేకుండానే తాజా ముసాయిదా ఓటర్ల జాబితా విడుదలయింది. తొమ్మిది సంవత్సరాలుగా వార్డులోని ఓటర్ల జాబితా తాజాపరచలేదు. అక్టోబర్‌ 2024 నుండి ఓటర్ల జాబితా ప్రచురించలేదు. ఇప్పుడు, ధారవి, అంధేరి, కండివాలి వంటి ప్రాంతాలలో ఏడు వేల నుండి 9 వేల మంది పేర్లు ఒక వార్డు నుండి మరొక వార్డుకు మార్చారు. దీనిపై రాష్ట్ర ఎన్నికల సంఘం లేదా పౌర సంస్థ కూడా స్పష్టం చేయలేదు. రాష్ట్ర ఎన్నికల సంఘం నకిలీ ఓటర్ల జాబితాను ప్రచురించాలి.
ప్రతి నకిలీ ఓటరుకు సంబంధించి ఎంట్రీ ఎక్కడ జరిగిందనే వంటి విషయాలను బహిర్గతం చేయాలి. ఎన్నికల కమిషన్‌ బిఎంసికి కొన్ని ఆదేశాలు జారీ చేసింది. వీటిని ఆలస్యం చేయకుండా అమలు చేయలని వర్ష గైక్వాడ్‌ డిమాండ్‌ చేశారు. దీనిపై మరోసారి చర్చించడానికి శనివారం కాంగ్రెస్‌ ప్రతినిధి బృందం ముంబై కాంగ్రెస్‌ కార్యాలయంలో సమావేశం కానుంది.
