నవతెలంగాణ-హైద‌రాబాద్‌: కోల్‌కతాలో జరిగిన తొలి టెస్టులో టీమిండియా నిరాశ ఎదుర్కొంది. దక్షిణాఫ్రికాతో జరిగిన ఈ మ్యాచ్‌లో భారత్ 30 పరుగుల తేడాతో ఓడిపోయింది. 124 పరుగుల చిన్న లక్ష్యాన్ని చేధించే క్రమంలో భారత బ్యాటింగ్‌ పూర్తిగా విఫలమై కేవలం 93 పరుగులకే ఆలౌట్‌ అయ్యింది. ఈ విజయంతో దక్షిణాఫ్రికా రెండు టెస్టుల సిరీస్‌లో 1-0 ఆధిక్యంలోకి చేరింది. హార్మర్‌, మార్కో జాన్సెన్‌ అద్భుతమైన బౌలింగ్‌ ఈ విజయానికి కారణమయ్యాయి.
మ్యాచ్‌ ప్రవేశం ….
ఈడెన్‌ గార్డెన్స్‌లో శుక్రవారం ప్రారంభమైన టెస్టులో టాస్‌ గెలిచిన దక్షిణాఫ్రికా బ్యాటింగ్‌ను ఎంచుకుంది. భారత బౌలర్లు కట్టుదిట్టంగా బౌలింగ్‌ చేయడంతో ప్రోటియర్స్‌ తొలి ఇన్నింగ్స్‌ 159 పరుగులకే ముగిసింది. బుమ్రా ఐదు వికెట్లతో మెరిశాడు. సిరాజ్‌, కుల్దీప్‌ చెరో రెండు వికెట్లు, అక్షర్‌ ఒక వికెట్‌ తీశారు. తదుపరి భారత తొలి ఇన్నింగ్స్‌లో బ్యాట్స్‌మెన్‌ పెద్దగా రాణించలేక 189 పరుగులకే నిలిచారు. దాంతో భారత్‌కు 30 పరుగుల స్వల్ప ఆధిక్యం లభించింది. హార్మర్‌, జాన్సెన్‌ భారత బ్యాటింగ్‌ను కట్టడి చేయడంలో కీలక పాత్ర పోషించారు.
రెండో ఇన్నింగ్స్‌ – మ్యాచ్‌ మలుపు
రెండో ఇన్నింగ్స్‌లో దక్షిణాఫ్రికా 153 పరుగులు మాత్రమే చేసింది. భారత్‌కు 124 పరుగుల లక్ష్యం నిర్దేశించబడింది. అయితే ఈ లక్ష్యాన్ని భారత్ సాధించలేకపోయింది. జైస్వాల్‌ ఖాతా తెరవకుండానే అవుట్‌ కాగా, కేఎల్‌ రాహుల్‌ కేవలం 1 పరుగునే చేశారు. 38 పరుగుల వద్దే నాలుగు కీలక వికెట్లు కోల్పోవడంతో భారత్ ఒత్తిడికి లోనైంది. వాషింగ్టన్‌ సుందర్‌ (31) కొంత ప్రతిఘటన చూపినా, ఇతర బ్యాట్స్‌మెన్‌ విఫలమయ్యారు. అక్షర్‌ పటేల్‌ చివర్లో భారీ షాట్లతో మ్యాచ్‌ను భారత్ వైపు తిప్పే ప్రయత్నం చేసినా, అతను అవుట్‌ కావడంతో ఓటమి ఖరారైంది.
బౌలింగ్‌ విజయవంతం – దక్షిణాఫ్రికా ఆధిపత్యం
హార్మర్‌ నాలుగు వికెట్లు, జాన్సెన్‌, మహరాజ్‌లు చెరో రెండు వికెట్లు తీసి భారత బ్యాటింగ్‌ను కూలదోశారు. మార్కరమ్‌ ఒక వికెట్‌ తీశాడు.
కెప్టెన్‌ గాయం …
భారత కెప్టెన్‌ రెండో ఇన్నింగ్స్‌లో బ్యాటింగ్‌కు రాలేదు. గాయం కారణంగా రిటైర్డ్‌ హర్ట్‌గా మైదానాన్ని వీడిన గిల్‌ ప్రస్తుతం ఆసుపత్రిలో చికిత్స పొందుతున్నట్టు బీసీసీఐ తెలిపింది. ఆయన ఆరోగ్య పరిస్థితిని వైద్యులు పర్యవేక్షిస్తున్నారు. ఈ విధంగా దాదాపు 15 సంవత్సరాల తర్వాత స్వదేశంలో దక్షిణాఫ్రికా చేతిలో భారత్ ఓటమి చవిచూసింది.
