3డీలోనూ ‘అఖండ 2’

బాలకృష్ణ, దర్శకుడు బోయపాటి శ్రీను కలయికలో వస్తున్న చిత్రం ‘అఖండ 2: తాండవం’. రామ్‌ ఆచంట, గోపీచంద్‌ ఆచంట నిర్మిస్తున్నారు. ఎం తేజస్విని నందమూరి సమర్పిస్తున్నారు.
ఈ చిత్రం డిసెంబర్‌ 5న విడుదల కానుంది. ఆదివారం మేకర్స్‌ బిగ్‌ అప్‌డేట్‌ ఇచ్చారు. ఈ చిత్రాన్ని 3డీలోనూ రిలీజ్‌ చేయనున్నట్టు అనౌన్స్‌ చేశారు. డైరెక్టర్‌ బోయపాటి శ్రీను మాట్లాడుతూ, ‘బాలకృష్ణ అభిమానులు, ప్రేక్షకులకు గొప్ప అనుభూతి ఇవ్వాలన్న ఉద్దేశంతోనే సినిమాని 3డీ ఫార్మాట్‌లోనూ తీసుకొస్తున్నాం. త్రీడీలో ఈ సినిమా చూసిన తర్వాత చాలా అద్భుతంగా ఫీల్‌ అవుతారు. ఈ చిత్రం.. భారతదేశ ఆత్మ, పరమాత్మ. ఈ సినిమా మన దేశ ధర్మం, ధైర్యం. ప్రపంచ దేశాల్లో మతం కనిపిస్తుంది. కానీ, మన దేశంలో మాత్రమే సనాతన ధర్మం కనిపిస్తుంది. దాని ఆధారంగా రూపొందిస్తున్న చిత్రమిది. మీ ఇంట్లో ఉండే చిన్నపిల్లల నుంచి అమ్మానాన్నల వరకు థియేటర్స్‌లో అద్భుతంగా చూస్తారు. అది నా బాధ్యత. నేను మీకు ఇస్తున్న హామీ. ఈ సినిమాని దేశమంతా చూడాలనుకుంటున్నాం. అందుకే ప్రచారాన్ని ముంబయి నుంచి ప్రారంభించాం. భగవద్గీత, రామాయణం, భారతం. ఇవి మన దేశం ఆత్మ. ఈ మూండిటికి ఉన్న ఆత్మే ‘అఖండ2′. అందుకే ఈ సినిమా ఈ దేశ ఆత్మ, పరమాత్మ అని చెబుతున్నాను’ అని తెలిపారు.

‘ఈ కథ, కాన్వాస్‌, లొకేషన్స్‌ని త్రీడీలో చేస్తే బాగుంటుందని అనుకున్నాం. అలాగే మాకు సమయం కూడా దొరికింది. 3డీ అద్భుతంగా వచ్చింది. విజువల్‌గా మీకు అద్భుతమైన ఎక్స్పీరియన్స్‌ ఉంటుంది. ఇది మా ప్రామీస్‌. ఇక ఇందులో బాలయ్యబాబు నట విశ్వరూపాన్ని మరోమారు చూడబోతున్నారు. ఇది కచ్చితంగా అందర్నీ ముఖ్యంగా బాలయ్య అభిమానులకు విపరీతంగా అలరిస్తుంది’ అని నిర్మాత గోపి ఆచంట చెప్పారు. ఈ చిత్రం 2డి, 3డి రెండు ఫార్మాట్లలో డిసెంబర్‌ 5న ప్రపంచవ్యాప్తంగా గ్రాండ్‌గా విడుదల కానుంది. రచ్చ రవి, డిఓపి సంతోష్‌, రేస్‌ త్రీడీ రాజు, ఎడిటర్‌ తమ్మి రాజు తదితరులు ఈ వేడుకలో పాల్గొని చిత్ర విజయాన్ని ఆకాంక్షించారు. సంయుక్త, ఆది పినిశెట్టి, హర్షాలి మల్హోత్రా తదితరులు ముఖ్య పాత్రలు పోషిస్తున్న ఈ చిత్రానికి రచన, దర్శకత్వం: బోయపాటి శ్రీను, నిర్మాతలు: రామ్‌ ఆచంట, గోపి ఆచంట, సమర్పణ: ఎం తేజస్విని నందమూరి, సంగీతం: థమన్‌ ఎస్‌, సినిమాటోగ్రఫీ : రాంప్రసాద్‌, సంతోష్‌, ఎగ్జిక్యూటివ్‌ ప్రొడ్యూసర్‌: కోటి పరుచూరి, ఆర్ట్‌: ఏఎస్‌ ప్రకాష్‌, ఎడిటర్‌: తమ్మిరాజు, ఫైట్స్‌: రామ్‌-లక్ష్మణ్‌.