సీఎం, పీసీసీ చీఫ్‌ నిరంతర పర్యవేక్షణ
జిల్లాల్లో ఇన్‌ఛార్జి మంత్రులకే బాధ్యతలు
నూతన డీసీసీ అధ్యక్షుల సామర్థ్యానికి పరీక్ష
2న టీపీసీసీ కార్యవర్గంలో దిశా నిర్దేశం
నవతెలంగాణ బ్యూరో – హైదరాబాద్‌
‘పార్టీలోనైనా, ప్రభుత్వంలోనైనా పని చేసే వారికే పదవులు…’ ఏఐసీసీ రాష్ట్ర వ్యవహారాల ఇన్‌ఛార్జి మీనాక్షి నటరాజన్‌ తెలంగాణ కాంగ్రెస్‌ నేతలకు చెప్పిన మాట ఇది. ఇప్పుడు ఈ మాటను నిజం చేసి చూపాల్సి వస్తోందంటున్నారు హస్తం పార్టీ లీడర్లు. పంచాయతీ ఎన్నికల వేళ… సీఎం, పీసీసీ చీఫ్‌ మొదలుకుని గ్రామ స్థాయి కార్యకర్త వరకూ అందరూ పని చేయాల్సిందేనంటూ పార్టీ హైకమాండ్‌ ఆదేశించింది. దీంతో రాష్ట్ర కాంగ్రెస్‌ నేతలు క్షేత్రస్థాయికి దిగుతున్నారు. ఇందులో భాగంగా మూడంచెల వ్యవస్థతో ‘త్రిముఖ’ వ్యూహానికి రూపకల్పన చేశారు. ముఖ్యమంత్రి రేవంత్‌ రెడ్డి, పీసీసీ అధ్యక్షుడు మహేశ్‌ కుమార్‌ గౌడ్‌ పై స్థాయిలో, ఆ తర్వాత జిల్లాల ఇన్‌ఛార్జి మంత్రులు రెండో స్థాయిలో, డీసీసీ అధ్యక్షులు మూడో స్థాయిలో.. పంచాయతీ ఎన్నికలు అయిపోయేంత వరకు నిరంతరం కార్యకర్తలతో మమేకం కావాలని ఏఐసీసీ సూచించింది.
ఈ నేపథ్యంలో మొత్తం మూడు దశల్లో ఎన్నికలు అయిపోయేదాకా సీఎం రేవంత్‌ రెడ్డి, పీసీసీ చీఫ్‌ మహేశ్‌ కుమార్‌… ఇన్‌ఛార్జి మంత్రులను, డీసీసీ అధ్యక్షులను నిరంతరం పర్యవేక్షించాలి. జిల్లాల్లోని ప్రధాన నేతలతో ప్రతీరోజూ సమావేశాలు, జూమ్‌ మీటింగులు నిర్వహించటం ద్వారా వారికి ఎప్పటికప్పుడు దిశా నిర్దేశం చేయాలి. అక్కడ ఉత్పన్నమయ్యే సంస్థాగత, నిర్మాణ సమస్యలను సీఎం, పీసీసీ చీఫ్‌ వెంటవెంటనే పరిష్కరించాలి. మరోవైపు జిల్లాల్లో ఏకగ్రీవాలు, స్నేహ పూర్వక పోటీలు, ఓట్లు చీలి పోకుండా చూడటం, తద్వారా అత్యధిక పంచాయ తీలను కైవసం చేసుకోవటం… తదితరాంశాలకు ఇన్‌ఛార్జి మంత్రులే బాధ్యత వహించాల్సి ఉంటుంది. ఇక నూతన డీసీసీ అధ్యక్షులకు పంచాయతీ ఎన్నికల రూపంలో ఆదిలోనే అసలు సిసలు పరీక్ష ఎదురు కాబోతోంది. ఒకవైపు బీసీ రిజర్వేషన్ల అంశం, మరోవైపు ఆరు గ్యారెంటీల అమల్లో వైఫల్యాలు, గ్రామ స్థాయిలో వర్గపోరు… ఇలాంటి సమస్యలన్నింటినీ వారు రోజుల వ్యవధిలోనే చక్కదిద్దాల్సి ఉంటుంది.
ఎమ్మెల్యేలు, ఎంపీలు, ఇతర ప్రజా ప్రతినిధుల నుంచి వచ్చే ఒత్తిడిని తట్టుకుని… జిల్లాల్లో పార్టీని ఏకతాటిపై నడపాలి. డీసీసీ పీఠమెక్కిన రోజుల వ్యవధిలోనే వారు ఎంతో సహనంతో, సమన్వ యంతో వ్యవహ రించాల్సి రావటం ఒకరకంగా వారి సామర్థ్యాలకు పరీక్ష లాంటిదేనని గాంధీ భవన్‌ వర్గాలు అభిప్రాయపడుతున్నాయి. పంచాయతీ ఎన్నికలకు సంబంధించి అత్యధిక స్థానాల్లో పార్టీని గెలిపిస్తే వారి ‘భవిష్యత్తు’కు ఢోకా ఉండబోదని ఆయా వర్గాలు పేర్కొన్నాయి. పదేండ్ల పాటు అధికారానికి దూరంగా ఉన్న అధికార పార్టీ పల్లెల్లో తిరిగి తన పూర్వ వైభవాన్ని సాధించేందుకు ఇలా త్రిముఖ వ్యూహాన్ని రచించింది. బీసీ రిజర్వేషన్ల అంశం తమ పార్టీకి అనుకూలమే తప్ప ప్రతికూలం కాదని కాంగ్రెస్‌ చెందిన ఓ యువ నేత వ్యాఖ్యానించారు.
మహిళలకు ఉచిత బస్సు ప్రయాణం, సన్న బియ్యం, రైతు భరోసా, ఇందిరమ్మ ఇండ్లు, ఇందిరమ్మ చీరెలు, గృహాలకు ఉచిత విద్యుత్‌ తదితర పథకాల లబ్దిదారులందరూ హస్తం పార్టీ వెంటే ఉన్నారని ఆయన ధీమా వ్యక్తం చేశారు. కాగా పీసీసీ చీఫ్‌ మహేశ్‌ కుమార్‌ శుక్రవారం సీఎం రేవంత్‌ రెడ్డితో ప్రత్యేకంగా భేటీ అయ్యారు. దాదాపు గంటసేపు కొనసాగిన ఈ సమావేశంలో పంచాయతీ ఎన్నికల్లో అనుసరించాల్సి వ్యూహం, ప్రజా పాలన విజయోత్సవాల ఏర్పాట్లు తదితరాం శాలపై వారిరువురూ చర్చించారు. డిసెంబరు 2న టీపీసీసీ కార్యవర్గాన్ని సమా వేశపరిచి నూతన డీసీసీ అధ్యక్షులకు దిశా నిర్దేశం చేయాలని వారు నిర్ణయించారు. మహేశ్‌ కుమార్‌ అధ్యక్షతన నిర్వహించబోయే ఈ సమావేశానికి సీఎం రేవంత్‌ రెడ్డి, రాష్ట్ర కాంగ్రెస్‌ వ్యవహారాల ఇన్‌ఛార్జి మీనాక్షి నటరాజన్‌తోపాటు ఏఐసీసీ కార్యదర్శులు హాజరవుతారు.
