రెండేండ్లలో కార్మికులకు ప్రభుత్వం చేసిందేమిటి?

కార్మిక వ్యతిరేక విధానాలను తిప్పికొట్టాలి : సీఐటీయూ రాష్ట్ర ప్రధాన కార్యదర్శి పాలడుగు భాస్కర్‌
మరిపెడలో మహబూబాబాద్‌ జిల్లా సీఐటీయూ మహాసభలు ప్రారంభం

నవతెలంగాణ – మరిపెడ
కేంద్ర, రాష్ట్ర ప్రభుత్వాలు అనుసరిస్తున్న కార్మిక వ్యతిరేక విధానాలను తిప్పికొడుతూ కార్మికులు ఐక్యంగా ఉద్యమించాలని సీఐటీయూ రాష్ట్ర ప్రధాన కార్యదర్శి పాలడుగు భాస్కర్‌ పిలుపునిచ్చారు. ఈ రెండేండ్ల కాలంలో కాంగ్రెస్‌ ప్రభుత్వం కార్మికులకు చేసిందేమిటని ప్రశ్నించారు. శుక్రవారం మహబూబాబాద్‌ జిల్లా మరిపెడలోని కనకదుర్గ ఫంక్షన్‌ హాల్‌ (ఎస్‌కే జానీమియా ప్రాంగణం, బీరవెల్లి ప్రేమలత నగర్‌)లో సీఐటీయూ 4వ జిల్లా మహాసభలు ఘనంగా ప్రారంభమయ్యాయి. ముందుగా రాష్ట్ర కార్యదర్శి వంగూరు రాములు సంఘం జెండావిష్కరణ చేశారు. అనంతరం జరిగిన సభలో పాలడుగు మాట్లాడుతూ.. కేంద్ర ప్రభుత్వం కనీస వేతన చట్టాన్ని అమలు చేయకుండా కార్మిక చట్టాలను సవరణలు చేసి పని గంటలు పెంచిందని అన్నారు. కోట్లాది కార్మికుల కష్టాల సొమ్మును కార్పొరేట్‌ సంస్థలకు అప్పనంగా అప్పజెప్తున్నారని విమర్శించారు.

అంగన్‌వాడీ కేంద్రాల ను నిర్వీర్యం చేసే కుట్రలు చేస్తున్నారని అన్నారు. అంగన్‌వాడీలు, మధ్యాహ్న భోజనం కార్మికులు, ఆశా వర్కర్లు, భవన నిర్మాణ కార్మికులు, మున్సిపాలిటీ, గ్రామపంచాయతీ కార్మికులు చాలీచాలని జీతాలతో జీవిస్తున్నారని తెలిపారు. పెరుగుతున్న ధరలకు, ఇస్తున్న జీతాలకు పొంతన లేదని అన్నారు. కార్మికుల సమస్యలు పరిష్కారం అయ్యే వరకు సీఐటీయూ పోరాడుతుందని, కార్మికులపై నిర్బంధాలు ఉన్నప్పటికీ, కార్మిక శ్రేయస్సు కోసం ఐక్య ఉద్యమాలు నిర్వహిస్తున్నట్టు గుర్తు చేశారు. మహబూబాబాద్‌ జిల్లాలో కార్మిక, కర్షక పోరాటాలకు ప్రజలు పెద్ద ఎత్తున ఉద్యమంలోకి రావాలని పిలుపునిచ్చారు. నూతనంగా ఏర్పడే జిల్లా కమిటీ క్రియాశీలక పోరాటాల్లో ఉండే విధంగా చూడాలని సూచిం చారు. ఈ కార్యక్రమంలో సీఐటీయూ రాష్ట్ర కార్యదర్శులు ఎస్వీ రమ, కాసు మాధవి, మున్సిపల్‌, గ్రామపంచాయతీ ఎంప్లాయీస్‌ వర్కర్స్‌ యూనియన్‌ రాష్ట్ర ప్రధాన కార్యదర్శి పాలడుగు సుధాకర్‌, జిల్లా అధ్యక్ష కార్యదర్శులు ఆకుల రాజు, కుంట ఉపేందర్‌, జిల్లా నాయకులు తదితరులు పాల్గొన్నారు.