ప్రజలకు అందుబాటులో ఉండే నాయకులను గెలిపించండి

– స్థానిక సంస్థల ఎన్నికల్లో సత్తా చాటాలి
– ముఖ్య కార్యకర్తల సమావేశంలో జూలకంటి
నవతెలంగాణ-మిర్యాలగూడ : జరగబోయే గ్రామపంచాయతీ ఎన్నికల్లో ప్రజలకు అందుబాటులో ఉండే నాయకులను గెలిపించాలని సీపీఐ(ఎం) రాష్ట్ర కార్యదర్శి వర్గ సభ్యులు మాజీ ఎమ్మెల్యే జూలకంటి రంగారెడ్డి అన్నారు. శనివారం స్థానిక సీపీఐ(ఎం) కార్యాలయంలో మిర్యాలగూడ నియోజకవర్గ స్థాయి సమావేశం నిర్వహించారు. ఈ సందర్భంగా ఆయన మాట్లాడుతూ నిత్యం ప్రజా సమస్యల పరిష్కారం కోసం సీపీఐ(ఎం) నాయకులు, కార్యకర్తలు ఉద్యమాలు చేస్తున్నారని, ప్రజల సంక్షేమ కోసం ఎర్రజెండా పని చేస్తుందని చెప్పారు. గ్రామ స్థాయిలో జరిగే ఎన్నికలో అభ్యర్ధి గుణ గుణాలు చూడాలన్నారు. నీతి నిజాయితీతో ఉండే నాయకులను గెలిపిస్తే గ్రామాల అభివృద్ధి జరుగుతుందన్నారు. నిరంతరం అందుబాటులో ఉండే నాయకులను గేలిపించాలని, అలాంటి వారు కేవలం ఎర్రజెండా పార్టీలోనే ఉంటారన్నారు  కార్యకర్తలు కస్టపడి పనిచేసి సీపీఐ(ఎం) అభ్యర్థులను గెలిపించాలని కోరారు. వేలం పాటలో సర్పంచుల పదవులు పొందాలని చూస్తున్నారని అలా చేస్తే గ్రామాల అభివృద్ధి కుంటూపడుతుందన్నారు. బలం ఉన్నచోట సీపీఐ(ఎం) పార్టీ పోటీ చేస్తుందన్నారు. కలిసొచ్చే పార్టీలతో కలిసి పోటీ చేస్తామన్నారు. ఈ కార్యక్రమంలో సీపీఐ(ఎం) రాష్ట్ర కమిటీ సభ్యులు డబ్బికార్ మల్లేష్, జిల్లా కార్యదర్శి వర్గ సభ్యులు వీరేపల్లి వెంకటేశ్వర్లు జిల్లా కమిటీ సభ్యులు పాదూరి శశిధర్ రెడ్డి, రవి నాయక్, పరుశురాములు, రాగిరెడ్డి మంగారెడ్డి, వినోద్ నాయక్, రొండి శ్రీనివాస్, అయూబ్, తిరుపతి రామ్మూర్తి, కే రమేష్, చౌగాని వెంకన్న, పాల్వాయి రాంరెడ్డి, గోవింద్ రెడ్డి, కూన్ రెడ్డి వెంకట్ రెడ్డి, నంద్యాల వేణుధర్రెడ్డి సుకన్య, నాగమణి తదితరులు పాల్గొన్నారు.