– ఒకే రోజు పదకొండు కాన్పులు చేసిన వైద్యులు
– ఏరియా ఆసుపత్రిలో మెరుగైన వైద్యసేవలు
– సత్ఫలితాలు ఇస్తున్న ఎమ్మెల్యే జారె కృషి
నవతెలంగాణ – అశ్వారావుపేట
స్థానిక ఏరియా ఆసుపత్రిలో రోజు రోజు కి వైద్య సేవలు మెరుగుపడుతున్నాయి.ఆసుపత్రి సూపరింటెండెంట్ డాక్టర్ రాధ రుక్మిణి,ప్రసూతి వైద్యురాలు డాక్టర్ మౌనిక ఆధ్వర్యంలో శనివారం ఒకే రోజు పదకొండు మందికి పురుడు పోశారు.ఇందులో ఎనిమిది సాధారణ కాన్పులు కాగా,మరో మూడు శస్త్రచికిత్స ద్వారా పదకొండు మందికి కాన్పులు చేసారు.రోగులు ప్రభుత్వ ఆసుపత్రి ల మీద నమ్మకానికి ఈ సంఘటన నిదర్శనం గా చెప్పొచ్చు.ఖర్చు తో కూడుకున్న వైద్యాన్ని ప్రభుత్వ ఆసుపత్రి లో ఉచితం గా అందిస్తున్నారు.ప్రజారోగ్యం పై ఎమ్మెల్యే జారె ఆదినారాయణ పెట్టిన ప్రత్యేక శ్రద్ధ,ప్రభుత్వ ఆసుపత్రుల్లో సౌకర్యాలు కల్పించాలనే కలెక్టర్ జితేష్ వి.పాటిల్ దృక్పధం,పేదలకు మెరుగైన సేవలు అందించాలనే డీసీహెచ్ఎస్ డాక్టర్ రవిబాబు కృషి ఫలితంగా అశ్వారావుపేట ఏరియా ఆసుపత్రిలో పిండం ఆరోగ్యం,ఎదుగుదల చూపే టిఫా స్కాన్ వంటి అత్యాధునిక యంత్రాలు,ఇతర సదుపాయాలు అందుబాటులోకి రావడంతో రోగుల తాకిడి పెరిగింది.
ఇటీవల అశ్వారావుపేట లో స్థానిక ఎమ్మెల్యే,జిల్లా కలెక్టర్ సూచన మేరకు ఒక పిల్లల వైద్యుడు, అదనంగా మరో ప్రసూతి వైద్యురాలు,మత్తు వైద్యుడిని డీసీహెచ్ఎస్ డాక్టర్ రవి బాబు నియమించారు. నాటినుండి ప్రసూతి వైద్యులు ఇరవై నాలుగు గంటలు అందుబాటులో ఉండడం తో ప్రసూతి సేవలు మెరుగుపడి నెలకి పది నుండి యాభై పైగా ప్రసవాల సంఖ్య పెరిగింది. ఆసుపత్రి సేవల పట్ల అశ్వారావుపేట పరిసర ప్రాంత ప్రజలు హర్షం వ్యక్తంచేస్తున్నారు.ఈ కార్యక్రమం లో ప్రసూతి వైద్యురాలు డాక్టర్ మౌనిక,పిల్లల వైద్యనిపుణులు డాక్టర్ ప్రకాష్,అనెస్థటిస్ట్ డాక్టర్ కృష్ణ ప్రసాద్,ఆసుపత్రి హెడ్ నర్సింగ్ ఆఫీసర్ మంగతాయమ్మ,నర్సింగ్ ఆఫీసర్ లు సుజాత, వీరా కుమారి ఆసుపత్రి సిబ్బంది పాల్గొన్నారు
