• మండలంలో 9 పోలింగ్ కేంద్రాల ఏర్పాటు
• ఎన్నికలకు సర్వం సిద్ధం: ఎంపీడీవో వేణుమాధవ్
నవతెలంగాణ -పెద్దవంగర
గ్రామ పంచాయతీ ఎన్నికలకు అన్ని ఏర్పాట్లు పూర్తి చేసినట్లు ఎంపీడీవో వేణుమాధవ్ తెలిపారు. శనివారం ఎంపీడీవో కార్యాలయంలో ఆయన వివరాలను వెల్లడించారు. రెండో విడత ఎన్నికల్లో భాగంగా మండలంలో నామినేషన్ ప్రక్రియ రేపటి నుంచి స్వీకరిస్తామని తెలిపారు. మండల వ్యాప్తంగా 26 సర్పంచ్, 192 వార్డు స్థానాలకు ఏర్పాట్లు పూర్తి చేశామని చెప్పారు. మండలంలో డిసెంబర్ 2 వరకు నామినేషన్లను స్వీకరిస్తామని., డిసెంబర్ 6 వరకు నామినేషన్ల ఉపసంహరణ, డిసెంబర్ 14 న ఉదయం 7 గంటల నుండి, మధ్యాహ్నం 1 గంట వరకు ఎన్నికలు జరుగుతున్నాయని, అదే రోజు మధ్యాహ్నం నుంచి ఓట్ల లెక్కింపు ప్రక్రియ పూర్తి చేసి, ఎన్నికల ఫలితాలను వెల్లడిస్తామని తెలిపారు.
ఎన్నికల కోసం రెండు, మూడు, నాలుగు గ్రామ పంచాయతీలను కలిపి ఒక క్లస్టర్ ( పోలింగ్ కేంద్రం) చొప్పున పెద్దవంగర, చిన్నవంగర, చిట్యాల, బొమ్మకల్, వడ్డెకొత్తపల్లి, కొరిపల్లి, గంట్లకుంట, పోచంపల్లి, అవుతాపురం గ్రామ పంచాయతీ కేంద్రాల్లో మొత్తం 9 క్లస్టర్లు, ప్రతి క్లస్టర్ కు ఒక ఆర్ఓ ను ఏర్పాటు చేశారు. ఆయా క్లస్టర్ కేంద్రాల్లోనే ఉదయం 10:30 నుంచి సాయంత్రం 5 గంటల వరకు సర్పంచ్, వార్డు స్థానాల అభ్యర్థుల నుంచి నామినేషన్లు స్వీకరిస్తామని తెలిపారు. ఇందుకోసం పకడ్బందీ ఏర్పాట్లు చేశామని, ఇప్పటికే ఎన్నికల సామాగ్రిని నామినేషన్ కేంద్రాలకు తరలించినట్లు ఎంపీడీవో పేర్కొన్నారు. నామినేషన్ కేంద్రాల వద్ద 144 సెక్షన్ అమలులో ఉందని, అభ్యర్థులు ఎన్నికల నిబంధనలు తప్పనిసరిగా పాటించాలని ఎస్సై చిలువేరు ప్రమోద్ కుమార్ గౌడ్ కోరారు.
