ఎండమావులు

ఊరట మాటలు ఎక్కువయి
మూటల ఊటలు లేక జీవితం బీటలు తీసినప్పుడు
‘వెయ్యి’ ముద్రతో జరాయువు
వృద్ధాశ్రమంలో ఎండమావుల్ని లెక్కిస్తాడు!
చెయ్యని పాపానికి
శిలువ వేయబడ్డ వయసు
తమస్సులో మునిగిపోతుంది
‘వెయ్యి’నే పదిసార్లు లెక్కపెడతాడు
పదివేలని భ్రాంతి చెందుతాడు!
‘విజను’, ‘రివిజను’, ‘రైజింగు’
ఏవో నీరు లేని మేఘాలై
ఆశలు చూపుతుంటాయి!
‘వెయ్యికి’ ఏవో జోడించాలి
‘జీవో’ మాత్రం ప్రవేశించదు!
ఇన్నాళ్ల చాకిరీ తర్వాత
చెరకుపిప్పికి ఏం మిగులుతుంది?
గద్దెనెక్కిన వాళ్లు
సొంత లాభం కొంత చూసుకున్న తర్వాతే
వాలిపోతున్న పొద్దుని పలకరిస్తారు!
‘వెయ్యి’ జీవులని వైతరణి తీరానికి సాగనంపాక
వికసిత భారతం శ్రావ్యంగా మైకుల్లో వినబడుతుంది!
అచ్చేదిన్‌ చప్పట్లతో
హస్తిన దద్దరిల్లిపోతుంది!

• వీరేశ్వరరావు మూల