నలుపు తెలుపు అంటే ఏమిటి అనడిగితే సమాధానాలేమొస్తాయి అని సందేహం కలిగి ఎవరినైనా అడిగితే సమాధానం ఏమొస్తుందని ఒక వ్యక్తి ప్రయత్నం చేశారట. యాభై దాటినోళ్లని అడిగితే నలుపు తెలుపు సినిమాలుండేవి అన్నారట. ముప్ఫై దాటినోళ్లని అడిగితే వెలుతురు చీకటి అన్నారట. సరే విద్యార్థులను అడుగుదామని ప్రయత్నిస్తే బోత్‌ ఆర్‌ డిఫరెంట్‌ కలర్స్‌ అంటే రెండూ రెండు రంగులన్నారట. ఇక శాస్త్రజ్ఞుల్ని అడిగితే ఏడు రంగులు కలిస్తే తెలుపు, ఏ రంగూ లేకపోతే నలుపు అన్నారట. ఇంకో ఆధ్యాత్మిక విషయాలు మాట్లాడే వ్యక్తినడిగితే తెలుపు అంటే వెలుగు ఉంది వెలుగు లేదు అని రెండే ఉన్నాయి భక్తా అంతే కాని చీకటి, నలుపు అన్నవి లేనే లేవు అన్నారట. అంతటితో ఆగక వెలుగంటే జ్ఞానము, నలుపంటే అజ్ఞానము అనే అవకాశమూ ఉంది. మహాకవి శ్రీశ్రీని ప్రశ్నలు జవాబులు అన్న శీర్షిక నిర్వహిస్తున్నప్పుడు ఇదే ప్రశ్న అడిగి ఉంటే ఎలాంటి సమాధానమొచ్చేదో ఊహించుకోవాలనుంది.
ఇప్పుడంటే కంప్యూటర్లు, ట్యాబులు, సెల్లులు ఇలా వచ్చాయి కాని ఒకప్పుడు రచయితలు కాగితంపైనే కదా రాసింది. వారి మిత్రులు సహ రచయితలు ఎందుకు తెల్లని కాగితాన్ని నల్లని సిరాతో రాసి వ్యర్ధం చేస్తావని తమాషా పట్టించేవాళ్లు. తర్వాత కాగితాన్ని వేస్టు చేసి అడవులను నాశనం చేస్తున్నావు అని కూడా అన్నారు. ఏమైనా ఇక్కడ తెల్లని పేపరు గురించి చెప్పడానికే. మెమోరీని నింపేస్తున్నారని అంటే సరిపోతుంది ఇప్పుడు. అలా ఐనప్పుడు కంప్యూటర్‌ ఇతర సాధనాలు నిదానంగా పనిచేస్తాయి. తెల్లని చందమామ పై నల్లని మచ్చల గురించి కూడా ఎన్నో కవితల్లో, కథల్లో, నవలల్లో వచ్చింది. అవి సినిమాలకు కూడా పాకాయి. అంతటి తెల్లనైన చంద్రుడికే మచ్చ ఉన్నప్పుడు నీవెంత అని ఎవరిమీదైనా నిందలు వస్తే ప్రస్తావించేవాళ్లు. అందుకే దిష్టి చిన్నపిల్లలను బాగా తయారు చేశాక దిష్టి చుక్కలు పెట్టేవాళ్లు కాటుకతో. ఆ అలవాటు ఇప్పటికీ ఉంది మరి. ఇవన్నీ చూస్తే తెలుపు నలుపుల దోస్తీ ఇప్పటిది కాదని తెలుస్తుంది.
మనుషులకు మాత్రమే రంగులు కనిపిస్తాయని పక్షులకు, జంతువులకు అన్నీ నలుపు తెలుపుల్లోనే కనిపిస్తాయని చాలామంది అపోహ పడుతుంటారు. కాని వాటిల్లో కొన్నింటికి, ఇంకా కొన్ని చేపలు కూడా మనుషులకంటే ఎక్కువ రంగుల్ని స్పష్టంగా చూడగలుగుతాయని పరిశోధనల్లో తేలింది. ఇదంతా ఎందుకంటే తెల్లని కాంతి ఏడురంగుల మిశ్రమము అని చిన్నప్పుడు చదువుకున్నాము కదా అది గుర్తు చేయడానికి. ఏ ఎండకా గొడుగు పడతారని కొందరిని సామెత. ఈ సామెత చెప్పి కొందరిని ఎక్కిరిస్తుంటారు కూడా. అంటే పరిస్థితులకనుగుణంగా ఎవరికి తగినట్టు వారితో మాట్లాడతారని అర్థం. వర్షానికి ఏ గొడుగైనా పట్టొచ్చు కాని ఎండలో మాత్రం నల్లని గొడుగు పనికి రాదు. దానివల్ల ఆ గొడుగు సూర్యకాంతిని బాగా పీల్చి మనకు ఇంకా వేడి కలిగేటట్టు చేస్తుంది. అందుకే లేత రంగులున్న గొడుగులనే వాడాలి ఎండలో. వేసుకునే బట్టలకు కూడా ఈ సూత్రం పనిచేస్తుంది.
ఇప్పుడు కేంద్ర ప్రభుత్వం కొత్తగా నాలుగు కార్మిక చట్టాలను తెచ్చింది. ఇరవైతొమ్మిది చట్టాలను నాలుగుగా కుదించి తీయనైన భాషతో వాటిని అమల్లోకి తెచ్చినామని ప్రకటించింది. కార్మిక సంఘాలు మాత్రం వీటిని నల్లచట్టాలనే పిలుస్తున్నారు. కాని ప్రభుత్వం ఇవి మంచి చట్టాలని, వాటికి తెల్ల పెయింటు పూసి మరీ వాదిస్తోంది. కొన్ని పత్రికలు తప్ప మిగతా పత్రికలు ఇంకాస్త ముందుకుపోయి దానిపై మంచి మంచి రంగుల పూలేసి తమ భక్తిని చాటుకుంటున్నాయి. ఆ పెయింటు తొలగించి చూస్తే లోపల నల్లగా ఉందని తెలిసిపోతుంది. ప్రపంచీకరణ మొదలైనప్పుడు ఎలాగైతే భాష మారిందో దాన్ని మించి ఇప్పుడు అతి తియ్యనైన భషలో శ్రమశక్తి నిధి అని, స్వాతంత్య్రానంతరం చేపట్టిన సమగ్ర కార్మిక, ప్రగతిశీల సంస్కరణలు తెచ్చామని ప్రభుత్వం చెబుతోంది. ఇవి కార్మికులకు మరింత సాధికారత కల్పిస్తాయని ఒక పక్క అంటూనే ఈజ్‌ ఆఫ్‌ డూయింగ్‌ బిజినెస్‌ను సులభతరం చేయడంతో పాటు దాన్ని ప్రగతిబాట పట్టిస్తాయని అదేరంగో తెలియదు కాని కార్మికుల చెవుల్లో రంగురంగుల పూలు పెడుతోంది ప్రభుత్వం.
ఈజ్‌ ఆఫ్‌ డూయింగ్‌ బిజినెస్‌ కార్మికులకు సంబంధించి చేశారా లేక పెట్టుబడి పెట్టేవాళ్లకా? అంతకు ముందు కాని, ఈ నల్లచట్టాలను తెచ్చినవెంటనే కాని వారి మాటలు చూస్తే మనకెన్నో విషయాలు బోధపడతాయి. రండి మాదేశంలో పెట్టుబడులు పెట్టండి, చట్టాలను సులభతరం చేశాం, మీకెటువంటి అడ్డంకులు ఉండవని ఆహ్వానిస్తోంది ప్రభుత్వం. పెట్టుబడిదారులకు సులభతరం చేశారంటే చెప్పకుండానే కార్మికులకు, వారి హక్కులకు భంగం కలిగిస్తున్నామన్న అర్థం దాగుంది దాంట్లో. ఉదాహరణకు వందమంది కార్మికులు దాటితే ప్రభుత్వం దగ్గర అనుమతి తీసుకోవాలని ముందున్న నిబంధనను మూడువందలు చేశారంటేనే దాని నల్లరంగు బయట పడింది. ఆ నిబంధన మూడువందలు దాటిన కంపెనీలకే వర్తిస్తుందని చెప్పకనే చెప్పారు. ఇది ఎవరికి ప్రయోజనం?
మహిళలు రాత్రిపూట పనిచేయడం పై ఉన్న నిబంధనలు తొలగించామని చెబుతున్నారు.
ఇప్పుడే వారికి సరైన రక్షణనివ్వలేని ప్రభుత్వాలు మహిళలకు రాత్రిళ్లు బధ్రత ఎలా కల్పిస్తారు? ఇక నలభై ఏండ్ల వయసు దాటిన కార్మికులకు వైద్యపరీక్షలు చేయిస్తామని చెబుతున్నారు. అలా చేసేటప్పుడు యాజమాన్యానికి వ్యతిరేకంగా ఉన్నారనుకుంటే ఆ పరీక్షల్లో వారి ఆరోగ్యం బాగాలేదని చెప్పి తీసేసే వీలుంటుంది. చట్టంలోని ఈ పాయింటు నల్లనిదా? తెల్లనిదా? యాభైమందికి పైన ఒకేసారి సెలవు పెడితే సమ్మె చేసినట్టేనంట. ఏ పండగో, పబ్బమో, లేదా కార్మికుల మహాసభలో వచ్చినప్పుడు ఈ నిబంధన ఎవరికి మంచిది? తమ భావజాలానికనుగుణంగా కుంభమేళాలకు, అలాంటివాటికి ఇది వర్తించదు అని సడలింపు ఇచ్చినా ఇస్తారని సులభంగా ఊహించొచ్చు. ఇక వేతనం నిర్వచనాన్ని మార్చారు. ఇది కార్మికులపై తీవ్ర ప్రభా వాన్ని చూపుతుంది.
ఇలా చెప్పుకుంటూపోతే ఈ పెయింటు పూసిన చట్టాల అసలు రంగు నల్లనిదని, అది కార్మికుల జీవితాలను చీకటిమయం చేస్తుందని కార్మిక సంఘాలు చెబుతున్నది అక్షరాలా నిజం.
దుష్టచతుష్టయం గురించి భారతంలో రాశారు కాని నేటి ఆధునిక భారతంలో ఈ నాలుగు నల్ల చట్టాలే కార్మికులపట్ల నిజమైన దుష్టచతుష్టయమనుకోవాలి. కార్మికుల ఐక్యతను కులాలు, మతాల ద్వారా గండికొట్టొచ్చన్న వారి ఆలోచనలు ఈ నల్ల చట్టాల వ్యతిరేకతను ఎదుర్కోవడంలో వాడుకోవచ్చునన్న ఆలోచన తప్పని కార్మికులు నిరూపిస్తారు. శ్రమశక్తే వారి కులమని తెలుసుకున్నాక నాలిక్కరుచుకోనేది, ముక్కుమీద వేలేసుకునేది ప్రభుత్వమే ఎందుకంటే వారు ఎర్రజెండాలు పట్టుకొని నల్లబ్యాడ్జులు ధరించి ఈ నల్ల చట్టాలను వెనక్కు తీసుకుపోయేవరకు ఆగకుండా పోరాటం చేస్తారు. చరిత్రను అబద్దాలతో నింపే వారికి ఈ చారిత్రక సత్యం అప్పుడు తెలుస్తుంది.
జంధ్యాల రఘుబాబు
9849753298
