భారతీయ సినిమాకు ధర్మేంద్ర అనేది కేవలం ఒక పేరు కాదు.. అది ఒక శక్తి, ఒక కాలం, ఒక మనోభావం. ఆయన తెరపై కనిపించినప్పుడు ప్రేక్షకులు కేవలం హీరోని చూడలేదు. ఒక మనిషి లోని బలహీనతలు, ధైర్యం, ప్రేమ, విలువలు – అన్నీ కలిసిన జీవన రూపంని చూసారు. బాలీవుడ్‌ లో కండలు తిరిగిన సౌష్టవంతో స్టార్స్‌ గా రాణించిన ఆ నాటి నటుల్లో ధర్మేంద్ర స్థానం ప్రత్యేకమైనది. ‘మేచో మేన్‌’గా పేరొందిన తొలి హిందీ హీరో ధర్మేంద్ర అనే చెప్పాలి. అప్పట్లో ఎంతోమంది అందాల భామల కలల రాకుమారునిగా రాజ్యామెలిన బాలీవుడ్‌ హీమన్‌ ధర్మేంద్ర. ‘డ్రీమ్‌ గర్ల్‌’గా పేరొందిన హేమామాలిని అంతటి అందాల భామను తన సొంతం చేసుకున్నారు ధర్మేంద్ర. తనదైన అభినయంతో ధర్మేంద్ర బ్లాక్‌ అండ్‌ వైట్‌ కాలం నుంచీ అలరిస్తూ సాగారు. కలర్‌ సినిమా రోజుల్లో అయితే ధర్మేంద్ర చిత్రాలు కలెక్షన్ల వర్షం కురిపిస్తూ విజయకేతనం ఎగురవేశాయి. ఎక్కువగా యాక్షన్‌ సినిమాల్లో నటించిన ధర్మేంద్రను ఆయన అభిమానులు ”యాక్షన్‌ కింగ్‌”, ”హీ-మ్యాన్‌” అని ముద్దుగా పిలుచుకుంటారు. ”షోలే” చిత్రాన్ని ఆయన కెరీర్‌ లో పెద్ద మలుపుగా చెప్పుకోవచ్చు. కాశ్మీరం నుండి కన్యాకుమారి దాకా ధర్మేంద్రకు అభిమానగణాలున్నాయి. అందరినీ అలరిస్తూ దాదాపు రెండున్నర దశాబ్దాలు ధర్మేంద్ర తన బాణీ పలికించారు. బాలీవుడ్‌ హీ-మ్యాన్‌గా, లెజెండరీ నటుడిగా పేరుపొందిన ధర్మేంద్ర తన 89ఏళ్ల వయసులో నవంబర్‌ 24వ తేదీన తుదిశ్వాస విడిచారు. ఈ సందర్భంగా ధర్మేంద్ర కు నివాళులు అర్పిస్తూ సోపతి పాటకుల కోసం అందిస్తున్న వ్యాసం.
ధర్మేంద్ర 1935వ సంవత్సరం డిసెంబర్‌ 8న పంజాబ్‌ లోని నస్రాలీలో జన్మించారు. ధర్మేంద్ర అసలు పేరు ధరమ్‌ సింగ్‌ డియోల్‌. ధర్మేంద్ర తండ్రి లూధియానా పట్టణ సమీపంలోని లాల్టోన్‌ కలాన్‌ అనే గ్రామం ప్రాథమిక పాఠశాలలో ప్రధానోపాధ్యాయునిగా పనిచేసేవారు. అక్కడే ధర్మేంద్ర ప్రాథమిక విద్య సాగింది. ధర్మేంద్ర కూడా తండ్రి వద్ద చదువుకొనే పిల్లలకు ట్యూషన్‌ చెప్పేవారు. పంజాబీ సంప్రదాయ కుటుంబంలో పెరగడం వల్ల క్రమశిక్షణతో కూడిన వాతావరణం ఉండేది. బాల్యం నుంచే సినిమా అంటే ఇష్టం ఉండేది.. నాటి స్టార్‌ యాక్టర్‌ దిలీప్‌ కుమార్‌ నటన ధర్మేంద్రను ప్రభావితం చేసింది.
1952లో ధర్మేంద్ర మెట్రిక్యులేషన్‌ పాసయ్యారు. మెట్రిక్యూలేషన్‌ పూర్తయ్యాక కొంతకాలం ఉపాధ్యాయ వత్తిలోనే సాగారు. ఉద్యోగం చేస్తూనే.. సినిమా నటుడు కావాలనే తన కలను నెరవేర్చుకోవడం కోసం అవకాశాలను వెతుక్కునేవారు. అదే సమయంలో ‘పిలిమ్‌ ఫేర్‌’ మేగజైన్‌ కొత్తవారిలో ప్రతిభను ప్రోత్సహించేందుకు ఓ కార్యక్రమం చేపట్టింది. అందులో ధర్మేంద్ర విజేతగా నిలిచారు. విజేతగా నిలిచిన ధర్మేంద్ర ను బొంబాయికి వస్తే సినిమా అవకాశాలు కల్పిస్తామని చెప్పారు. ‘ఫిలిమ్‌ ఫేర్‌’ న్యూ టాలెంట్‌ విన్నర్‌ గా బొంబాయి చేరిన ధర్మేంద్రకు నిరాశ ఎదురయింది. అయితే పట్టువదలకుండా రకరకాల కాస్ట్యూమ్స్‌ తో ఫోటోలు తీయించుకొని హిందీ చిత్రసీమలో తన అదష్టాన్ని పరీక్షించుకోవడానికి ధర్మేంద్ర అక్కడే వేట సాగించారు.
సినీరంగ ప్రవేశం
ఆ సమయంలో అర్జున్‌ హింగోరానీ అనే దర్శకుడు ధర్మేంద్ర పర్సనాలిటీ చూసి, తన సినిమాలో హీరోగా అవకాశం కల్పించారు. ఆ చిత్రమే ‘దిల్‌ భీ తేరా హమ్‌ భీ తేరే’. 1960లో వచ్చిన ఈ చిత్రంలో ధర్మేంద్ర బలరాజ్‌ సహానీ వంటి మేటి నటునితో కలసి నటించారు. కుమ్‌ కుమ్‌ నాయికగా కనిపించిన ఈ చిత్రంలో ఆయన ధర్మేందర్‌ గా టైటిల్‌ వేశారు. తరువాత కొన్ని చిత్రాలలో సైడ్‌ హీరోగానూ నటించారు. 1962లో వచ్చిన ‘అన్‌ పడ్‌’ ధర్మేంద్రకు బ్రేక్‌ నిచ్చింది. 1961 లో వచ్చిన ”షోలా ఔర్‌ షబ్నమ్‌” 1962 లో ”అన్‌ పడ్‌” 1963 లో బందిని చిత్రాలు ధర్మేంద్రకు నటునిగా గుర్తింపును తీసుకు వచ్చాయి. రాజేంద్ర కుమార్‌ హీరోగా నటించిన ‘ఆయీ మిలన్‌ కీ బేలా’లో ప్రతినాయకునిగా నటించి మంచి మార్కులు సంపాదించారు ధర్మేంద్ర. 1966లో తెరకెక్కిన ‘ఫూల్‌ ఔర్‌ పత్థర్‌’ సినిమా ఘనవిజయం సాధించి ధర్మేంద్రకు స్టార్‌ డమ్‌ తెచ్చిపెట్టింది. ఈ సినిమా ఆధారంగా తెలుగులో యన్టీఆర్‌ హీరోగా తెరకెక్కిన ‘నిండుమనసులు’ (1967) చిత్రం విజయం చేజిక్కించుకుంది. నూతన్‌ తో ధర్మేంద్ర నటించిన ”సూరత్‌ ఔర్‌ శీరత్‌, బందినీ, దిల్‌ నే ఫిర్‌ యాద్‌ కియా, దుల్హన్‌ ఏక్‌ రాత్‌ కీ” చిత్రాలు ఆయనకు మంచి పేరు సంపాదించి పెట్టాయి. అలాగే మాలా సిన్హాతో ధర్మేంద్ర అభినయించిన ”అన్‌ పడ్‌, పూజా కే ఫూల్‌, బహారే ఫిర్‌ భీ ఆయేగీ, ఆంఖే” చిత్రాలు జనాన్ని అలరించాయి. ఆయన కంటే సీనియర్‌ నటి అయిన మీనా కుమారితో ధర్మేంద్ర ఏడు చిత్రాలలో నటించి ఆకట్టుకున్నారు. వీరిద్దరూ నటించిన ”మై భీ లడ్కీ హూ, కాజల్‌, పూర్ణిమ, ఫూల్‌ ఔర్‌ పత్థర్‌, మజ్లీ దీదీ, చందన్‌ కా పాలనా, బహారోంకీ మంజిల్‌” సినిమాలు విశేషాదరణ చూరగొన్నాయి. వీరిద్దరి మధ్య ఏదో అనుబంధం ఉందన్న వదంతులు అప్పట్లో విశేషంగా వినిపించాయి. హషీకేశ్‌ ముఖర్జీ తెరకెక్కించిన ‘అనుపమ’లో ధర్మేంద్ర అభినయం విమర్శకుల ప్రశంసలు అందుకుంది.”షికార్‌, ఇజ్జత్‌, ఆంఖే, ఆద్మీ ఔర్‌ ఇన్‌ సాన్‌, సత్యకామ్‌, మేరా గావ్‌ మేరా దేశ్‌, యాదోంకీ బారాత్‌,” వంటి సూపర్‌ హిట్‌ మూవీస్‌ లో ధర్మేంద్ర నటించారు.
హేమామాలినితో
ఇక 1970ల ఆరంభంలో హేమామాలినితో జోడీ కట్టడం ఆరంభించారు ధర్మేంద్ర. వారిద్దరి జంట ప్రేక్షకులకు కన్నుల పండుగ చేసింది. ”రాజా-జానీ, సీతా ఔర్‌ గీతా, షరాఫత్‌, నయా జమానా, పత్థర్‌ ఔర్‌ పాయల్‌, తుమ్‌ హసీన్‌ మై జవాన్‌, జుగ్ను, చరస్‌, దోస్త్‌, మా, షోలే, ఆజాద్‌” వంటి చిత్రాలలో ధర్మేంద్ర, హేమామాలిని జంట జనానికి నయనానందం కలిగించడమే కాదు, జైత్రయాత్రలూ చూశారు. ఆ సమయంలోనే వారిద్దరి మధ్య ప్రేమ అంకురించింది. అప్పటికే ధర్మేంద్రకు పెళ్ళయి పిల్లలు ఉన్నా, హేమ మనసు ఆయనతో జీవితాన్ని కోరుకుంది. తత్ఫలితంగా 1980లో వీరు వివాహం చేసుకున్నారు. వారికి ఇషా డియోల్‌, అహనా డియోల్‌ పిల్లలు. ఇక ధర్మేంద్ర మొదటి భార్య ప్రకాశ్‌ కౌర్‌ పిల్లల్లో సన్నీ డియోల్‌, బాబీ డియోల్‌ సైతం హీరోలుగా అలరించారు. తన తనయులను హీరోలుగా పరిచయం చేస్తూ చిత్రాలు నిర్మించారు. సన్నీతో ‘బేతాబ్‌’, బాబీతో ‘బర్సాత్‌’ తెరకెక్కించారు. ఇవి కాకుండా మరికొన్ని చిత్రాలనూ తమ విజేత ఫిలిమ్స్‌ పతాకంపై నిర్మించారాయన. వాటిలో తనయుడు సన్నీతో నిర్మించిన ‘ఘాయల్‌’ మంచి పేరు సంపాదించి పెట్టింది.
కుటుంబం
ధర్మేంద్ర రెండు పెళ్లిళ్లు చేసుకున్నారు. 19 సంవత్సరాల వయసులో 1954లో ఆయన ప్రకాష్‌ కౌర్‌తో ఏడు అడుగులు వేశారు. కానీ అప్పుడు ధర్మేంద్ర సినీ పరిశ్రమలోకి అడుగు పెట్టలేదు. పెళ్లి తర్వాత ప్రకాష్‌ కౌర్‌, ధర్మేంద్ర ఇద్దరు కుమారులు, ఇద్దరు కుమార్తెలు అంటే నలుగురు పిల్లలకు తల్లిదండ్రులు అయ్యారు. ఈ నలుగురు పిల్లలకు సన్నీ డియోల్‌, బాబీ డియోల్‌, విజేత డియోల్‌, అజీతా డియోల్‌ అని పేర్లు పెట్టారు. సన్నీ, బాబీ డియోల్‌ సినిమా పరిశ్రమలో సుపరిచితులు, కానీ వారిద్దరు సోదరీమణులు సెలబ్రిటీ లైఫ్‌కు చాలా దూరంగా ఉంటారు. ధర్మేంద్ర మొదటి భార్య పిల్లలు వారి జీవితాల్లో స్థిరపడ్డారు. అయితే ప్రకాష్‌ కౌర్‌ నుంచి విడాకులు తీసుకోకుండానే ధర్మేంద్ర 1980లో హేమా మాలినిని వివాహం చేసుకున్నారు. 13 సంవత్సరాలు కంటే తక్కువ వయసు ఉన్న నటితో ఏడు అడుగులు వేసిన తరువాత, ఈ జంట ఇద్దరు కుమార్తెలకు తల్లిదండ్రులు అయ్యారు. ధర్మేంద్ర, హేమా తమ కుమార్తెలకు ఈషా, అహానా డియోల్‌ అని పేర్లు పెట్టారు. ధర్మేంద్ర రెండు పెళ్లిళ్ల ద్వారా కలిగిన పిల్లలందరూ ఇల్లు నిర్మించుకున్నారు. ఇప్పుడు ఆ నటుడు మొత్తం 13 మంది మనవళ్లు, మనవరాళ్లకు తాతయ్య అయ్యారు. నటుడి పెద్ద కుమారుడు సన్నీ డియోల్‌ భార్య పూజ లైమ్‌ లైట్‌ నుంచి దూరంగా ఉంటారు. ఈ జంటకు ఇద్దరు కుమారులు కరణ్‌, రాజ్‌ వీర్‌ ఉన్నారు, ధర్మేంద్ర రెండో కొడుకు బాబీ డియోల్‌ కూడా తన చిన్ననాటి స్నేహితురాలు తాన్యా అహూజాతో ఏడు అడుగులు వేశారు, వారికి ఆర్యమాన్‌, ధరం అనే ఇద్దరు పిల్లలు ఉన్నారు. బాబీ డియోల్‌ సోదరీమణులు విజేత, అజీతా లైమ్‌లైట్‌ నుంచి దూరంగా ఉంటారు. తరచుగా మొత్తం కుటుంబాన్ని కుటుంబ కార్యక్రమాలలో కలిసి చూస్తారు. ఇద్దరు సోదరీమణులు వివాహం తర్వాత విదేశాలకు వెళ్లారు. వారు గ్లామర్‌ ప్రపంచానికి దూరంగా ఉన్నప్పటికీ, సోషల్‌ మీడియాలో ఇద్దరూ చాలా చురుకుగా ఉన్నారు. విజేత, అజీతా ఇద్దరూ ఇద్దరు పిల్లలకు తల్లులు. ధర్మేంద్ర, హేమా మాలిని కుమార్తెలు ఈషా, అహానా గురించి మాట్లాడితే, వారిద్దరూ కూడా వివాహం చేసుకున్నారు. ఈషా డియోల్‌ తన తల్లిదండ్రుల వలె సినిమాల్లో నటించడానికి ప్రయత్నించింది, కాని ఆమె విఫలమైంది. 2012లో వ్యాపారవేత్త భరత్‌ తఖ్తానితో ఏడు అడుగులు వేసింది, కాని ఇప్పుడు ఇద్దరూ విడాకులు తీసుకున్నారు. తన వివాహంలో ఈషా డియోల్‌ రాధ్యా, మిరాయా అనే ఇద్దరు పిల్లలకు తల్లి అయ్యింది. ధర్మేంద్ర, హేమా మాలినిల చిన్న కుమార్తె పేరు అహానా. వ్యాపారవేత్త వైభవ్‌ వోహ్రాతో ఏడు అడుగులు వేసింది. 2015లో ఆమె కుమారుడు డేరియన్‌ వోహ్రాకు తల్లి అయ్యింది. 2020లో ఇద్దరు కవల కుమార్తెలకు జన్మనిచ్చింది.
రాజకీయాల్లో ధర్మేంద్ర
ధర్మేంద్ర కేవలం నటుడిగానే కాకుండా.. రాజకీయాల్లోనూ తనదైన ముద్ర వేశారు. 2004లో, ఆయన భారతీయ జనతా పార్టీ తరపున రాజస్థాన్‌లోని బికనీర్‌ లోక్‌సభ నియోజకవర్గం నుండి పార్లమెంట్‌ సభ్యుడిగా ఎన్నికయ్యారు. అయితే, రాజకీయాలపై ఆయనకు అంతగా ఆసక్తి లేకపోవడం వలన, ఆయన పదవీ కాలంలో అంత చురుకుగా లేరు. తన పదవీ కాలం తర్వాత ఆయన రాజకీయాల నుండి వైదొలిగారు. నటనారంగంలో ఆయన చేసిన సేవలకు గుర్తింపుగా, 2012లో భారత ప్రభుత్వం ఆయనకు భారతదేశంలో మూడవ అత్యున్నత పౌర పురస్కారం అయిన ”పద్మ భూషణ్‌” అవార్డును ప్రదానం చేసింది. హిందీ చలనచిత్ర రంగానికి ఆయన చేసిన కషికి గుర్తింపుగా ”ఫిలింఫేర్‌ జీవిత సాఫల్య పురస్కారం” సైతం అందుకున్నారు.
ధర్మేంద్ర తన వయస్సు పెరిగినా.. ఆయన అప్పుడప్పుడు సినిమాలలో నటిస్తూ, ప్రేక్షకులను అలరిస్తూనే వచ్చారు. ధర్మేంద్ర నటించిన తాజా చిత్రం ‘ఇక్కీస్‌’ విడుదలకు సిద్ధమవుతోంది. ఇది పరమవీర చక్ర గ్రహీత లెఫ్టినెంట్‌ అరుణ్‌ ఖేతర్‌పాల్‌ జీవితకథ ఆధారంగా రూపొందిన చిత్రం. ఇందులో ఆయన హీరో తండ్రి పాత్రలో కనిపించనున్నారు. ఈ చిత్రం ఈ ఏడాది డిసెంబర్‌ 25న విడుదల కానుంది.
తెలుగువారితో అనుబంధం
తెలుగువారితో ధర్మేంద్రకు మంచి అనుబంధం ఉంది. తెలుగు వారు నిర్మించిన ‘జానీ దోస్త్‌, వీరూ దాదా’ వంటి చిత్రాల్లో నటించారు… తెలుగు దర్శకుడు తాతినేని ప్రకాశరావు రూపొందించిన ‘ఇజ్జత్‌’ సినిమాలో ధర్మేంద్ర ద్విపాత్రాభినయం చేసి అలరించారు. నటరత్న యన్టీఆర్‌ తన ‘బ్రహ్మర్షి విశ్వామిత్ర’ హిందీ సాంగ్స్‌ ను ధర్మేంద్ర రికార్డింగ్‌ థియేటర్‌ లోనే రూపొందించడం విశేషం… ఇలా తెలుగు చిత్రసీమతోనూ అనుబంధం ఉన్న ధర్మేంద్ర 200పైగా చిత్రాల్లో నటించారు. యాక్షన్‌ ఇమేజ్‌ తో సాగుతూనే కామెడీని మిళితం చేసి పాత్రలను రంజింప చేయడంలో ధర్మేంద్ర తనదైన బాణీ పలికించారు. పలు మల్టీస్టారర్స్‌ లో నటించిన ధర్మేంద్రకు అమితాబ్‌ బచ్చన్‌, రాజేశ్‌ ఖన్నా, వినోద్‌ ఖన్నా, జితేంద్ర వంటి స్టార్స్‌ ఎంతో గౌరవమిచ్చేవారు. తరువాతి రోజుల్లో అనేకమంది బాలీవుడ్‌ హీరోస్‌ ధర్మేంద్ర బాణీలోనే కామెడీని మిక్స్‌ చేసి తమకు లభించిన పాత్రలను రక్తి కట్టించారు. అమితాబ్‌ బచ్చన్‌ సైతం ‘షోలే’లో ధర్మేంద్ర తో కలసి నటించి, ఆ పై ఆయన పంథాలోనే హాస్యం పండిస్తూ యాక్షన్‌ రోల్స్‌ పోషించడం విశేషం. ఏది ఏమైనా ధర్మేంద్ర మరణంతో ఓ శకం ముగిసిందని చెప్పవచ్చు.
1980లలో ధర్మేంద్ర ప్రభావం
1980 లో ధర్మేంద్ర, హేమామాలిని, వినో ద్‌ ఖన్నా నటించిన ”ది బర్నింగ్‌ ట్రైన్‌” యాక్షన్‌-థ్రిల్లర్‌ అన్ని చోట్లా సూపర్‌ హిట్‌ . సౌత్‌ స్టేట్‌ ల్లోనూ బాగా ఆడింది. దీన్ని రీమేక్‌ చేద్దామనుకుని, ఆ ప్లేవర్‌ మళ్లీ తేలేమని ఆగిపోయారని చెప్తారు. అయితే రీసెంట్‌ గా హిందీ నిర్మాత జాగీ భగ్నానీ ఇప్పటికాలం విఎఫ్‌ ఎక్స్‌ లతో ఈ సినిమా రీమేక్‌ చేయాలనే ఆలోచన ఉన్నట్లు చెప్పుకొచ్చారు. 1982 లో ”రాజ్‌ పుత్‌, ఘజబ్‌” వంటి మరికొన్ని సినిమాలు వేర్వేరు భాషల్లో అనువదించబడి ప్రేక్షకులను కదిలించాయి. వాటి కాన్సెప్టులు కొద్దిపాటి మార్పులతో ఇక్కడ ప్రీమేక్‌ లు అయ్యాయి. ధర్మేంద్ర లెగసీ, భాషల్ని, తరాల్ని దాటి నిలిచిన సినీ వారసత్వం! ధర్మేంద్ర సినిమాలు కేవలం కథలు కావు. అవి భావోద్వేగాల ప్రయాణం. భాషలు మారినా, ఎమోషన్‌ మారలేదు. ప్రతి రీమేక్‌ లేదా డబ్బింగ్‌ ఆయన చిత్రాల సారాన్ని సౌత్‌ ఆడియెన్స్‌కు అందించి, మనసుల్ని కట్టిపడేసింది.
‘షోలేని ఎవరూ తాకలేదు
1975లో వచ్చిన ”షోలే” చిత్రం భారత సినిమా చరిత్రలో లెజెండ్‌గా నిలిచింది. ధర్మేంద్ర పోషించిన ”వీరు” పాత్ర సౌత్‌లోనూ క్రేజ్‌ క్రియేట్‌ చేసింది. ఆసక్తికర విషయం ఏమిటంటే ు డైరక్ట్‌ గా రీమేక్‌ రాలేదు కానీ ఈ చిత్రం ఛాయిలు చాలా పాత సినిమాల్లో కనిపిస్తాయి. అలాగే ఆ తర్వాత 2011లో దర్శకుడు పూరీ జగన్నాథ్‌ ఈ క్లాసిక్‌కు తెలుగు రీమేక్‌గా ప్రభాస్‌, గోపిచంద్‌తో ప్లాన్‌ చేశారని చెప్తారు. కానీ ఒరిజనల్‌ దర్శకుడు రమేష్‌ సిప్పీ ”క్లాసిక్‌ని తాకొద్దు” అని చెప్పడంతో ఆ ప్రాజెక్ట్‌ ఆగిపోయిందని వార్తలు వచ్చాయి.
1958లో దిల్‌ బీ తేరా హమ్‌ బీ తేరే చిత్రంతో తెరంగేట్రం చేసిన ధర్మేంద్ర, తన కెరీర్‌లో ”షోలే”, ”చుప్కే చుప్కే”, ”ధర్మ్‌ వీర్‌”, ”సీతా ఔర్‌ గీత”, ”యాదోం కి బారాత్‌” వంటి ఎన్నో క్లాసిక్‌ సినిమాలతో అభిమానుల హదయాల్లో చిరస్థాయిగా నిలిచిపోయారు. స్క్రీన్‌పై తన పవర్‌ఫుల్‌ డైలాగ్‌ డెలివరీ, మాస్‌ అప్పీల్‌, అద్భుతమైన స్టైల్‌తో ఆయనకు అభిమానులు ”హీ-మ్యాన్‌ ఆఫ్‌ బాలీవుడ్‌” అనే బిరుదు ఇచ్చారు.
960లలో ప్రారంభమైన ధర్మేంద్ర సినీ ప్రయాణం, 1980ల దాకా సాగిన ప్రభావం, నేటికీ మనసుల్లో ప్రతిధ్వనిస్తుంది. ధర్మేంద్ర సినిమాలు ఎప్పుడూ ఫార్ములా కాదు. అవి భావోద్వేగం, న్యాయం, మనసు, మానవత్వం అనే నాలుగు స్తంభాల మీద నిలిచినవి. ఆయన పాత్రలు కొన్నిసార్లు రఫ్‌గా, కొన్నిసార్లు రొమాంటిక్‌గా, కానీ ఎప్పుడూ నిజాయితీతో ఉంటాయి. అందుకే ఆయన సూపర్‌హిట్స్‌ భాషలను దాటి, దేశపు హదయాన్ని తాకాయి. హిందీ తెరపై పుట్టిన ”ఫూల్‌ ఔర్‌ పత్థర్‌, సీత ఔర్‌ గీత, షోలే, బర్నింగ్‌ ట్రైన్‌” వంటి సినిమాలు సౌత్‌ లో తెలుగు, తమిళ, మలయాళ భాషల్లో కొత్త రూపాలతో పునర్జన్మ పొందాయి. అవి కేవలం రీమేక్‌లు కాదు ు ధర్మేంద్ర ఆత్మను మళ్లీ పలికించిన కథలు. అంతేకాదు దక్షిణాది భాషల్లో కూడా వేర్వేరు రూపాల్లో అంటే రీమేక్‌ లు, ఫ్రీమేక్‌ లు, అనుకరణలు ప్రేక్షకుల హదయాల్లో నిలిచాయి. తమిళం, తెలుగు, మల యాళలలో ఆయన సినిమాల రీమేక్‌లు బ్లాక్‌బస్టర్‌లుగా నిలవడం ఆయన పాన్‌-ఇండియా ప్రభావానికి నిదర్శనం.
నేడు చిత్రసీమలో ఎందరో కండలవీరులు స్టార్‌ హీరోస్‌ గా రాణిస్తున్నారు. హిందీ సినిమారంగంలో అలాంటి స్టేటస్‌ చూసి ‘మ్యాచో మేన్‌’గా జేజేలు అందుకున్న తొలి స్టార్‌ హీరో ధర్మేంద్ర అనే చెప్పాలి. బాలీవుడ్‌ బ్లాక్‌ అండ్‌ వైట్‌ రోజుల నుంచీ సెవెంటీ ఎమ్‌.ఎమ్‌. డేస్‌ దాకా ధర్మేంద్ర తనదైన అభినయంతో ఆకట్టుకున్నారు. ధర్మేంద్ర బాలీవుడ్‌లో అత్యంత విజయవంతమైన నటులలో ఒకరు. ఆయన తన కెరీర్‌ లో ఎన్నో పెద్ద సినిమాల్లో నటించారు. ఆయన సినీ జీవితంతోపాటు వ్యక్తిగత జీవితం కూడా ఆసక్తిని కలిగిస్తుంది. బాలీవుడ్‌లో విజయవంతమైన కెరీర్‌ను నిర్మించుకున్న తరువాత, నటుడు తన పెద్ద కుటుంబంతో సంతోషకరమైన జీవితం గడిపారు.
- డా. పొన్నం రవిచంద్ర,
సీనియర్‌ జర్నలిస్టు, సినీ విమర్శకులు
9440077499
