రోహిత్‌, కోహ్లి రాకతో ఆతిథ్య జట్టులో జోష్‌
ఆత్మవిశ్వాసంతో కనిపిస్తోన్న సఫారీలు
భారత్‌, దక్షిణాఫ్రికా తొలి వన్డే నేడు
మధ్యాహ్నం 1.30 నుంచి స్టార్‌స్పోర్ట్స్‌లో..
టెస్టు ఫార్మాట్‌లో ఊహించని పరాజయాలు చవిచూసిన టీమ్‌ ఇండియా.. స్వదేశంలో వైట్‌బాల్‌ ఫార్మాట్‌ మేనియాకు సిద్ధమవుతోంది. స్టార్‌ ప్లేయర్స్‌ విరాట్‌ కోహ్లి, రోహిత్‌ శర్మలు సుదీర్ఘ విరామం తర్వాత స్వదేశంలో బ్యాట్‌ పట్టనున్నారు. సీనియర్ల రాక డ్రెస్సింగ్‌రూమ్‌లో ఉత్సాహం నింపినా..వరుసగా మూడు వారాల్లో మూడో కెప్టెన్‌ను చూస్తున్న టీమ్‌ ఇండియా నేడు రాంచీలో ఏం చేస్తుందో చూడాలి. భారత్‌, దక్షిణాఫ్రికా తొలి వన్డే పోరు నేడు.
నవతెలంగాణ-రాంచీ
స్వదేశంలో టెస్టు సిరీస్‌ వైట్‌వాష్‌ పరాజయంతో భారత జట్టు తీవ్ర ఒత్తిడిలో ఉంది. చీఫ్‌ కోచ్‌ గౌతం గంభీర్‌ అభిమానుల నుంచి తీవ్రస్థాయిలో వ్యతిరేకత ఎదుర్కొంటున్నాడు. ఈ సమయంలో సీనియర్‌ బ్యాటర్లు విరాట్‌ కోహ్లి, రోహిత్‌ శర్మలు వన్డే జట్టులోకి రాగా… భారత్‌ నేడు దక్షిణాఫ్రికాతో తొలి వన్డేలో పోటీపడనుంది. కోహ్లి, రోహిత్‌ మేనియా కోసం ఎదురుచూస్తున్న అభిమానులు.. వన్డే సిరీస్‌ విజయంతో సాంత్వన పొందాలని చూస్తున్నారు. ఇదే సమయంలో చారిత్రక టెస్టు సిరీస్‌ విజయంతో దక్షిణాఫ్రికా రెట్టించిన ఉత్సాహంతో కనిపిస్తోంది. తెంబ బవుమా సారథ్యంలో భారత్‌లో మరో సిరీస్‌ విజయాన్ని వేటాడేందుకు సఫారీలు సిద్ధమవుతున్నారు. రాంచీలో భారత్‌, దక్షిణాఫ్రికా తొలి వన్డే నేడు.
అయ్యర్‌ స్థానంలో ఎవరు?
ఆస్ట్రేలియా పర్యటనలో ఆడిన భారత వన్డే జట్టులో ఇద్దరు కీలక బ్యాటర్లు సఫారీ సిరీస్‌కు అందుబాటులో లేరు. కెప్టెన్‌ శుభ్‌మన్‌ గిల్‌, వైస్‌ కెప్టెన్‌ శ్రేయస్‌ అయ్యర్‌లు గాయాలతో ఈ సిరీస్‌కు దూరమయ్యారు. గిల్‌ మెడ నొప్పితో బాధపడుతుండగా.. అయ్యర్‌ ప్రాణాంతక ప్లీహంలో చీలిక గాయం నుంచి కోలుకుంటున్న సంగతి తెలిసిందే. శుభ్‌మన్‌ గిల్‌ స్థానంలో యువ బ్యాటర్‌ యశస్వి జైస్వాల్‌ తుది జట్టులో నిలువనున్నాడు. రోహిత్‌ శర్మతో కలిసి ఇన్నింగ్స్‌ను ఆరంభించనున్నాడు. మిడిల్‌ ఆర్డర్‌లో కీలక ఆటగాడు శ్రేయస్‌ అయ్యర్‌ స్థానం ఎవరు భర్తీ చేస్తారనే ప్రశ్నకు సమాధానం లభించటం లేదు. మిడిల్‌ ఆర్డర్‌లో తెలుగు తేజం తిలక్‌ వర్మకు తోడు రిషబ్‌ పంత్‌ రీ ఎంట్రీ ఇచ్చాడు.
టీ20 జట్టులో శ్రేయస్‌ అయ్యర్‌ స్థానం ఆక్రమించిన తిలక్‌ వర్మ.. వన్డే జట్టులోనూ ఆ స్థానంపై కన్నేశాడు. కానీ పునరాగమనంలో రిషబ్‌ పంత్‌ నేరుగా తుది జట్టులో నిలిచే అవకాశం మెండుగా కనిపిస్తోంది. కెఎల్‌ రాహుల్‌ కెప్టెన్‌గా వికెట్‌ కీపింగ్‌ బాధ్యతలు తనే తీసుకునే ఆలోచనలో ఉన్నాడు. దీంతో పంత్‌ స్పెషలిస్ట్‌ బ్యాటర్‌గా మిడిల్‌ ఆర్డర్‌లో రీ ఎంట్రీ ఇస్తాడా? లేదంటే తిలక్‌ వర్మ, రుతురాజ్‌ గైక్వాడ్‌లో ఒకరిని అయ్యర్‌ స్థానంలో ఆడిస్తారా అనేది తేలాల్సి ఉంది. బౌలింగ్‌ విభాగంలో జశ్‌ప్రీత్‌ బుమ్రా లేడు. దీంతో అర్ష్‌దీప్‌ సింగ్‌ వన్డే జట్టులో పేస్‌ బౌలింగ్‌ నాయకత్వం తీసుకోనున్నాడు. హర్షిత్‌ రానా, ప్రసిద్‌ కృష్ణ, నితీశ్‌ కుమార్‌ రెడ్డిలు ప్రసిద్‌ కృష్ణతో పేస్‌ బాధ్యతలు పంచుకోనున్నారు. వాషింగ్టన్‌ సుందర్‌, రవీంద్ర జడేజాలు స్పిన్‌ ఆల్‌రౌండర్లుగా ఆడనున్నారు. స్పెషలిస్ట్‌ స్పిన్నర్‌కు తుది జట్టులో చోటు దక్కే సూచనలు కనిపించటం లేదు.
జోరుమీదున్న సఫారీలు
దక్షిణాఫ్రికా ఆటగాళ్లు రెట్టించిన ఉత్సాహంలో ఉన్నారు. తెంబ బవుమా నాయకత్వం దక్షిణాఫ్రికాను సరికొత్త తీరాలకు చేర్చుతోంది. వన్డే రిటైర్‌మెంట్‌ వెనక్కి తీసుకున్న క్వింటన్‌ డికాక్‌.. బవుమాతో కలిసి ఓపెనర్‌గా రానున్నాడు. దక్షిణాఫ్రికా తరఫున విజయవంతమైన ఓపెనింగ్‌ జోడీల్లో బవుమా, డికాక్‌ ఒకటి. క్వింటన్‌ డికాక్‌కు సహజంగానే భారత్‌పై మంచి రికార్డుంది. అతడు అదే జోరు కొనసాగిస్తే రాంచీలో ఆతిథ్య జట్టు బౌలర్లకు తిప్పలు తప్పవు. ఎడెన్‌ మార్‌క్రామ్‌, మాథ్యూ, డెవాల్డ్‌ బ్రెవిస్‌, రూబిన్‌ హెర్మాన్‌లు జోరుమీదున్నారు. టెస్టులో చెలరేగిన మార్కో యాన్సెన్‌ వన్డేల్లోనూ సత్తా చాటేందుకు ఎదురుచూస్తున్నాడు. గాయంతో కగిసో రబాడ లేకపోవటం ఒక్కటే సఫారీలకు ప్రతికూలం. అయినా, కేశవ్‌ మహరాజ్‌, బర్గర్‌, లుంగిసాని ఎంగిడిలతో కూడిన బౌలింగ్‌ బృందం గట్టి సవాల్‌ విసిరేందుకు సిద్ధంగా ఉంది.
పిచ్‌, వాతావరణం
రాంచీలో ఇది కేవలం పదో వన్డే మ్యాచ్‌ మాత్రమే. గతంలో ఇక్కడ జరిగిన తొమ్మిది వన్డేల్లో ఒక్కసారి మాత్రమే 300 ప్లస్‌ పరుగులు నమోదయ్యాయి. 270-280 స్కోర్‌ను ఛేదించటం ఈ పిచ్‌పై అంత సులువు కాదు. పిచ్‌ నెమ్మదించటంతో పరుగుల వేట కష్టతరంగానే సాగుతుంది. స్పిన్నర్లకు ఈ పిచ్‌ నుంచి కాస్త ఎక్కువ సహకారం లభించనుంది. రాంచీలో ఈ సమయంలో మంచు ప్రభావం గణనీయంగా ఉంటుంది. మంచు ప్రభావం నేపథ్యంలో రెండో ఇన్నింగ్స్‌లో పరుగుల వేట కాస్త సులభతరం అవుతుంది. బౌలర్లకు బంతిపై పట్టు చిక్కటం కష్టంగా ఉండటంతో టాస్‌ నెగ్గిన జట్టు తొలుత బౌలింగ్‌ ఎంచుకునే వీలుంది. ఆదివారం రాంచీ వాతావరణం ఆహ్లాదకరంగా ఉండనుంది. ఎటువంటి వర్షం సూచనలు లేవు.
తుది జట్లు (అంచనా):
భారత్‌ : యశస్వి జైస్వాల్‌, రోహిత్‌ శర్మ, విరాట్‌ కోహ్లి, రిషబ్‌ పంత్‌, కెఎల్‌ రాహుల్‌ (కెప్టెన్‌, వికెట్‌ కీపర్‌), వాషింగ్టన్‌ సుందర్‌, రవీంద్ర జడేజా, నితీశ్‌ కుమార్‌ రెడ్డి, హర్షిత్‌ రానా, అర్ష్‌దీప్‌ సింగ్‌, ప్రసిద్‌ కృష్ణ.
దక్షిణాఫ్రికా : ఎడెన్‌ మార్‌క్రామ్‌, క్వింటన్‌ డికాక్‌ (వికెట్‌ కీపర్‌), తెంబ బవుమా (కెప్టెన్‌), మాథ్యూ బ్రీట్జ్కె, డెవాల్డ్‌ బ్రెవిస్‌, రూబిన్‌ హెర్మాన్‌, మార్కో యాన్సెన్‌, కార్బిన్‌ బాచ్‌, కేశవ్‌ మహరాజ్‌, నండ్రె బర్గర్‌, లుంగిసాని ఎంగిడి.
