దిత్వా తుపానులో 153 మంది మృతి
మరో 191 మంది గల్లంతు
కొలంబో : దిత్వా తుపాను కలగచేసిన బీభత్సం, విధ్వంసం నేపథ్యంలో శ్రీలంక అధ్యక్షుడు అనురా దిసనాయకె దేశంలో అత్యవసర పరిస్థితి ప్రకటించారు. తుపాను కారణంగా ఇప్పటివరకు 153 మంది మరణించారు. మరో 191 మంది ఆచూకీ తెలియరాలేదు. దేశవ్యాప్తంగా 5 లక్షల మందికి పైగా ప్రజలు తుపాను ప్రభావాన్ని ఎదుర్కొంటున్నారు. ఇప్పటివరకు 800 సహాయ శిబిరాలకు దాదాపు 80వేల మందిని తరలించారు. వేలాదిమంది పోలీసులు, నావికా సిబ్బంది,సైనిక బలగాలు ప్రజలకు ఆహారాన్ని పంపిణీ చేస్తున్నాయి.
బాధితులను సురక్షిత ప్రాంతాలకు తరలిస్తున్నాయి. గత దశాబ్ద కాలంలో ఇంతటి తీవ్రమైన వరదలను ఎన్నడూ చూడలేదని బాధితులు పేర్కొంటున్నారు. కొలంబోకి కేవలం 20కిలో మీటర్ల దూరంలో కూడా వరద పరిస్థితి భయంకరంగా వుంది. ఇళ్ళన్నీ నీట మునిగి, రాత్రంతా అంథకారంలో వుండాల్సి వచ్చిందని అధికారులు తెలిపారు. ఆదివారం కూడా కుండపోత వర్షాలు కురిసే అవకాశం వుందని వాతా వరణ శాఖ అధికారులు తెలిపారు. దీంతో వరద పరిస్థితి ఇంకా భయానకంగా మారవచ్చని భయపడుతున్నారు.
భారత్‌ చేయూత
ఆపరేషన్‌ సాగర్‌ బంధు కింద, శనివారం భారత్‌ దాదాపు 12 టన్నుల సహాయ సామాగ్రిని పంపించింది. 80 జాతీయ విపత్తు నిర్వహణా దళాలను తరలించింది. ఐఎన్‌ఎస్‌ విక్రాంత్‌లో రెండు చేతక్‌ హెలికాప్టర్లను మొహరించి వుంచింది. విమానా శ్రయంలో చిక్కుండిపో యిన ప్రయాణికులకు ఆహారం, నీరు సహా అన్ని రకాల సాయాన్ని భారత హై కమిషన్‌ కార్యాలయం అందచేసింది. తుపాను కారణంగా విమాన రాకపోకలకు అంతరాయం కలగడంతో మూడు రోజులుగా దాదాపు 300మంది భారతీ యులు కొలంబోలో చిక్కుకుపోయారు. బండారునాయకె అంతర్జాతీయ విమానాశ్రయంలో భారత ప్రభుత్వం ఎమర్జన్సీ హెల్ప్‌ డెస్క్‌ను ఏర్పాటు చేసింది.
తమిళనాడు వ్యాప్తంగా భారీ వర్షాలు
దిత్వా తుపాను నెమ్మదిగా తమిళనాడు తీరం వైపుగా కదులుతోంది. ఆదివారం తెల్లవారు జామునకు ఉత్తర తమిళనాడు-పుదుచ్చేరి దిశగా కదిలే అవకాశం వుంది. ఈ ప్రభావం కారణంగా, శనివారమంతా భారీగా వర్షాలు కురుస్తునే వున్నాయి. ఆదివారం కూడా ఇదే పరిస్థితి వుంటుందని వాతావరణ శాఖ అధికారులు అంచనా వేస్తున్నారు. ప్రభుత్వం అప్రమత్తంగా వుంది. 28 విపత్తు నిర్వహణా బృందాలను సన్నద్ధం చేసింది.
