ఏ గ్రామంలోనైనా ఎన్నికల ఖర్చుపైనే చర్చ..
నవతెలంగాణ – మల్హర్ రావు
ఏందిరాబై మీ ఊరి సర్పంచ్ పదవికి పోటీ బాగా ఉందంట గదా…అవు మల్లా ఏమను కుంటున్నావు…పోటీలో ఎందరు ఉన్నా ఇద్దరి మధ్యనే ప్రధాన పోటీ. ఒక్కో అభ్యర్థి చిన్న జిపిలకు రూ.5 నుంచి రూ.10 లక్షల వరకు, పెద్ద జిపిలకు రూ.20 నుంచి రూ.40 లక్షల వరకూ ఖర్చు పెడతా అంటున్నాడు…అగో గిదేంది మరి అంత ఖర్చా…అవురా మరి సర్పంచ్ సీటు అంటే అంత క్రేజీ ఉంది. ఎవరైనా పోటీలో దిగాలంటే కనీసం రూ. 30 లక్షలు జమ ఉంచుకోవాల్సిందే.. ఇది పంచాయతీలలో జరుగుతున్న చర్చ.
సర్పంచ్ గిరికి డిమాండ్..
పంచాయతీ ఎన్నికలు ప్రారంభం కావడంతో గ్రామాల్లో ఎలక్షన్స్ హీట్ పెరిగింది. గ్రామ పంచాయతీల్లో సర్పంచ్ పదవికి పోటీ చేసేవారు ఎంత ఖర్చుకైనా వెనుకాడటం లేదు. గ్రామ పంచాయతీ ఎన్నికల షెడ్యూల్ ను రాష్ట్ర ఎన్నికల సంఘం వెలువరించ డంతో ఎక్కడ చూసినా ఖర్చు పైనే చర్చ సాగుతుంది. ఎన్నికల్లో పోటీ చేసే అభ్యర్థులు ఎన్నికల సంఘానికి నామమాత్రం లెక్క చూపుతున్నా, క్షేత్ర స్థాయిలో మాత్రం భారీగా సామ్ము కుమ్మరించాల్సి వస్తుందని పలువురు అభిప్రాయపడుతున్నారు. సర్పంచ్ స్థానం ఏ సామాజిక వర్గానికి రిజర్వు చేసినా ఖర్చు విషయంలో మాత్రం అభ్యర్థులు వెనుకంజ వేయకపోవడం చూస్తుంటే పదవిపై ఉన్న వ్యామోహం అంతా ఇంతా కాదని స్పష్టమవుతుంది. ఎన్నికల సంఘానికి అభ్యర్థులు చూపే ఖర్చు క్రమ పద్ధతిలోనే ఉంటుంది. క్షేత్ర స్థాయిలో మాత్రం అభ్యర్థుల ఖర్చు అంచనాలను మించిపోతుంది. సర్పంచ్ పదవికి ఫుల్ డిమాండ్ ఉండటం దీనికి తోడుగా సర్పంచ్ పదవిపై మోజుతో జేబులు ఖాళీ చేసుకోవడానికి ఎంతో మంది అభ్యర్థులు ముందుకు వస్తున్నారని చెప్పవచ్చు.
