ఓట్‌ చోరీ, ఢిల్లీ పేలుళ్ల అంశాలను లేవనెత్తుతాం : ప్రమోద్‌ తివారి

న్యూఢిల్లీ : పార్లమెంట్‌ శీతాకాల సమావేశాల్లో ఓట్‌ చోరీ, ఢిల్లీ ఎర్రకోట పేలుళ్ల కేసులను లేవనెత్తుతున్నట్లు సీనియర్‌ కాంగ్రెస్‌ నేత ప్రమోద్‌ తివారి తెలిపారు. ఆదివారం కేంద్ర ప్రభుత్వం ఏర్పాటు చేసిన అఖిల పక్ష సమావేశానికి ముందు ఆయన మీడియాతో మాట్లాడారు. అధికార బిజెపి భారత ఎన్నికల సంఘం (ఈసీ)తో చురుగ్గా కలిసి ఓటు చోరికి పాల్పడుతోందని ఆగ్రహం వ్యక్తం చేశారు . ”ప్రజాస్వామ్యం హత్య చేయబడి”, కేవలం ఓటు చోరీ మాత్రమే కాకుండా ఓటు దోపిడీ జరుగుతోందని అన్నారు. ఎర్రకోట పేలుడు మరో సమస్య. ప్రధాని మోడీ విదేశాంగ విధానం గందరగోళంగా మారిందని అన్నారు. ఈ అంశాలన్నింటినీ పార్లమెంట్‌ సమావేశాల్లో లేవనెత్తుతామని ప్రమోద్‌ తివారి పేర్కొన్నారు.