ఆదాయాన్ని పెంచుతాం పేదలకు పంచుతాం
పారదర్శక విధానాలను జాతికి అంకితం చేస్తాం
మెరుగైన భవిష్యత్‌ కోసం రాష్ట్రాన్ని మూడు భాగాలుగా విభజించాం
కోర్‌..ప్యూర్‌.. రేర్‌లుగా తెలంగాణ
2047 నాటికి మూడు ట్రిలియన్‌ డాలర్ల ఆర్థిక వ్యవస్థే లక్ష్యం
ఇందుకోసం అన్ని రంగాల్లో ప్రత్యేక విధానాలు
అందరి భాగస్వామ్యంతో విజన్‌ డాక్యుమెంట్‌ : మీడియా సమావేశంలో సీఎం రేవంత్‌ రెడ్డి
‘తెలంగాణ రైజింగ్‌-2047 గ్లోబల్‌ సమ్మిట్‌’పై ఉన్నతస్థాయి సమీక్ష
మంత్రులతో కలిసి ఆహ్వాన పత్రిక ఆవిష్కరణ
నవతెలంగాణ బ్యూరో – హైదరాబాద్‌
‘మా దార్శనికతే మా ప్రణాళిక.. మా పాలసీల ద్వారా ఆదాయాన్ని పెంచుతాం, పేదలకు పంచుతాం…’ అని ముఖ్యమంత్రి ఎ.రేవంత్‌ రెడ్డి వ్యాఖ్యానించారు. తమ ప్రభుత్వం అధికారంలోకి వచ్చి రెండేండ్లు పూర్తవుతున్న సందర్భంగా పలు రంగాలపై రూపొందించిన పారదర్శక విధానాలను ఈనెల 8,9 తేదీల్లో నిర్వహించబోయే తెలంగాణ రైజింగ్‌ గ్లోబల్‌ సమ్మిట్‌ సందర్భంగా జాతికి అంకితం చేయబోతున్నామని ఆయన తెలిపారు. మెరుగైన భవిష్యత్‌ కోసం రాష్ట్రాన్ని కోర్‌, ప్యూర్‌, రేర్‌ అనే మూడు భాగాలుగా విభజించామని వెల్లడించారు. 2047 నాటికి మూడు ట్రిలియన్ల ఆర్థిక వ్యవస్థే లక్ష్యంగా అన్ని రంగాలకు ప్రత్యేక విధానాలను, విజన్‌ డాక్యుమెంట్‌ను రూపొందించామని చెప్పారు. వాటి రూపకల్పనలో అందరినీ భాగస్వాములను చేశామని వివరించారు. ‘తెలంగాణ రైజింగ్‌ విజన్‌ డాక్యుమెంట్‌ -2047’పై ఆదివారం హైదరాబాద్‌లోని సచివాలయంలో ముఖ్య మంత్రి ఉన్నతస్థాయి సమీక్షా సమావేశాన్ని నిర్వహించారు.
మంత్రులు ఉత్తమ్‌ కుమార్‌ రెడ్డి, శ్రీధర్‌బాబు, దామోదర రాజనర్సింహ, కొండా సురేఖ, జూపల్లి కృష్ణారావు, పొంగులేటి శ్రీనివాసరెడ్డి, అడ్లూరి లక్ష్మణ్‌ కుమార్‌, వాకిటి శ్రీహరి, పొన్నం ప్రభాకర్‌, అజహరుద్దీన్‌, రాష్ట్ర ప్రణాళికా సంఘం ఉపాధ్యక్షుడు డాక్టర్‌ జి.చిన్నారెడ్డి, ప్రభుత్వ సలహాదారులు కే.కేశవరావు, షబ్బీర్‌ అలీ, సుదర్శన్‌ రెడ్డి హాజరయ్యారు. ఇండియన్‌ స్కూల్‌ ఆఫ్‌ బిజినెస్‌ (ఐఎస్‌బీ)కి చెందిన ప్రొఫెసర్లు విజన్‌ డాక్యుమెంట్‌పై పవర్‌ పాయింట్‌ ప్రజంటేషన్‌ ఇచ్చారు. అనంతరం నిర్వహించిన మీడియా సమావేశంలో మంత్రులతో కలిసి సీఎం గ్లోబల్‌ సమ్మిట్‌కు సంబంధించిన ఆహ్వాన పత్రికను ఆవిష్కరించారు. ఈ సందర్భంగా ముఖ్యమంత్రి మాట్లాడుతూ… గ్లోబల్‌ సమ్మిట్‌ను ఘనంగా నిర్వహించటం ద్వారా బడా పెట్టుబడులను ఆకర్షిస్తామని, తద్వారా రాష్ట్రాన్ని ఆర్థికంగా బలోపేతం చేస్తామని తెలిపారు. యువతకు ఉద్యోగ, ఉపాధి అవకాశాలు కల్పిస్తామని భరోసానిచ్చారు.
2034 నాటికి ఒక ట్రిలియన్‌, 2047 నాటికి మూడు ట్రిలియన్ల ఆర్థిక వ్యవస్థే లక్ష్యంగా తమ ప్రభుత్వం పని చేస్తోందని చెప్పారు. ఇందుకోసం రూపొందించిన ప్రత్యేక పాలసీలను చూసిన వారెవరైనా.. తెలంగాణలో పెట్టుబడులు పెట్టకపోతే ఏదో కోల్పోయామని భావించే విధంగా పరిస్థితిని కల్పిస్తామని వ్యాఖ్యానించారు. అభివృద్ధిలో పొరుగు రాష్ట్రాలతో కాదు..చైనా, జపాన్‌, జర్మనీ, దక్షిణ కొరియా, సింగపూర్‌లతో పోటీ పడతామని చెప్పారు. గతానుభవాల నుంచి నేర్చుకున్న పాఠాలను భవిష్యత్‌ ప్రణాళికగా మార్చుకుని రాష్ట్ర ప్రజలకు అద్భుతమైన భవిష్యత్తును అందిస్తామని సీఎం తెలిపారు. సంక్షేమ పథకాలను మరింత మెరుగ్గా అందిస్తామని అన్నారు. తెలంగాణ రైజింగ్‌ -2047-విజన్‌ డాక్యుమెంట్‌ రూపకల్పన కోసం వివిధ రంగాలకు చెందిన నిపుణులు, వివిధ శాఖల అధికారులు, ప్రజల భాగస్వామ్యంతో పాటు నిటి అయోగ్‌, ఐఎస్‌బీ సహకారం తీసుకున్నామని చెప్పారు.
పాలసీలంటే పారదర్శకంగా ఉండాలిగానీ వాటికి పెరాలసిస్‌ (పక్షవాతం) రాకూడదు, అలా వస్తే రాష్ట్రానికి నష్టదాయకమని హెచ్చరించారు. పాలసీ పెరాసిస్‌ వల్ల పెట్టుబడులకు రక్షణ కొరవడి, అభివృద్ధికి విఘాతం కలుగుతుందని ఆందోళన వ్యక్తం చేశారు. ఢిల్లీ, బెంగళూరు, ముంబై తదితర మెట్రో నగరాలు కాలుష్యం, శాంతిభద్రతల వంటి సమస్యలను ఎదుర్కొంటున్నాయని సీఎం గుర్తు చేశారు. భవిష్యత్తులో హైదరాబాద్‌కు, తెలంగాణకు అలాంటి సమస్యలు రాకుండా ఉండేందుకు విజన్‌ డాక్యుమెంట్‌లో పలు అంశాలు పొందుపరిచినట్టు ఆయన వివరించారు. తెలంగాణ భవిష్యత్‌ను మరింత మెరుగుపరచటం కోసం రాష్ట్రాన్ని మూడు భాగాలుగా విభజించామని ముఖ్యమంత్రి ఈ సందర్భంగా తెలిపారు. ఓఆర్‌ఆర్‌ లోపల ఉన్న ప్రాంతాన్ని కోర్‌ అర్బన్‌ రీజియన్‌ ఎకామని (క్యూర్‌)గాను, ఓఆర్‌ఆర్‌ నుంచి త్రిబుల్‌ ఆర్‌ వరకు ఉన్న ప్రాంతాన్ని ఫెరీ అర్బన్‌ రీజియన్‌ ఎకానమీ (ప్యూర్‌)గాను, త్రిబుల్‌ఆర్‌ అవతల నుంచి తెలంగాణ రాష్ట్ర సరిహద్దుల వరకు ఉన్న ప్రాంతాన్ని రూరల్‌ అగ్రి రీజియన్‌ ఎకామని (రేర్‌)గానూ విడగొట్టి, వాటికి అవసరమైన ప్రణాళికలను రూపొందినట్టు తెలిపారు.
క్యూర్‌ ప్రాంతాన్ని పూర్తిగా సర్వీస్‌ సెక్టార్‌గా మార్చి సంపూర్ణ కాలుష్యరహితంగా తీర్చిదిద్దుతామని వెల్లడించారు. ఇందుకనుగుణంగా పరిశ్రమలను ఓఆర్‌ఆర్‌ అవతలికి తరలిస్తున్నట్టు చెప్పారు. వరదల సమస్యను తగ్గించేందుకు ఈ ప్రాంతాన్ని ఒక యూనిట్‌ తీసుకుంటామని, మూసీ రివర్‌ ఫ్రంట్‌ డెవలప్‌మెంట్‌, మెట్రో విస్తరణ తదితర అభివృద్ధి పనులకు శ్రీకారం చుట్టనున్నామని వివరించారు. ఇప్పటికే కేంద్రం త్రిబుల్‌ఆర్‌తోపాటు, బుల్లెట్‌ ట్రైన్లకు సూత్రప్రాయంగా అంగీకరించిందని సీఎం చెప్పారు. ఒక ప్రాంత అభివృద్ధికి రవాణా కీలకమని, అందుకే రాష్ట్రంలో హైవే, పోర్ట్‌, ఎయిర్‌ కనెక్టివిటీని పెంచబోతున్నట్టు తెలిపారు. వరంగల్‌, ఆదిలాబాద్‌, కొత్తగూడెం, రామగుండంలలో నూతనంగా విమానాశ్రయాలు నిర్మించబోతున్నట్టు చెప్పారు. దీంతో ఇతర దేశాల నుంచి మన రాష్ట్రానికి దిగుమతులతోపాటు మన ఉత్పత్తులను ఇతర దేశాలకు ఎగుమతి చేసేందుకు వీలు కలుగుతుందని అన్నారు. ప్యూర్‌ పరిధి 360 కిలోమీటర్లు కాగా ఇక్కడ మెట్రోతోపాటు ఫార్మా తదితర కంపెనీల ఏర్పాటుకు అవకాశం కల్పిస్తామని చెప్పారు.
రూరల్‌ అగ్రికల్చర్‌ రీజియన్‌ ఎకామనీ (రేర్‌)లో భాగంగా గ్రామీణ ఆర్థిక వ్యవస్థను బలోపేతం చేస్తామని రేవంత్‌ రెడ్డి వివరించారు. ఇందుకోసం వ్యవసాయం, వ్యవసాయాధారిత పరిశ్రమలను ప్రోత్సహిస్తామని తెలిపారు. విత్తనాలు, కూరగాయలు, పండ్లు పండించటానికి అనువైన భూములు కలిగిన రాష్ట్రం మనదని విశ్లేషించారు. అందుకనుగుణంగా వ్యవసాయానికి అరుదైన పాలసీని ప్రకటించబోతున్నట్టు చెప్పారు. దేశ తొలి ప్రధాని జవహర్‌లాల్‌ నెహ్రూ తీసుకున్న విధానాలతో దేశంలో ఆకలి సమస్య తీరి, మిగులు ఉత్పత్తి స్థాయికి చేరామన్నారు. అయితే ప్రస్తుతం రాష్ట్రంలో పౌష్టికాహార సమస్య ఉందనీ, ప్రతీ పౌరుడికి నాణ్యమైన ఆహారాన్ని అందించాల్సి ఉందని తెలిపారు. అదే విధంగా విద్య అందరికి అందుబాటులోకి వచ్చిందనీ, ఇక నాణ్యమైన, సాంకేతిక విద్యను అందించాల్సిన తమపై ఉందని చెప్పారు. ఇందుకోసం విద్యావ్యవస్థను ప్రక్షాళన చేసి నాలెడ్జ్‌ హబ్‌గా తీర్చిదిద్దబోతున్నామని వెల్లడించారు. దేశ జీడీపీలో తెలంగాణ వాటా ఐదు ఉండగా, తాము అనుసరించబోయే విధానాల వల్ల భవిష్యత్తులో అది పది శాతానికి పెరుగుతుందనే ఆశాభావాన్ని ఆయన వ్యక్తం చేశారు.
