నేడు అతి భారీ వర్షాలు
విద్యాసంస్థలకు సెలవు
అమరావతి : నైరుతి బంగాళాఖాతంలో దిత్వా తుపాను కొనసాగుతోంది. ఉత్తర తమిళనాడు – పుదుచ్చేరి తీరాలకు సమాంతరంగా కదులుతూ ఆదివారం రాత్రికి తీవ్ర వాయుగుండంగా బలహీన పడిందని విపత్తుల నిర్వహణ సంస్థ పేర్కొంది. ప్రస్తుతం కారైకాల్‌కి 120 కిలోమీటర్లు, పుదుచ్చేరికి 90 కిలోమీటర్లు, చెన్నైకు 150 కిలోమీటర్లు దూరంలో కేంద్రీకృతమైంది. ఈ మేరకు ఆ సంస్థ ఎమ్‌డి ప్రఖర్‌జైన్‌ ఒక ప్రకటన విడుదల చేశారు. గడిచిన 6 గంటల్లో 5 కిలోమీటర్ల వేగంతో తుపాను కదులుతోందని, దీని ప్రభావంతో రాష్ట్ర వ్యాప్తంగా వర్షాలు పడే అవకాశం ఉందని తెలిపారు.
సోమవారం నాడు నెల్లూరు, తిరుపతి జిల్లాల్లో అతి భారీ వర్షాలు, అంబేద్కర్‌ కోనసీమ, పశ్చిమ గోదావరి, కృష్ణా, గుంటూరు, బాపట్ల, పల్నాడు, ప్రకాశం, వైఎస్‌ఆర్‌ కడప, అన్నమయ్య, చిత్తూరు జిల్లాల్లో అక్కడక్కడ ఒక మోస్తరు నుంచి భారీ వర్షాలు పడే అవకాశం ఉందన్నారు. కాకినాడ, తూర్పుగోదావరి, ఏలూరు, ఎన్‌టిఆర్‌, కర్నూలు, నంద్యాల, అనంతపురం, శ్రీసత్యసాయి జిల్లాల్లో తేలికపాటి నుంచి మోస్తరు వర్షాలు పడే అవకాశం ఉందని వెల్లడించారు. దక్షిణ కోస్తా తీరం వెంబడి గంటకు 45 నుంచి 65 కిలోమీటర్ల వేగంతో ఈదురుగాలులు వీచే అవకాశం ఉందని తెలిపారు. సముద్రం అలజడిగా ఉంటుందని, మత్స్యకారులు వేటకు వెళ్లరాదని హెచ్చరించారు.
కావలిలో 62.5 మిల్లీమీటర్ల వర్షపాతం
తుపాను ప్రభావంతో పలు ప్రాంతాల్లో ఆదివారం వర్షపాతాలు నమోదయ్యాయి. నెల్లూరు జిల్లా కావలిలో 62.5 మిల్లీమీటర్లు, నావూరులో 48, బుచ్చిరెడ్డిపాలెంలో 47, జలదంకిలో 36.2, తిరుపతి జిల్లా చిట్టమూరులో 30.7 మిల్లీమీటర్లు చొప్పున వర్షపాతాలు నమోదయ్యాయి.
తిరుపతి, నెల్లూరు జిల్లాల్లో విద్యా సంస్థలకు సెలవు
తిరుపతి, నెల్లూరు జిల్లాల్లో విద్యాసంస్థలకు జిల్లా కలెక్టర్లు సెలవు ప్రకటించారు. తిరుపతి జిల్లాలో ముసురు వాన కురుస్తోంది. తిరుమలలో మంచుదుప్పటి ముసురు వేసింది, చలికి యాత్రికులు గజగజలాడు తున్నారు. తిరుపతి జిల్లాలోని తీరప్రాంతాల వద్ద అధికారులు గట్టి నిఘా ఏర్పాటు చేశారు. జాలర్లు చేపల వేటకు వెళ్లొద్దని హెచ్చరికలు జారీ చేశారు. జిల్లాలోని విద్యాసంస్థలకు సోమవారం కలెక్టరు వెంకటేశ్వర్‌ సెలవు ప్రకటించారు.
నెల్లూరు జిల్లాలో చలి గాలులు
నెల్లూరు జిల్లాలో చలి గాలులు వీస్తున్నాయి. ఆదివారం జిల్లా వ్యాప్తంగా మోస్తరు వర్షపు జల్లులు పడ్డాయి. సోమవారం భారీ వర్షం ఉంటుందని వాతావరణ శాఖ హెచ్చరికలు జారీ చేసిన నేపథ్యంలో జెసి ఎం వెంకటేశ్లర్లు సోమవారం విద్యా సంస్థలకు సెలవు ప్రకటించారు. సోమవారం జరగాల్సిన ప్రజా సమస్యల పరిష్కార వేదికను కూడా రద్దు చేసినట్లు ఆయన తెలిపారు.
అవసరమైతే పునరావాసాలకు ప్రజలు దిత్వా తుపానుపై సమీక్షలో హోంమంత్రి అనిత
దిత్వా తుపాను నేపథ్యంలో జిల్లాల కలెక్టర్లు అన్ని రకాల ముందస్తు చర్యలు తీసుకోవాలని, అవసరమైతే ప్రజలను పునరావాస కేంద్రాలకు తరలించాలని హోంమంత్రి వంగలపూడి అనిత తెలిపారు. సచివాలయం ఆర్‌టిజిఎస్‌ నుంచి నెల్లూరు, తిరుపతి, వైఎస్‌ఆర్‌ కడప, చిత్తూరు, అన్నమయ్య జిల్లాల కలెక్టర్లతో ఆమె ఆదివారం వీడియో కాన్ఫరెన్స్‌ నిర్వహించారు. ఈ సందర్భంగా హోంమంత్రి అనిత మాట్లాడుతూ.. కంట్రోల్‌ రూమ్‌కు వచ్చే ప్రతి కాల్‌కు వెంటనే స్పందించాలన్నారు.
ప్రమాద ప్రదేశాల్లో అవాంఛనీయ సంఘటనలు జరగకుండా ఆయా ప్రాంతాల్లో అధికారులను నియమించాలని ఆదేశించారు. రెండు రోజులపాటు అధికారులు అప్రమత్తంగా ఉండాలన్నారు. క్షేత్రస్థాయిలో ప్రజలకు ఎప్పటికప్పుడు హెచ్చరికలు జారీ చేసి అప్రమత్తం చేయాలన్నారు. ప్రాణ నష్టం లేకుండా చూడాలన్నారు. రోడ్లపై పడిన చెట్టు కొమ్మలు, హోర్డింగ్స్‌ వంటి అడ్డంకులను వెంటనే తొలగించే చర్యలు చేపట్టాలన్నారు. విద్యుత్‌ అంతరాయం చోటుచేసుకుంటే వెంటనే పునరుద్ధరించాలన్నారు. సమీక్షా సమావేశంలో ఆర్‌టిజిఎస్‌ సెక్రటరీ కాటమనేని భాస్కర్‌, సిఇఒ ప్రఖర్‌జైన్‌, ఉన్నతాధికారులు పాల్గొన్నారు.
అధికారులు అప్రమత్తం : మంత్రి గొట్టిపాటి రవి
దిత్వా తుపాను నేపథ్యంలో అధికారులు అప్రమత్తంగా ఉండాలని ఇంధనశాఖ మంత్రి గొట్టిపాటి రవికుమార్‌ ఆదేశించారు. తుపాను ప్రభావిత ప్రాంతాలైన దక్షిణ కోస్తా, రాయలసీమ అధికారులతో ఆయన టెలీకాన్ఫరెన్స్‌ నిర్వహించారు. క్షేత్రస్థాయిలో విద్యుత్‌శాఖ అధికారులు అందుబాటులో ఉండాలని, విద్యుత్‌ సమస్యలు తలెత్తకుండా తగిన చర్యలు తీసుకోవాలని సూచించారు. క్షేత్రస్థాయిలో ఎక్కడైనా విద్యుత్‌ సరఫరాకు అంతరాయం ఏర్పడితే వెంటనే పునరుద్ధరించాలని తెలిపారు. గత అనుభవాల దృష్ట్యా ముందస్తు జాగ్రత్త చర్యలు చేపట్టాలని దిశానిర్దేశం చేశారు. పరిస్థితిని ఎప్పటికప్పుడు తనకు నివేదించాలని ఆదేశించారు.
