కార్మికుల శ్రమను కార్పొరేట్లకు కట్టబెట్టేందుకే..
ఐక్యంగా ఉద్యమించాలి : సెమినార్‌లో సీఐటీయూ రాష్ట్ర ఉపాధ్యక్షులు వీరయ్య
నవతెలంగాణ-రామచంద్రాపురం
లేబర్‌కోడ్‌లను రద్దు చేయకపోతే కార్మిక ఐక్యతతో కేంద్ర ప్రభుత్వాన్ని తరిమికొడతామని సీఐటీయూ రాష్ట్ర ఉపాధ్యక్షులు వీరయ్య అన్నారు. మెదక్‌ జిల్లా రామచంద్రాపురంలోని భెల్‌ టౌన్‌షిప్‌లో ఆదివారం సీఐటీయూ ఆధ్వర్యంలో లేబర్‌ కోడ్‌లపై సెమినార్‌ నిర్వహించారు. ఈ సందర్భంగా ఆయన మాట్లాడుతూ.. కార్పొరేట్లకు ఊడిగం చేస్తూ కార్మిక వర్గాన్ని బానిసలుగా చేసేలా ఉన్న నాలుగు లేబర్‌ కోడ్‌లను రద్దు చేయకపోతే కేంద్ర ప్రభుత్వం మెడలు వంచితీరుతామన్నారు. కార్మికులకు అన్యాయం చేస్తున్న మోడీ ప్రభుత్వానికి వ్యతిరేకంగా కార్మికవర్గం సంఘటితంగా పోరాటాలు చేయాలని చెప్పారు. దేశవ్యాప్తంగా కార్మికవర్గం పొట్టకొట్టేలా కార్మిక చట్టాలను రద్దుచేసి కార్పొరేట్లకు అనుకూలంగా నాలుగు లేబర్‌ కోడ్‌లు తీసుకురావడం దుర్మార్గమైన చర్య అని అన్నారు. లేబర్‌ కోడ్‌లు అమలైతే కార్మికవర్గం యాజమాన్యానికి కట్టు బానిసలుగా మారాల్సి వస్తుందని ఆందోళన వ్యక్తం చేశారు.
కార్మికులకు యూనియన్‌ పెట్టుకునే హక్కు, సమ్మె చేసే హక్కును కాదనడం రాజ్యాంగ స్ఫూర్తికి విరుద్ధమన్నారు. కార్మికులు యూనియన్‌ పెట్టుకోకుండా.. జీతభత్యాల కోసం, సదుపాయాల కోసం బేరసారాలు ఆడకుండా చేయడం అంటే అది పెట్టుబడిదారుల లాభాలను కాపాడటం తప్ప మరోటి కాదన్నారు. దేశవ్యాప్తంగా కార్మిక లోకం లేబర్‌ కోడ్‌ల రద్దు కోసం సమ్మె చేస్తుంటే ఆర్‌ఎస్‌ఎస్‌, బీఎంఎస్‌ లాంటి సంస్థలు, సంఘాలు మాత్రం రాజకీయం చేస్తున్నాయని విమర్శించారు. బీఎంఎస్‌ పాలక వర్గాలకు తొత్తుగా మారి కార్మికవర్గానికి తీరని అన్యాయం చేస్తోందన్నారు. రైతు వ్యతిరేక నల్ల చట్టాలపై పోరాడి మోడీ మెడలు వంచిన ఫలితంగానే అప్పుడు వెనక్కి తగ్గారని గుర్తు చేశారు. రాబోయే కాలంలో మరింత సమరశీలంగా పోరాడటం ద్వారానే లేబర్‌ కోడ్‌లను రద్దు చేసుకోగలమని చెప్పారు. ఈ కార్యక్రమంలో సీఐటీయూ జిల్లా కోశాధికారి కె.రాజయ్య, భేల్‌ నాయకులు పెంటయ్య, నాగులు, భాష, శ్రీనివాస్‌, రమేశ్‌ , ప్రభాకర్‌, వీరన్‌ రావు తదితరులు పాల్గొన్నారు.
