మోడీ సర్కారు చేస్తున్నది ఇదే
శ్రామికులకు పోరాటమే శరణ్యం
వ్యవసాయమార్కెట్ల సెక్యూరిటీగార్డులకు అండగా ఉంటాం : సీఐటీయూ రాష్ట్ర ప్రధాన కార్యదర్శి పాలడుగు భాస్కర్‌
సీఐటీయూ రాష్ట్ర కార్యాలయంలో వ్యవసాయ మార్కెట్‌ కమిటీల సెక్యూరిటీ గార్డుల యూనియన్‌ మహాసభ
నవతెలంగాణ బ్యూరో-హైదరాబాద్‌
మోడీ సర్కారు కార్పొరేట్లకు లాభాలు కట్టబెట్టే నిర్ణయాలు తీసుకుంటూ కార్మిక వర్గానికి తీవ్ర మోసం చేస్తున్నదనీ, తాము ఎన్నికల్లో గెలవడానికి సహకరిస్తున్న కార్పొరేట్లకు అండగా ఉంటామని మోడీ బహిరంగంగా చెబుతున్నారని సీఐటీయూ రాష్ట్ర ప్రధాన కార్యదర్శి పాలడుగు భాస్కర్‌ విమర్శించారు. ఆదివారం హైదరాబాద్‌ లోని సీఐటీయూ రాష్ట్ర కార్యాలయంలో తెలంగాణ వ్యవసాయ మార్కెట్‌ కమిటీల సెక్యూరిటీ గార్డుల యూనియన్‌ రాష్ట్ర మూడో మహాసభ ఆ యూనియన్‌ రాష్ట్ర అధ్యక్షులు సాంబయ్య అధ్యక్షతన జరిగింది. ఇటీవల మరణించిన ఆ యూనియన్‌ రాష్ట్ర నాయకులు ఎస్‌.కుమారస్వామికి మహాసభ నివాళి అర్పించింది. మహాసభనుద్దేశించి పాలడుగు భాస్కర్‌ మాట్లాడుతూ…వ్యవసాయ మార్కెట్ల సెక్యూరిటీ గార్డుల పట్ల గత బీఆర్‌ఎస్‌ ప్రభుత్వం దుర్మార్గంగా వహించిందనీ, తెలంగాణ వస్తే కార్మికుల బతుకులు బాగుపడుతాయనుకుంటే మరింత రోడ్డున పడ్డాయని తెలిపారు.
కాంగ్రెస్‌ ప్రభుత్వం అధికారంలోకి వచ్చి రెండేండ్లు కావస్తున్నా సెక్యూరిటీ గార్డుల వేతనాల పెంపునకు సంబంధించిన జీవోలను మాత్రం విడుదల చేయకుండా తొక్కిపెట్టిందని విమర్శించారు. ఏడేండ్లకోసారి కూడా సెక్యూరిటీగార్డులకు వేతనాలు పెంచకపోతే ఎట్లా అన్ని ప్రశ్నించారు. కేంద్ర, రాష్ట్ర ప్రభుత్వాలు కార్మికుల పట్ల వివక్ష చూపుతున్నాయన్నారు. పర్మినెంట్‌ ఉద్యోగాలు వద్దు ఔట్‌సోర్సింగ్‌, కాంట్రాక్టు, డైలీవేజ్‌ ఉద్యోగాలుండాలని కేంద్ర ప్రభుత్వం మాట్లాడటం దుర్మార్గమన్నారు. మోడీ సర్కారు ప్రపంచబ్యాంకు విధానాలను, కార్పొరేట్ల అనుకూల విధానాలను వేగంగా అమలు చేస్తున్న తీరును వివరించారు. కార్మికులను అణచివేసే కొద్దీ ప్రతిఘటన తీవ్రత పెరుగుతుందని హెచ్చరించారు.
శ్రీలంక, నేపాల్‌, బంగ్లాదేశ్‌లలో మాదిరిగానే ప్రజలు తిరగబడి మోడీ సర్కార్‌కు బుద్ధి చెప్పే రోజులు దగ్గర్లోనే ఉన్నాయన్నారు. జనవరి 15 తర్వాత లేబర్‌ కోడ్‌లకు వ్యతిరేకంగా సమరశంఖం పూరించబోతున్నామని తెలిపారు. కేంద్రం విధానాలను నిరసిస్తూ కార్మికులంతా పోరాటాలకు సన్నద్ధం కావాలని పిలుపునిచ్చారు. సెక్యూరిటీ గార్డుల పోరాటాలకు సీఐటీయూ అండగా ఉంటుందని హామీనిచ్చారు. ఆ యూనియన్‌ రాష్ట్ర ప్రధాన కార్యదర్శి ఎం.సోమన్న మాట్లాడుతూ..గతంలో సెక్యూరిటీ సర్వీసెస్‌ జీవో జారీ చేయడం వల్ల కనీస వేతనాలు వీడీఏను సెక్యూరిటీగార్డులు పొందారని గుర్తుచేశారు. ప్రస్తుతం జీవో నెంబర్‌ 60 ద్వారా రూ.15,600 వేతనం మాత్రమే ఇవ్వడం ద్వారా కుటుంబాల పోషణ కష్టంగా మారిందని వాపోయారు.
2021లో కార్మిక శాఖ సెక్యూరిటీ సర్వీసెస్‌ కనీస వేతనాల జీవోను జారీ చేయగా… యాజమాన్యాలు ఒత్తిడి తేవడంతో బీఆర్‌ఎస్‌ ప్రభుత్వం దాన్ని ఆపి కార్మికుల పొట్టగొట్టిందనీ, ఉన్న వేతనాన్ని తగ్గిస్తూ రూ.11,952గా నిర్ణయించడం దారుణమని విమర్శించారు. ఆ జీవో వచ్చి ఉంటే వ్యవసాయ మార్కెట్లలో పనిచేసే సెక్యూరిటీగార్డులకు కనీస వేతనం రూ. 27,434గా ఉండేదని గుర్తుచేశారు. ఏజెన్సీ వ్యవస్థను రద్దు చేసి మార్కెట్‌ కమిటీల ద్వారానే వేతనాలు చెల్లించేలా ప్రభుత్వంపై ఒత్తిడి తీసుకొస్తామన్నారు. వ్యవసాయ మార్కెట్ల సెక్యూరిటీ గార్డుల హక్కుల కోసం, వేతనాల పెంపు కోసం పోరాటాలను తీవ్రతరం చేస్తామని ప్రకటించారు. ఈ మహాసభలో ఆ యూనియన్‌ కోశాధికారి జనార్ధన్‌ సంతాప తీర్మానాన్ని ప్రకటించారు. మహాసభలో సీఐటీయూ రాష్ట్ర కార్యదర్శి శ్రీకాంత్‌, తెలంగాణ వ్యవసాయ మార్కెట్ల సెక్యూరిటీ గార్డుల యూనియన్‌ రాష్ట్ర వర్కింగ్‌ ప్రెసిడెంట్‌ రాములు, ఉపాధ్యక్షులు రామన్న, తదితరులు పాల్గొన్నారు.
