నేలపై విసిరేసి.. కాలుతో తన్ని..
జీడిమెట్లలోని ప్రయివేట్‌ పాఠశాలలో ఘటన
సోషల్‌ మీడియాలో వీడియో హల్‌చల్‌
నవతెలంగాణ – కుత్బుల్లాపూర్‌
నర్సరీ విద్యార్థిని పట్ల ప్రయివేటు పాఠశాల ఆయా అమానవీయంగా ప్రవర్తించింది. సాయంత్రం సమయంలో చిన్నారిని నేలపై విసిరేసి.. పిడిగుద్దులు గుద్దుతూ.. కాళ్లతో తంతూ తీవ్రంగా కొట్టింది. ఈ ఘటన హైదరాబాద్‌ జీడిమెట్ల పోలీస్‌ స్టేషన్‌ పరిధిలోని షాపూర్‌నగర్‌లో ఓ ప్రయివేట్‌ స్కూల్లో జరగ్గా.. ఆలస్యంగా వెలుగులోకొచ్చింది. ఇందుకు సంబంధించి వీడియో సోషల్‌ మీడియాలో హల్‌చల్‌ చేస్తోంది. షాపూర్‌నగర్‌లోని ప్రయివేటు స్కూల్లో ఓ చిన్నారి నర్సరీ చదువుతోంది. పాఠశాల ముగిసిన తర్వాత చిన్నారిని ఆయా ఇష్టారీతిన కొట్టింది. చిన్నారిపై కాలు వేసి తొక్కుతూ కర్కశంగా ప్రవర్తించింది.
ఆయా కొట్టినట్టు చిన్నారి చెప్పడంతో తల్లిదండ్రులు పాఠశాల యాజమాన్యానికి ఫిర్యాదు చేశారు. బాలికను తీవ్రంగా కొట్టడంతోపాటు కాలుతో తొక్కుతున్న దృశ్యాలను పాఠశాల పక్క భవనంపై నుంచి ఓ యువకుడు వీడియో తీశాడు. అది స్థానికంగా ఉన్న వాట్సప్‌ గ్రూప్‌లలో వైరల్‌ అయింది. ఆ వీడియో ఆధారంగా బాలిక తల్లిదండ్రులు ఆయాపై జీడిమెట్ల పోలీస్‌ స్టేషన్‌లో ఫిర్యాదు చేశారు. పోలీసులు ఆయాను అదుపులోకి తీసుకొని విచారిస్తున్నట్టు సమాచారం. తీవ్ర జ్వరంతో బాధపడుతున్న చిన్నారిని ఆస్పత్రిలో చేర్పించి చికిత్స అందిస్తున్నారు. ఈ ఘటనపై విద్యార్థి సంఘాలు, స్థానికులు ఆగ్రహం వ్యక్తం చేస్తున్నారు. ఇందుకు సంబంధించి పూర్తి వివరాలు తెలియాల్సి ఉంది.
