నవతెలంగాణ-హైదారాబాద్‌: ” మనం ఎవరినైనా ప్రేమిస్తే.. మనల్ని ఎవరైనా ప్రేమిస్తే.. మార్పు కచ్చితంగా జరుగుతుందని నేను నమ్ముతాను. ” అని హీరోయిన్‌ రష్మిక తన అభిప్రాయాన్ని వెలిబుచ్చారు. రష్మిక నటించిన ‘యానిమల్‌’ ఎంతటి విజయాన్ని సొంతం చేసుకుందో.. అదే స్థాయిలో విమర్శలు కూడా వచ్చాయి. తాజాగా రష్మిక ఓ ఇంటర్వ్యూలో మాట్లాడుతూ … తనకు ఆ సినిమాలో హీరో పాత్ర లాంటి వ్యక్తితో డేటింగ్ చేయడానికి అభ్యంతరం లేదన్నారు. ఆమె ప్రేమపై తన అభిప్రాయాన్ని కూడా పంచుకున్నారు. నిజ జీవితంలో ‘యానిమల్‌’లో హీరో పాత్ర స్వభావం ఉన్న వ్యక్తితో మీరు డేటింగ్ చేస్తారా ? అతడిలో మార్పు తీసుకురాగలరా ? అని అడిగిన ప్రశ్నకు రష్మిక ఆసక్తికర సమాధానమిచ్చారు.
” మనం ఎవరినైనా ప్రేమిస్తే.. మనల్ని ఎవరైనా ప్రేమిస్తే.. మార్పు కచ్చితంగా జరుగుతుందని నేను నమ్ముతాను. ఎందుకంటే భాగస్వామితో కలిసి ఉంటున్నప్పుడు వారితో కలిసి జీవితాన్ని పంచుకుంటున్నప్పుడు ఇద్దరి వ్యక్తిత్వాల్లో మార్పు వస్తుంది. ఒకరికి ఒకరు అభిప్రాయాలు పంచుకుంటారు. ఇష్టాయిష్టాలు తెలుసుకుంటారు. ఒకరి కోసం ఒకరు మారతారు. మీ ప్రాణ స్నేహితుడితో కాని, మీ భాగస్వామితోనే కాని కొంతకాలం కలిసి ప్రయాణించాక.. అకస్మాత్తుగా పాత రోజులను గుర్తుచేసుకుంటే వారి కోసం మీరు ఎంతలా మారారో అర్థమవుతుంది. ఆ మార్పునకు ఒక్కోసారి మీరే ఆశ్చర్యపోతారు ” అని చెప్పారు. తాను అర్థంచేసుకునే భాగస్వామి గురించి మాత్రమే మాట్లాడినట్లు తెలిపారు.
ప్రస్తుతం రష్మిక వరుస సినిమాలతో బిజీగా ఉన్నారు. ఆయుష్మాన్‌ ఖురానాతో కలిసి ‘థామా’ అనే హారర్‌ కామెడీలో నటిస్తున్నారు. దీనితో పాటు ‘ది గర్ల్‌ఫ్రెండ్‌’ మూవీకి సిద్ధమవుతున్నారు. తాజాగా ‘మైసా’ అనే చిత్రాన్ని కూడా ప్రకటించారు. అలాగే అట్లీ- అల్లు అర్జున్‌ల సినిమాలోనూ కనిపించనున్నారని సమాచారం.
