ఇరువైపులా పట్టూ విడుపుతో ఉండాలి

ఫెడరేషన్‌ చిన్న నిర్మాతల వైపు కూడా ఆలోచన చేయాలి
మా ప్రభుత్వం కార్మికుల పక్షాన ఉంటుంది
హైదరాబాద్‌ను ఫిల్మ్‌ హబ్‌గా తీర్చిదిద్దుతాం
– తెలంగాణ సినిమాటోగ్రఫీ మంత్రి కోమటిరెడ్డి వెంకటరెడ్డి
ప్రస్తుతం ఉన్న పరిస్థితుల్లో అటు నిర్మాతలు, ఇటు ఫెడరేషన్‌ సభ్యులు పట్టూ విడుపుతో వ్యవహరించాలి. పని చేస్తూనే డిమాండ్ల సాధనకు ఫెడరేషన్‌ కృషి చేయాలి. అంతే తప్ప షూటింగ్‌లు నిలిపివేయటం సరి కాదు. అలాగే చిన్న నిర్మాతల వైపు కూడా ఫెడరేషన్‌ సభ్యులు ఆలోచించాలి అని సినిమాటోగ్రఫీ శాఖ మంత్రి కోమటి రెడ్డి వెంకటరెడ్డి అన్నారు.
సోమవారం సచివాలయంలో సినీ నిర్మాతలు, వివిధ సినీ సంఘాల ప్రతినిధులతో చర్చించిన అనంతరం ఆయన మాట్లాడుతూ, ‘సినీ కార్మికుల సమస్యలను పరిష్కరిం చేందుకు ఒక కమిటీ ఏర్పాటు చేయనున్నాం. ఈ కమిటీ అన్ని పక్షాలతో చర్చలు జరిపి, సమస్యలను పరిష్కరించేలా చర్యలు తీసుకుంటుంది. బుధవారం నుండి షూటింగ్‌ పునఃప్రారంభ మవుతాయని ఆశిస్తున్నాను. సినిమా కార్మికుల సమస్యల పట్ల ప్రభుత్వం సానుభూతితో ఉంది. అదే సమయంలో సిని పరిశ్రమలో నెలకొన్న సమస్యలకు శాశ్వత పరిష్కారం చూపాలనే ఆలోచనతో ప్రభుత్వం కూడా ఉంది. అయితే సమ్మెకు వెళ్లడం సరైన మార్గం కాదు. ముఖ్యమంత్రి రేవంత్‌ రెడ్డి పేద సినీ కార్మికులకు ఇళ్లు ఇవ్వాలని, అలాగే మౌలిక సదుపాయాలు కల్పించి, వారి జీవన ప్రమాణాలను మెరుగుపరచాలన్న లక్ష్యంతో సానుకూలంగా ఉన్నారు. హైదరాబాద్‌ను గ్లోబల్‌ ఫిలిం హబ్‌గా అభివద్ధి చేయాలనేది ప్రభుత్వ లక్ష్యం. సినిమా, వినోద రంగంలో హైదరాబాద్‌ బ్రాండ్‌ ఇమేజ్‌ను కాపాడడానికి ప్రభుత్వం కట్టుబడి ఉంది. రాష్ట్రంలో ఎన్నో అందమైన ప్రదేశాలు ఉండటంతో అవి ఉత్తమ సినిమా షూటింగ్‌ లొకేషన్లుగా ఉపయోగించుకోవచ్చు. ఇది స్థానిక ప్రజలకు ఆదాయాన్ని కల్పించడమే కాకుండా ఉపాధి అవకాశాలు కూడా పెంచుతుంది’ అని చెప్పారు.