భిన్న ప్రేమకథ..

రష్మిక మందన్న, దీక్షిత్‌ శెట్టి జంటగా నటిస్తున్న సినిమా ‘ది గర్ల్‌ ఫ్రెండ్‌’. అల్లు అరవింద్‌ సమర్పణలో గీతా ఆర్ట్స్‌, ధీరజ్‌ మొగిలినేని ఎంటర్‌టైన్‌మెంట్‌ బ్యానర్స్‌ సంయుక్తంగా నిర్మిస్తున్నాయి.
రాహుల్‌ రవీంద్రన్‌ దర్శకుడు. ధీóరజ్‌ మొగిలినేని, విద్య కొప్పినీడి నిర్మాతలు. సరికొత్త ప్రేమ కథగా తెరకెక్కుతున్న ఈ సినిమా నవంబర్‌ 7న హిందీతో పాటు తెలుగు, తమిళ, మలయాళ, కన్నడ భాషల్లో రిలీజ్‌కు రాబోతోంది. శనివారం ఈ చిత్ర ట్రైలర్‌ రిలీజ్‌ ఈవెంట్‌ను గ్రాండ్‌గా నిర్వహించారు. డైరెక్టర్‌ రాహుల్‌ రవీంద్రన్‌ మాట్లాడుతూ,’రిలేషన్‌ షిప్‌ ట్రై చేయాలనుకునే వారు ఈ సినిమాకు బాగా కనెక్ట్‌ అవుతారు. ఇది రెగ్యులర్‌ ఫార్మేట్‌ లవ్‌ స్టోరీ కాదు’ అని అన్నారు. ‘ప్రతి ఒక్క ప్రేక్షకుడి మనసుకు హత్తుకునేలా మూవీ ఉంటుంది’ అని ప్రొడ్యూసర్‌ విద్యా కొప్పినీడి చెప్పారు. ప్రొడ్యూసర్‌ ధీరజ్‌ మొగిలినేని మాట్లాడుతూ,’రష్మిక లేకుంటే ఈ సినిమానే లేదు. దీక్షిత్‌ మాకు దొరికిన గొప్ప నటుడు.

వీళ్లిద్దరు తమ పర్‌ఫార్మెన్స్‌తో ఆకట్టుకుంటారు’ అని చెప్పారు. నిర్మాత బన్నీ వాస్‌ మాట్లాడుతూ’,తమ గర్ల్‌ఫ్రెండ్‌తో ఈ సినిమాకు వెళ్లే అబ్బాయిలు జాగ్రత్తగా ఉండండి’ అని అన్నారు. ‘రష్మికకు ఈ సినిమాతో బెస్ట్‌ యాక్టర్‌ అవార్డ్స్‌ వస్తాయి. ఈ సినిమా చూశాకే దీక్షిత్‌ ఎంత మంచి పర్‌ఫార్మర్‌ అనేది ఆడియెన్స్‌ తెలుసుకుంటారు’ అని నిర్మాత అల్లు అరవింద్‌ చెప్పారు. హీరో దీక్షిత్‌ శెట్టి మాట్లాడుతూ,”దసరా’ సినిమాలో సూరి క్యారెక్టర్‌ను మీరు ఎంతగా ఇష్టపడ్డారో, ఇందులో విక్రమ్‌ను అంతగా ఇష్టపడటంతో పాటు ద్వేషిస్తారు’ అని అన్నారు. ‘ఈ సినిమా కథ విన్నప్పుడు ఇలాంటి లవ్‌ స్టోరీని ఇప్పటిదాకా మనం చూడలేదు అనిపించింది. ఇందులో భూమా అనే పాత్రలో నటించాను. కేవలం బెస్ట్‌ ఫ్రెండ్స్‌ తోనే కొన్ని మన విషయాలు షేర్‌ చేసుకుంటాం. అలాంటి కంటెంట్‌ ఉన్న మూవీ ఇది’ అని హీరోయిన్‌ రష్మిక మందన్న చెప్పారు.