ఫెడరేషన్‌ నిర్ణయాన్ని నిర్మాతలందరూ ఏకగ్రీవంగా వ్యతిరేకిస్తున్నారు

30 శాతం వేతనాలను నిర్మాతలు పెంచితేనే సినీ కార్మికులు షూటింగ్‌లకు హాజరవుతారని ఫెడరేషన్‌ తీసుకున్న నిర్ణయాన్ని నిర్మాతలందరూ ఏకగ్రీవంగా వ్యతిరేకిస్తున్నారని ఫిల్మ్‌ ఛాంబర్‌ ఆఫ్‌ కామర్స్‌ గౌరవ కార్యదర్శి కె.ఎల్‌.దామోదర్‌ ప్రసాద్‌ అన్నారు. ఈ నేపథ్యంలో నిర్మాతలందరూ చర్చించిన విషయాలతోపాటు కొన్ని తీర్మానాలను ఆయన ఓ ప్రకటన ద్వారా తెలిపారు.
1) తెలుగు చలన చిత్ర పరిశ్రమ ఇప్పటికే చాలా ఇబ్బందికర పరిస్థితులలో ఉంది. ఇటువంటి సమయంలో వేతనాలు పెంచడం, అందులోనూ కార్మిక శాఖ కమీషనర్‌ మార్గదర్శకత్వంలో, సామరస్య పూర్వక పరిష్కారం కోసం చర్చలు జరుగుతున్న సందర్భంలో 30% వేతనాలు పెంచితేనే విధులకు వెళ్ళాలని ఫెడరేషన్‌ నిర్ణయించడం చాలా బాధకరం. ఇది నిజాయితీతో కూడిన చర్చల స్ఫూర్తిని దెబ్బ తీస్తుంది.
2) చిన్న నిర్మాతలు భరించలేని స్థాయిలో వేతనాలు పెంపును యూనియన్స్‌ డిమాండ్‌ చేయటం ఆమోదయోగ్యం కాదు. ప్రతి చిన్న నిర్మాత ఈ పెంపుదలకు వ్యతిరేకంగా ఉండడం గమనార్హం. అందువలన ప్రస్తుత పరిస్థితులలో భరించలేని ఈ పెంపును నిర్మాతలందరూ ఏకగ్రీవంగా వ్యతిరేకిస్తున్నారు. కనీస వేతనాల చట్టం ప్రకారం, కనీస వేతనాలు చెల్లించే ఏ కార్మికుడినైనా నియమించుకునే హక్కు నిర్మాతలకు ఉందని కార్మిక శాఖ కమిషనర్‌ స్పష్టం చేశారు. అదనంగా, కాంపిటీషన్‌ కమిషన్‌ ఆఫ్‌ ఇండియా (సీసీఐ) కూడా నిర్మాతల స్వయం ప్రతిపత్తిని సమర్థిస్తూ ఒక ఉత్తర్వును జారీ చేసింది. ఫెడరేషన్ల ఒత్తిడి, పోటీని నిరోధించే పద్ధతులను ఖండిస్తూ, అలాంటి నిబంధనలను అమలు చేయకుండా నిరోధించింది.
3) కాస్ట్‌ ఆఫ్‌ లివింగ్‌ విషయంలో మిగతా మెట్రోపాలిటన్‌ పట్టణాలతో పోలిస్తే మన హైదరాబాద్‌లో తక్కువ. అయినప్పటికీ మనం అన్ని యూని యన్ల వారికి ఎక్కువ వేతనాలు చెల్లిస్తున్నాం. ఇతర రాష్ట్రాల చలన చిత్ర పరిశ్రమలో ఇచ్చే వేతనాల కంటే మన దగ్గర పని చేసే కార్మికులకు అధిక వేతనాలు చెల్లింస్తున్నాం.
4) ఈ పరిస్థితుల నేపథ్యంలో తెలుగు ఫిలిం ఛాంబర్‌ ఏకగ్రీవంగా ఒక తీర్మానం చేసింది. దీని ప్రకారం ఎవరైతే నైౖపుణ్యం కలిగిన కార్మికులు నిర్మాతలు ఇచ్చే వేతనానికి పనిచేస్తారో, వారెవరైనప్పటికీ వాళ్ళు యూని యన్స్‌లో ఉన్నా లేకున్నా వాళ్ళతో షూటింగ్‌ చేసుకోవడానికి సిద్ధంగా ఉన్నారు. ఎంతోమంది ఔత్సాహిక నిపుణులు/కార్మికులు ఇండిస్టీలో పని చేయడానికి సిద్ధంగా ఉన్నప్పటికీ యూనియన్లలో సభ్యత్వం కోసం వారి దగ్గర్నుంచి లక్షలాది రూపాయలు డిమాండ్‌ చేస్తూ, వారి ప్రవేశానికి సదరు యూనియన్లు వారు అవరోధం కలిగిస్తున్నారు. ఇది ఎంతో మంది నైపుణ్యవంతులైన కార్మికుల పొట్ట కొట్టడమే. ప్రతి ప్రాజెక్టు అవసరాలు, వ్యక్తుల సామర్థ్యాల ఆధారంగా కార్మికులతో కలిసి పనిచేసే పూర్తి స్వేచ్ఛ నిర్మాతలకు ఉంటుంది.
5) ఎవరైనా ఔత్సాహిక నిపుణులు / కార్మికులు సినీ రంగంలో పనిచేయా లంటే వారితో పని చేయించుకోవడానికి నిర్మాతలందరూ ఏకగ్రీవంగా ఆమోదించడం జరిగినది. నైపుణ్యం ఉన్న కార్మికునికి పని కల్పించడమే మా ధ్యేయం. తెలుగు చలన చిత్ర వాణిజ్య మండలి పరిశ్రమలోని అనేక రంగాలలో పని చేసి కళాకారులు, సాంకేతిక నిపుణులు, ఇతర స్టేక్‌ హోల్డర్స్‌ ఉంటారు. వీరందరితో పని చేస్తూ ఒక సానుకూల నిర్ణయం వైపు మండలి పని చేస్తుంది.
6) నిర్మాత లేనిదే సినిమా పరిశ్రమ లేదు. మన ఫిలిం ఇండిస్టీ మనుగడ కోసం నిర్మాత శ్రేయస్సు అతి ముఖ్యమైన విషయం అని కార్మిక సంఘాలు మరొక్కసారి గుర్తించాలి.