గాజా, లెబనాన్‌, సిరియాలపై బాంబు దాడులు

49మంది మృతి
గాజా : అంతర్జాతీయ సమాజం నుండి తీవ్రంగా నిరసనలు ఎదురవుతున్నా పట్టించుకోకుండా గాజాపై తన మిలటరీ అపరేషన్‌ను కొనసాగిస్తున్న ఇజ్రాయిల్‌ తాజాగా లెబనాన్‌, సిరియాలపై కూడా బాంబు దాడులకు దిగింది. తూర్పు లెబనాన్‌లోని బెకా లోయలో శరణార్ధ శిబిరంపై జరిపిన వైమానిక దాడుల్లో 12మంది చనిపోయారు. మరో 8మంది గాయపడ్డారని లెబనాన్‌ మీడియా వర్గాలు పేర్కొన్నాయి. సిరియాలోని సువారుడా ప్రాంతంపై కూడా బాంబు దాడులు జరపగా ఏడుగురు సిరియన్లు మరణించారు. మంగళవారం నాటి దాడుల్లో గాజాలో 30మంది మరణించారు. ఉత్తర గాజాలోని 16 ప్రాంతాల్లో నివసిస్తున్న ప్రజలు తక్షణమే ఖాళీ చేసి వెళ్ళిపోవాలని ఇజ్రాయిల్‌ ఆర్మీ ఆదేశాలు జారీ చేసింది. మరోవైపు ఆక్రమిత వెస్ట్‌ బ్యాంక్‌లోని సెటిలర్లు బుర్ఖా గ్రామంలో పాలస్తీనియన్ల వాహనాలకు, వారి ఇండ్లకు నిప్పంటించారు. ఇజ్రాయిల్‌ పాల్పడుతున్న ఈ హింసకు తక్షణమే స్వస్తి పలకాలని కోరుతూ చర్చి నేతలు, 20కి పైగా దేశాల దౌత్యవేత్తలు తైబే పట్టణంలో సమావేశమయ్యారు. ఈ సమావేశం జరిగిన కొద్ది గంటలకే సెటిలర్ల హింస మొదలైంది.
ఇటీవలి వారాల్లో తూర్పు జెరూసలేంతో సహా ఆక్రమిత వెస్ట్‌ బ్యాంక్‌లో పాలస్తీనియన్లపై దాడులు, వేధింపులు, వారిని హత్య చేయడం వంటివి ఉధృతమయ్యాయని ఐక్యరాజ్య సమితి మానవ హక్కుల కార్యాలయం హెచ్చరించింది. ఇప్పటివరకు 964మంది పాలస్తీనియన్లు మరణించగా, దాదాపు మూడువేలకు పైగా ఇళ్ళను కూల్చివేశారు. గాజాలో ఆహార శిబిరాల వద్ద జరిగిన దాడుల్లో మరణించిన వారి సంఖ్య 875కి చేరుకుందని ఐక్యరాజ్య సమితి కార్యాలయం తెలిపింది. ప్రతి పదిమంది పిల్లల్లో ఒకరు పోషకాహార లోపంతో తీవ్రంగా బాధపడుతున్నారని యూఎన్‌ఆర్‌డబ్ల్యూఏ వెల్లడించింది. ఇదిలావుండగా, కాల్పుల విరమణకు ఉద్దేశించి జరుగుతున్న చర్చలు నిలిచిపోలేదని, జరుగుతున్నాయని, కానీ చాలా ప్రారంభ దశలో వున్నాయని కతార్‌ విదేశాంగ మంత్రిత్వ శాఖ తెలిపింది. రెండు పక్షాల ప్రతినిధి బృందాలు దోహాలోనే వున్నాయి.