కేరళలో సీపీఐ(ఎం)ఎమ్మెల్యే జమీలా కన్నుమూత

తిరువనంతపురం : కేరళలో కోయిలాండి నియోజకవర్గం సీపీఐ(ఎం) ఎమ్మెల్యే కనాతిల్‌ జమీలా శనివారం రాత్రి కన్నుమూశారు. ఆమె వయస్సు 59 సంవత్సరాలు. కొంతకాలంగా ఆనారోగ్యంతో బాధపడుతున్న ఆమె కోజికోడ్‌ నగరంలోని ఆసుపత్రిలో చికిత్స పొందుతూ మరణించారు. తలక్కులత్తూరుకు చెందిన జమీలాకు భర్త కనాతిల్‌ అబ్దుల్‌ రహ్మాన్‌, కుమారుడు ఐరీజ్‌, కుమార్తె అనూజ ఉన్నారు. జమీలా 1966న జిల్లాలోని కుట్టియాడిలో మే 5న జన్మించారు. కుట్టియాడిలోని ప్రభుత్వ ఉన్నత పాఠశాలలో విద్యార్థి సంఘ ఎన్నికల్లో కెఎస్‌యు అభ్యర్థిపై పోటీ చేయడం ద్వారా ఉద్యమాల్లోకి వచ్చారు. నాటి ఎన్నికల్లో ఆమె ఓడిపోయినప్పటికీ..ఆ తర్వాత 1995లో తలక్కులత్తూర్‌ గ్రామ పంచాయతీకి పోటీ చేసి విజయం సాధించి పంచాయతీ అధ్యక్షురాలిగా కూడా నియమితులయ్యారు.