‘డిస్కవర్‌ ఆంధ్ర’ టైటిల్‌, గ్లింప్స్‌ రిలీజ్‌

ఆంధ్రప్రదేశ్‌ ఫారెస్ట్‌ డిపార్ట్మెంట్‌, ఏపీ ఉప ముఖ్యమంత్రి పవన్‌ కళ్యాణ్‌ సహకారంతో నవదీప్‌ పల్లపొలి, సాయి దుర్గ తేజ్‌ సారథ్యంలో శ్రీకాంత్‌ మన్నె పురి ‘డిస్కవర్‌ ఆంధ్ర’ డాక్యుమెంటరీని తెరకెక్కించారు. ఈ ప్రాజెక్ట్‌ని పడాల సురేందర్‌ రెడ్డి, శ్రావ్య కూనం సంయుక్తంగా నిర్మిస్తున్నారు. దీని టైటిల్‌, గ్లింప్స్‌ లాంచ్‌ ఈవెంట్‌ని శనివారం ఘనంగా నిర్వహించారు. సాయి దుర్గ తేజ్‌ మాట్లాడుతూ, ‘ఆంధ్రను ఇంత అద్భుతంగా చూపిస్తున్న శ్రీకాంత్‌కి థ్యాంక్స్‌. మన చుట్టూనే ఇన్ని అద్భుతాలు ఉన్నాయా? అని అందరూ ఆశ్చర్యపోతారు. మన చుట్టూ ఉన్న ఈ వైల్డ్‌ లైఫ్‌ను కాపాడుకోవాల్సిన బాధ్యత మనదే. మన కల్చర్‌, మన నేచర్‌ను మనమే కాపాడుకోవాలి. శ్రీకాంత్‌కు పెద్ద విజయం దక్కాలి. మణిశర్మ ఈ ప్రాజెక్ట్‌కి సపోర్ట్‌ చేయడం ఆనందంగా ఉంది’ అని తెలిపారు.
‘శ్రీకాంత్‌ తీసిన డాక్యుమెంటరీని నాకు చూపించారు.

అదంతా ఏపీలో తీసింది అని చెప్పడంతో షాక్‌ అయ్యాను. ఆంధ్రలో ఉన్న వైల్డ్‌ లైఫ్‌ను ఎక్స్‌ప్లోర్‌ చేయాలని శ్రీకాంత్‌ కంకణం కట్టుకున్నాడు. తెలుగు జాతి గర్వపడేలా ఆంధ్రలోని అద్భుతాల్ని 72 నిమిషాల నిడివితో అద్భుతమైన డాక్యుమెంటరీగా చూపించబోతున్నారు’ అని నవదీప్‌ అన్నారు. శ్రీకాంత్‌ మన్నెపూరి మాట్లాడుతూ ,’ఆంధ్రలో ఎన్నో అద్భుతాలున్నాయి. మన దగ్గర ఉన్న వాటి గురించి అవగాహన కల్పించాలనే ఉద్దేశంతోనే ఈ ప్రాజెక్ట్‌ చేయాలని అనుకున్నాను. వైల్డ్‌ లైఫ్‌ అంటే ఆంధ్ర అనేది గుర్తుకు రావాలని అనుకుంటున్నాను. ఇప్పుడు మీకు కేవలం టైటిల్‌, గ్లింప్స్‌ మాత్రమే చూపించాం. త్వరలోనే ట్రైలర్‌తో అందరినీ కట్టి పడేస్తాం. మాకు ఈ ప్రయాణంలో సహకరించిన పవన్‌ కళ్యాణ్‌కి, నవదీప్‌కి, సాయి దుర్గ తేజ్‌కి థ్యాంక్స్‌. మ్యూజిక్‌ ఇచ్చి సపోర్ట్‌ చేసిన మణిశర్మ మనస్ఫూర్తిగా కృతజ్ఞతలు’ అని తెలిపారు.