నేటి నుంచి జిల్లాల వారీగా సంబురాలు

డిప్యూటీ సీఎం మల్లు భట్టి విక్రమార్క

నవతెలంగాణ బ్యూరో – హైదరాబాద్‌
కాంగ్రెస్‌ ప్రభుత్వం అధికారంలోకి వచ్చి రెండేండ్లైన సందర్భంగా డిసెంబర్‌ 1 నుంచి జిల్లాల వారీగా సంబురాలు ప్రారంభమవుతాయని డిప్యూటీ సీఎం మల్లు భట్టి విక్రమార్క తెలిపారు. ఆదివారం ఆయన సచివాలయంలో మీడియా సమావేశంలో జిల్లాల వారీగా జరిగే సంబురాలు వివరాలను వెల్లడించారు. సోమవారం నుంచి ప్రతి రోజు మధ్యాహ్నం 2 గంటల నుంచి 4 గంటల వరకు ప్రతి రోజు ఒక ఉమ్మడి జిల్లాలో జరుగుతాయని తెలిపారు. 1వ తేదీన మక్తల్‌, 2న కొత్తగూడెం, 3న హుస్నాబాద్‌, 4న ఆదిలాబాద్‌, 5న నర్సంపేట, 6న దేవరకొండ సభలు నిర్వహించనున్నట్టు తెలిపారు. 7న ఉస్మానియాలో సంబురాలు నిర్వహించి అభివద్ధి కార్యక్రమాలకు సీఎం రేవంత్‌ రెడ్డి శంకుస్థాపన చేస్తారు. 8న గ్లోబల్‌ సమ్మిట్‌ లో రెండేండ్ల పాటు ప్రజల కోసం ఏం చేశామో వివరిస్తామనీ, 9న తెలంగాణ భవిష్యత్తు ప్రణాళిక విజన్‌ డాక్యుమెంట్‌ను విడుదల చేస్తామని తెలిపారు.

ఆ తర్వాత 10, 11, 12 తేదీల్లో కూడా డాక్యుమెంట్‌తో పాటు వివిధ స్టాల్స్‌ను ప్రజంలదంరూ చూసేందుకు అవకాశం కల్పించినున్నట్టు భట్టి తెలిపారు. ఫుల్‌బాల్‌ దిగ్గజ ఆటగాడు లియోనల్‌ మెస్సీ 13న హైదరాబాద్‌ ఉప్పల్‌ స్టేడియంలో ఫుట్‌బాల్‌ మ్యాచ్‌ ఆడుతారనీ, తెలంగాణ విజన్‌ను అక్కడ ఆవిష్కరిస్తామని తెలిపారు. మంత్రి శ్రీధర్‌బాబు మాట్లాడుతూ భారీ కసరత్తు తర్వాత విజన్‌ డాక్యుమెంట్‌ను ఆవిష్కరించుకోబోతున్నామని తెలిపారు. ఇందుకోసం అన్ని శాఖల అధికారులు, వివిధ రంగాల నిపుణులు, మేధావులతో 70 సమావేశాలు నిర్వహించినట్టు చెప్పారు. నిటి అయోగ్‌ డాక్యుమెంట్‌ నుంచి సలహాలు, సూచనలు స్వీకరించినట్టు వెల్లడించారు. ప్రజాభిప్రాయాలను సలహాలను, సూచనలను ఆహ్వానించగా రాష్ట్ర జనాభాలో ఒక శాతం అంటే 4 లక్షల మంది స్పందించినట్టు తెలిపారు. వీటన్నింటిని క్రోఢకీరించి సీఎం రేవంత్‌ రెడ్డి సమీక్షించి నిర్ణయాలు తీసుకున్నారని తెలిపారు.