అసెంబ్లీ స్పీకర్‌ను కలిసిన జర్మనీ అధికార పార్టీ బృందం

శాసనసభ పనితీరుపై అధ్యయనం
నవతెలంగాణ ప్రత్యేక ప్రతినిధి-హైదరాబాద్‌
తెలంగాణ రాష్ట్ర శాసనసభాపతి గడ్డం ప్రసాద్‌కుమార్‌ను అసెంబ్లీ భవనంలో జర్మనీ దేశ అధికార సోషల్‌ డెమొక్రటిక్‌ పార్టీ (ఎస్‌డీపీ) ప్రతినిధుల బృందం శుక్రవారం మర్యాదపూర్వకంగా కలిసింది. తెలంగాణ రాష్ట్ర పర్యటనకు విచ్చేసిన జర్మనీ ఎస్‌డీపీ సెక్రెటరీ జనరల్‌ సబీనా ఫెండరీచ్‌, ఆసియా- పసిఫిక్‌ హెడ్‌ మైక్రో గుంథర్‌, ఇండియా డైరెక్టర్‌ క్రిస్టోప్‌ పి మోర్‌, భువనగిరి పార్లమెంట్‌ సభ్యులు చామల కిరణ్‌కుమార్‌రెడ్డి, శాసనసభ కార్యదర్శి డాక్టర్‌ వి. నరసింహాచార్యులు, అధికారులు ఈ మర్యాదపూర్వక సమావేశంలో పాల్గొన్నారు. ఈసందర్భంగా స్పీకర్‌ ప్రసాద్‌కుమార్‌ మాట్లాడుతూ తెలంగాణ రాష్ట్రం 2014లో నూతనంగా ఏర్పడిందని జర్మన్‌ బృందానికి తెలియజేశారు.

తెలంగాణ రాష్ట్రంలో శాసనసభ, శాసనమండలి ఉన్నాయని, శాసనసభలో 119 మంది, శాసనమండలిలో 40 మంది సభ్యులు ఉన్నారని వివరించారు. శాసనసభ సభ్యులను ఎన్నికల ద్వారా ప్రజలు నేరుగా ఎన్నుకుంటారని తెలిపారు. రాష్ట్ర ముఖ్యమంత్రి రేవంత్‌రెడ్డి నాయకత్వంలోని తెలంగాణ రాష్ట్రం అన్ని రంగాల్లో అభివద్ధిలో ముందున్నదని గుర్తుచేశారు. రాష్ట్రంలో పెట్టుబడులకు మంచి అవకాశం ఉండడంతో విదేశీ పెట్టుబడులను ప్రోత్సహిస్తున్నదని వివరించారు. ఈ సందర్భంగా జర్మనీ బృంద సభ్యులకు పుష్పగుచ్ఛం అందించి శాలువాతో సత్కరించారు.