– వైద్య శిబిరాలను సద్వినియోగం చేసుకోండి
– శిక్షణా కలెక్టర్ సౌరభ్ శర్మ
నవతెలంగాణ – అశ్వారావుపేట
ప్రజారోగ్యంపై ప్రభుత్వం ప్రత్యేక దృష్టి సారించింది అని,ఇందుకోసం నిర్వహించే వైద్య శిబిరాలను సద్వినియోగం చేసుకోవాలని ట్రైనీ కలెక్టర్ సౌరభ్ శర్మ పిలుపునిచ్చారు. తలసేమియా వ్యాధి బారిన పడకుండా ప్రజలకు జిల్లా వ్యాప్తంగా అవగాహన సదస్సులు,తలసేమియా పరీక్షలను నిర్వహించి, తలసేమియా లక్షణాలు కలిగి ఉన్న వ్యక్తులకు కౌన్సిలింగ్ నిర్వహించి తీసుకోవాల్సిన జాగ్రత్తలు పై అవగాహన కల్పిస్తాం అన్నారు.
బ్లడ్ వారియర్ ఫౌండేషన్ సౌజన్యంతో అశ్వారావుపేట ప్రభుత్వ జూనియర్ కళాశాల ఎన్ఎస్ఎస్ ఆద్వర్యంలో జిల్లా వైద్యశాఖ సహకారంతో తలసేమియా వ్యాధిపై అవగాహన సదస్సును స్థానిక ప్రభుత్వ జూనియర్ కళాశాల లో శనివారం నిర్వహించారు. ప్రిన్సిపాల్ అల్లు అనిత అధ్యక్షతన నిర్వహించిన కార్యక్రమంలో ఆయన ముఖ్య అతిథిగా పాల్గొన్నారు. ఈ సందర్భంగా ప్రిన్సిపాల్ అనిత మాట్లాడుతూ తలసేమియా అనేది పిల్లలను రక్తహీనతకు గురి చేస్తుందని దానిని ముందుగానే గుర్తించి వైద్యం పొందినట్లయితే కొంతవరకు దాని ప్రభావాన్ని తగ్గించవచ్చని తెలిపారు.
బ్లడ్ వారియర్ ఫౌండర్ సందీప్ మాట్లాడుతూ తలసేమియా వ్యాధి ఉన్న తల్లిదండ్రులకు పుట్టే పిల్లలకు తలసేమియా వ్యాధి రావటానికి ఎక్కువ అవకాశాలు ఉన్నాయని, తలసేమియా ను నివారించాలంటే వివాహానికి ముందే ముందే అమ్మాయి – అబ్బాయి పరీక్షలు చేసుకుంటే తలసేమియా లేదని నిర్ధారించుకుని వివాహం చేసుకోవటం ద్వారా నివారించవచ్చును అని తెలిపారు.విద్యార్థులు అందరూ మీ గ్రామాలలో తలసేమియాపై అవగాహన కల్పించాలని సూచించారు. అనంతరం విద్యార్ధులకు హైద్రాబాద్ కు చెందిన కపాడియా లాబ్,సీసీఎంబీ బృందం విద్యార్థులకు తలసేమియా పరీక్షలు నిర్వహించారు.
ఈ కార్యక్రమంలో బ్లడ్ వారియర్ ఫౌండేషన్ ఫౌండర్ కృష్ణ వంశీ,సీసీఎంబీ బాధ్యులు డాక్టర్ వివేక్, పుణ్య శ్రీ,,కళాశాల ఎన్ఎస్ఎస్ ప్రోగ్రాం ఆఫీసర్ డేగల నరసింహారావు, అధ్యాపకులు, విద్యార్థులు పాల్గొన్నారు.
నారాయణపురం…
రైతు వేదికలో దమ్మపేట,పట్వారిగూడెం, అశ్వారావుపేట,గుమ్మడవల్లి, మంగపేట ప్రాంతాలకు చెందిన సికిల్ సెల్ పాజిటివ్ పిల్లల కోసం ఆరోగ్య పరిరక్షణ కోసం శనివారం వైద్యశిబిరం నిర్వహించారు. ఈ శిబిరాన్ని శిక్షణా కలెక్టర్ శౌరభ్ శర్మ లాంచనంగా ప్రారంభించారు. ఈ శిబిరంలో హైద్రాబాద్ నిమ్స్ ఆసుపత్రి పిల్లల వ్యాధుల వైద్యనిపుణులు సికిల్ సెల్ వ్యాధితో బాధపడుతున్న పిల్లలను పరీక్షించి,అవసరమైన చికిత్స అందించారు.
అలాగే సీసీఎంబీ బృందం జెనెటిక్ (వారసత్వ) వ్యాధుల గురించి పిల్లలకు, వారి తల్లిదండ్రులకు సలహాలు అందించారు. ఇందులో జన్యు సంబంధిత పరిశీలన కోసం మొత్తం 282 రక్త నమూనాలు సేకరించారు. ఈ కార్యక్రమంలో జిల్లా ప్రోగ్రామ్ ఆఫీసర్ డాక్టర్ మధు వరన్,ఆయా పీహెచ్ సీ ల వైద్యాధికారులు,ఏఎన్ఎం,ఎంఎల్ హెచ్ పీ లు, హెల్త్ అసిస్టెంట్లు పాల్గొన్నారు.
