ఆరోగ్య రక్షణలో కొత్త అధ్యాయం: హోంగార్డులకు భీమా అవగాహన
జిల్లా ఎస్పీ రావుల గిరిధర్
హోంగార్డుల సంక్షేమంపై ప్రత్యేక సమీక్షా సమావేశం
నవతెలంగాణ – వనపర్తి
చిన్న అనారోగ్య సమస్యలు కూడా పెద్ద భారంగా మారకుండా భీమా అవసరమని, హోంగార్డుల ఆరోగ్యం, ఆర్థిక భద్రత కోసం ఆరోగ్య భీమా ఎంతో కీలకమని జిల్లా ఎస్పీ రావుల గిరిధర్ అన్నారు. ఆరోగ్య రక్షణలో హోంగార్డులకు భీమాతో కొత్త అధ్యాయం ప్రారంభించామని ఆయన పేర్కొన్నారు. జిల్లా పోలీసు కార్యాలయంలో శనివారం నిర్వహించిన ప్రత్యేక సమావేశంలో జిల్లా ఎస్పీ రావుల గిరిధర్ హోంగార్డుల సంక్షేమాన్ని దృష్టిలో ఉంచుకొని ఆరోగ్య బీమా పై అవగాహన కార్యక్రమాన్ని నిర్వహించారు. యాక్సిస్ బ్యాంక్ మేనేజర్ హెల్త్ ఇన్సూరెన్స్ పథకాల గురించి వివరించగా, పోలీసు కుటుంబాల ఆరోగ్య భద్రతను బలోపేతం చేసే మార్గాలపై ఎస్పీ ప్రతిపాదనలు చేశారు.
ఈ సందర్బంగా ఎస్పీ మాట్లాడుతూ.. పోలీసు వ్యవస్థలో అత్యంత ముఖ్య భూమిక పోషించే హోంగార్డులు ఆరోగ్యంగా, ఆర్థికంగా భద్రంగా ఉండటం మా మొదటి బాధ్యత అన్నారు. సేవలో నిమగ్నమయ్యే సమయంలో ఎలాంటి అనారోగ్య సమస్య వచ్చినా, ఆరోగ్య భీమా మీకు రక్షణ కవచంలా నిలుస్తుందన్నారు. చిన్న సమస్యలు పెద్ద భారం కాకుండా ముందుగానే భీమా తీసుకోవడం ద్వారా కుటుంబాల భవిష్యత్తు పదిలమవుతుందన్నారు. మీ ఆరోగ్యం – మీ కుటుంబ ఆనందమని, అందరికీ పూర్తి అవగాహనతో, నిర్భయంగా ఆరోగ్య భీమా తీసుకొని భద్రతను పెంపొందించుకోవాలని జిల్లా ఎస్పీ పేర్కొన్నారు. ఈ కార్యక్రమంలో రిజర్వ్ ఇన్స్పెక్టర్ అప్పలనాయుడు, బ్యాంక్ అధికారులు, హోంగార్డ్ సిబ్బంది, తదితరులు పాల్గొన్నారు.
