మానవ స్వభావం ఎలా ఏర్పడుతుంది? మనలోని లక్షణాలు, మన స్పందనలు, మన ఆలోచనలు – ఇవన్నీ జననంతోనే నిర్ణయించబడినవేనా? లేక జీవన అనుభవాల ప్రభావం వల్లే అవి రూపుదిద్దుకుంటాయా? ఈ ప్రశ్నలు ఒక సామాన్య పాఠకుడిని ఎంతగానో ఆలోచింపజేస్తాయి. కానీ ఒక గ్రామీణ వైద్యుడు మాత్రం ఈ ప్రశ్నలపై కేవలం ఆలోచించడమే కాకుండా, వాటికి శాస్త్రీయ సమాధానాలు వెతికే ప్రయత్నంలో ఒక రచనను వెలువరించడం నిజంగా గమనించదగిన విషయం. Dr. DSVR Prasad రాసిన “What Made You This Way?” అనే ఈ చిన్న పుస్తకం, ఆలోచనను ప్రేరేపించే అసాధారణ ప్రయోగం.
అతను వృత్తిరీత్యా వైద్యుడు. అర్థం చేసుకునే, అంచనా వేసే, శాస్త్రీయంగా పరిశీలించే అభ్యాసాన్ని మెడికల్ విద్యలో పొందిన ఆయన – అదే దృష్టితో “మనుషులు ఎందుకు ఇలా ప్రవర్తిస్తారు?” అనే ప్రశ్నను తనలో తనే వేసుకుంటూ, మనుషుల నడవడికలను శాస్త్రీయంగా పరిక్షించే ప్రయత్నం చేశారు. ఇది కేవలం తాత్వికత గల పుస్తకమైతే మనం మరోసారి ఆలోచించకుండా ముందుకు వెళ్లిపోయేవాళ్లమేమో. కానీ ఇందులో ఉన్న విషయాలన్నీ సన్నివేశాలుగా, వ్యక్తిగత అనుభవాలుగా, మరియు మనందరికీ తెలిసిన సంఘటనల పరంపరగా మన ముందుంచడంలో రచయిత ప్రత్యేకత కనిపిస్తుంది.
ఈ పుస్తకం Kindle లో మాత్రమే అందుబాటులో ఉంది. ఇది పెద్ద ప్రచురణ సంస్థలద్వారా విడుదలైన పుస్తకం కాదు. కానీ ఏ పెద్ద రచయితలో లేని స్వచ్ఛత, నిజాయితీ, పరిశీలన ఈ పుస్తకంలో ఉంది. రచయిత తన వృత్తిలో చూసిన అనేక పాత్రలను, వాస్తవిక సందర్భాలను ఒక రచయిత కళ్ళతో విశ్లేషించడంలో ఆయన చూపు స్పష్టంగా కనిపిస్తుంది. పాఠకునిగా ఇది చదవడం ఓ చిన్న ప్రయాణంలా అనిపిస్తుంది – మనల్ని మనలోనికే తీసుకువెళ్తుంది.
అందంగా అలంకరించిన పదాలు, ముత్యాల్లా మెరుస్తూ ఉండే పదబంధాలు ఇందులో ఉండకపోవచ్చు. కానీ తేలికైన భాషలో లోతైన విషయాలను వ్యక్తీకరించే శక్తి మాత్రం ప్రతి పేరాగ్రాఫ్ లో ఉంది. మానవ స్వభావం వెనుక ఉన్న బయాలజికల్, సైకాలజికల్, సామాజిక అంశాలను గొప్పగా కలిపి చదివేలా చేశారు. సైన్స్ అనే విషయాన్ని బోధించాలన్న తపన కూడా కనిపిస్తుంది, కానీ అది ఎక్కడా పాఠ్యపుస్తకాల మాదిరిగా రసరహితంగా మారదు.
ఈ రచనతో రచయిత ఒక కొత్త ప్రయోగం చేశారని చెప్పవచ్చు – తాను ఒక డాక్టర్ అయినా, ఒక మనిషిగా తాను ఎలా ఎదిగాడన్న దానిని అర్థం చేసుకోవాలనే కోరికతో ఈ రచన సాగిన తీరు మనకూ ఆ ఆత్మవిశ్లేషణ వైపు మళ్ళించగలదు. ఇది చదివిన తర్వాత, “నేను ఇలా ఎందుకు ఉన్నాను?” అనే ప్రశ్న మనం మనల్ని మనమే అడుక్కునే అవకాశం ఉంది.
ఇది అతని తొలి రచన. కానీ ఇందులో చూపిన ప్రామాణికత, స్పష్టత, మరియు పరిశీలనశక్తిని చూస్తే ఇది ఒక వ్యాసమాత్ర రచన కాదని, ఒక లోతైన రచయిత శక్తిని ప్రతిబింబించే ప్రయత్నమని చెప్పొచ్చు. Dr. DSVR Prasad వృత్తిపరంగా ఒక గ్రామీణ వైద్యుడైనా, ఆ గ్రామ జీవితాన్ని చూసే ఆయన కళ్లలో ఉన్న మానవతా దృష్టికోణం ఈ పుస్తకం ప్రతి పుటలో కనిపిస్తుంది.
ఇలాంటి రచనలు పెద్దవిగా కనిపించకపోవచ్చు. కానీ అవి మనలో పెద్ద మార్పును కలిగించగలవు. ఇది పుస్తకమో లేక మనసుని తడిపే ఓ ప్రశ్నల ధారవాహికమో అన్న అనుమానంతోనే చివరిది పేజీ మూసేయాల్సి వచ్చింది. కొంతకాలంగా మనం చదివిన రచనలన్నీ మనకు జ్ఞానం ఇవ్వాలని ప్రయత్నించాయి. కానీ ఈ పుస్తకం, జ్ఞానం కన్నా ముందు “అంతర్లీన అవగాహన” అనే విలువైన అంశాన్ని మనలో నాటింది
సృజన దుర్గే
