గ్లోబల్‌ సమ్మిట్‌లో ఇందిరా మహిళా శక్తి

ప్రధాన ఆకర్షణగా స్టాల్‌

నవతెలంగాణ బ్యూరో-హైదరాబాద్‌
ఫ్యూచర్‌ సిటిలో జరుగుతున్న తెలంగాణ రైజింగ్‌ గ్లోబల్‌ సమిట్‌-2047లో మహిళా సాధికారతకు ప్రతీకగా ఇందిరా మహిళా శక్తి స్టాల్‌ ప్రత్యేక ఆకర్షణగా నిలుస్తోంది. ప్రజాప్రభుత్వం మహిళల ఆర్థిక, సామాజిక అభ్యున్నతిని ప్రధాన లక్ష్యంగా తీసుకుని అమలు చేస్తున్న విధానాలకు ఈ స్టాల్‌ అద్దం పడుతోంది. మహిళా స్వయం సహాయక సంఘాల శక్తి, సాధికారత, వ్యాపార నైపుణ్యాలను జాతీయ, అంతర్జాతీయ ప్రతినిధుల ముందు సమగ్రంగా ప్రదర్శించే వేదికగా ఇందిరా మహిళా శక్తి స్టాల్‌ నిలుస్తోంది. పట్టణ పేదరిక నిర్మూలన సంస్ధ (సెర్ప్‌), తెలంగాణ మహిళా శిశు సంక్షేమ శాఖ సంయుక్తంగా ఏర్పాటు చేసిన ఈ స్టాల్‌లో, ఇందిరా మహిళా శక్తి కార్యక్రమం ద్వారా మహిళల ఆర్థిక బలోపేతానికి ప్రభుత్వం చేపట్టిన అనేక వినూత్న కార్యక్రమాల నమూనాలు ప్రదర్శిస్తున్నారు.

మహిళలే నిర్వహిస్తున్న ఇందిరా మహిళా శక్తి పెట్రోలు బంకు, హైటెక్‌ సిటీలో ఏర్పాటు చేసిన ఇందిరా మహిళా శక్తి బజార్‌, జిల్లాల్లో నిర్మితమైన ఇందిరా మహిళా శక్తి భవనాలు, క్యాంటిన్లు, ఆర్టీసీ అద్దె బస్సుల నిర్వహణ వంటి విభిన్న వ్యాపారాల్లో మహిళా స్వయం సహాయక సంఘాలు సాధించిన విజయాలు ఈ స్టాల్‌లో ప్రత్యేకంగా ఆకట్టుకుంటున్నాయి. రూ. వేల కోట్లను బ్యాంకింగ్‌ లింకేజ్‌ రుణాల ద్వారా మహిళా సంఘాలకు ఆర్థిక బలాన్ని అందించడం, రూ. వందల కోట్ల వడ్డీ చెల్లింపులతో మహిళలపై రుణభారాన్ని తగ్గించడం, సభ్యులకు రూ.10 లక్షల లోన్‌ బీమా, రూ.2 లక్షల ప్రమాద బీమా వంటి భద్రతా చర్యలు ప్రజా పాలన నిబద్ధతకు నిదర్శనంగా నిలుస్తున్నాయి. ఇప్పటికే 20కు పైగా విభిన్న వ్యాపార రంగాల్లో మహిళా స్వయం సహాయక సంఘాలను ప్రోత్సహిస్తూ, మహిళలను యజమానులుగా, నాయకులుగా తీర్చిదిద్దే దిశగా తెలంగాణ ప్రభుత్వం ముందుకెళుతోంది. తెలంగాణ రైజింగ్‌ గ్లోబల్‌ సమిట్‌-2047లో ఏర్పాటు చేసిన ఇందిరా మహిళా శక్తి స్టాల్‌, మహిళ ఉన్నతి తెలంగాణ ప్రగతి అన్న ప్రజా ప్రభుత్వ సంకల్పానికి ప్రతీకగా నిలిచి, దేశం ప్రపంచం దృష్టిని ఆకర్షిస్తోంది.