35 బొమ్మల దుకాణాలు దగ్ధం
రూ. కోటి నష్టం.. వీధిన పడిన కుటుంబాలు
నవతెలంగాణ – మల్యాల
జగిత్యాల జిల్లా మల్యాల మండలంలోని కొండగట్టులో భారీ అగ్నిప్రమాదం చోటుచేసుకుంది. శనివారం అర్ధరాత్రి దాటిన తరువాత ఓ బొమ్మల దుకాణంలో మంటలు చెలరేగాయి. వరుసగా దుకాణాలు ఉండటంతో మంటలు వేగంగా వ్యాపించాయి. సుమారు 35 దుకాణాలు పూర్తిగా కాలిపోయి రూ.కోటి వరకు ఆస్తినష్టం వాటిల్లింది. కొండగట్టు పెద్ద హనుమాన్‌ విగ్రహం వద్ద నుంచి జగిత్యాల-కరీంనగర్‌ హైవే వరకు షాపులు దగ్ధమైనట్టు అగ్నిమాపకదళం సిబ్బంది తెలిపింది. జగిత్యాల, ధర్మపురి, కరీంనగర్‌ నుంచి ఒక్కొక్కటి చొప్పున మూడు ఫైర్‌ ఇంజిన్‌లు వచ్చి మంటలు ఆర్పాయి. అగ్ని ప్రమాదం జరగడానికి గల కారణాలు తెలియలేదు. కాగా బాధితులు కట్టుబట్టలతో రోడ్డుపైకి చేరారు. కండ్లముందే దుకాణాలు దగ్ధం కావడంతో కన్నీరు మున్నీరుగా విలపించారు.
పరిశీలించిన మంత్రి, ఎమ్మెల్యే
మంత్రి అడ్లూరి లక్ష్మణ్‌కుమార్‌, చొప్పదండి ఎమ్మెల్యే మేడిపల్లి సత్యం, మాజీ మంత్రి జీవన్‌రెడ్డి ఆదివారం కొండగట్టులో పరిశీలించారు.బాధితులను ప్రభుత్వం తరుపున అన్ని విధాలుగా ఆదుకుంటామని ఎమ్మెల్యే సత్యం భరోసా ఇచ్చారు. బాధితులకు ప్రభుత్వం తక్షణసాయంగా రూ.20వేలు ఇస్తుందని తెలిపారు.
అధికారులు సకాలంలో స్పందించలేదు : మాజీ ఎమ్మెల్యే రవిశంకర్‌
చొప్పదండి మాజీ ఎమ్మెల్యే సుంకె రవిశంకర్‌ స్థానిక బీఆర్‌ఎస్‌ నాయకులతో కలిసి వెళ్లి బాధిత కుటుంబాలను ఓదార్చారు. అనంతరం ఆయన మాట్లాడుతూ.. అధికారులు సకాలంలో స్పందిస్తే భారీ ఎత్తున ఆస్తి నష్టం జరిగేది కాదన్నారు. బాధితులు రానున్న సమ్మక్క సారక్క జాతరను పురస్కరించుకొని సుమారు మూడు నుంచి నాలుగు లక్షల వరకు సామగ్రిని కొనుగోలు చేసుకుని పెట్టుకున్నారని, ఇప్పుడు ఈ ఘటనతో సర్వం కోల్పోయారని తెలిపారు. విద్యార్థుల హాల్‌ టికెట్లు, విలువైన డాక్యుమెంట్లు, నగదు బంగారం కూడా మంటల్లో కాలిపోయాయని చెప్పారు. ప్రమాదంపై సమగ్ర నివేదిక తయారు చేసి ఒక్కో కుటుంబానికి రూ.30లక్షల చొప్పున ఇవ్వాలని ప్రభుత్వాన్ని డిమాండ్‌ చేశారు. అనంతరం స్థానిక నాయకులతో కలిసి కుటుంబానికి రూ.5వేల చొప్పున అందజేశారు.
