ఎంపీహెచ్‌ఏ (ఎఫ్‌)నియామకాలు పూర్తి చేయాలి

ఎంహెచ్‌ఎస్‌ఆర్బీ కార్యదర్శికి టీయుఎంహెచ్‌ఇయూ వినతి

నవతెలంగాణ బ్యూరో – హైదరాబాద్‌
కాలయాపన చేయకుండా ఎంపీహెచ్‌ఏ (ఎఫ్‌) నియామకాలను త్వరగా పూర్తి చేయాలని తెలంగాణ యునైటెడ్‌ మెడికల్‌, హెల్త్‌ ఎంప్లాయీస్‌ యూనియన్‌ (టీయుఎంహెచ్‌ఇయూ) కోరింది. ఈ మేరకు శనివారం యూనియన్‌ గౌరవాధ్యక్షులు భూపాల్‌, రాష్ట్ర అధ్యక్ష, ప్రధాన కార్యదర్శులు మహమ్మద్‌ ఫసియొద్దీన్‌, యాదానాయక్‌, రాష్ట్ర కోశాధికారి ఎ.కవిత తదితర నాయకులు మెడిల్‌ హెల్త్‌ సర్వీసెస్‌ రిక్రూట్‌ మెంట్‌ బోర్డ్‌ (ఎంహెచ్‌ఎస్‌ఆర్బీ) కార్యదర్శికి వినతిపత్రం సమర్పించారు. 2022లో జీవో నెంబర్‌ 59 ప్రకారం కాంట్రాక్ట్‌ ఉద్యోగులకు 20 మార్కుల వెయిటేజీతో 1,560 పోస్టుల భర్తీకి నోటిఫికేషన్‌ ఇచ్చారని వారు తెలిపారు. ఉద్యోగుల ఆందోళనతో 2023 ఆగస్టు 19న వెయిటేజీ మార్కులను 30కి పెంచారని తెలిపారు. దీనిపై కోర్టులో కేసు వేయడంతో 30 మార్కుల పెంచుతూ ఇచ్చిన జీవోను కొట్టి వేసి 20 మార్కులుగా నిర్ణయించిందని చెప్పారు. దీనిపై ప్రభుత్వం తగిన నిర్ణయం తీసుకోవాలని వారు కోరారు.