వెండితెరపై ప్రధాని నరేంద్ర మోదీ జీవితం

ప్రధానమంత్రి నరేంద్ర మోదీ బయోపిక్‌ను ‘మా వందే’ టైటిల్‌తో సిల్వర్‌ కాస్ట్‌ క్రియేషన్స్‌ బ్యానర్‌ పై నిర్మిస్తున్నారు ప్రొడ్యూసర్‌ వీర్‌ రెడ్డి.ఎం. ఈ చిత్రంలో నరేంద్ర మోదీ పాత్రలో మలయాళ స్టార్‌ హీరో ఉన్ని ముకుందన్‌ నటిస్తున్నారు. ఎన్నో పోరాటాల కన్నా తల్లి సంకల్ప బలం గొప్పదనే సందేశాన్నిస్తూ ప్రధాని మోదీ జీవితాన్ని యదార్థ ఘటనల ఆధారంగా, అన్ని వర్గాల ప్రేక్షకులకు నచ్చేలా తెరకెక్కిస్తున్నారు దర్శకుడు క్రాంతికుమార్‌.సీహెచ్‌. సమాజం కోసం ఎన్నో ఆకాంక్షలు గల బాలుడి నుంచి దేశ ప్రధానిగా మోదీ ఎదిగిన క్రమాన్ని ఈ సినిమాలో చూపించనున్నారు. బుధవారం మోదీ పుట్టినరోజు సందర్భంగా ఈ సినిమాని అనౌన్స్‌ చేశారు. ఈ సందర్భంగా నిర్మాత వీర్‌ రెడ్డి ఎం. మాట్లాడుతూ, ‘ప్రధాని మోదీ జన్మదినం సందర్భంగా ఆయన జీవిత కథా చిత్రం ‘మా వందే’ను అనౌన్స్‌ చేయడం సంతోషంగా ఉంది. మోదీ వ్యక్తిగత, రాజకీయ జీవితంలోని సంఘటనలు, విశేషాలన్నీ ఎంతో సహజంగా మా సినిమాలో చూపించబోతున్నాం. అంతర్జాతీయ ప్రమాణాలతో, అత్యున్నత సాంకేతిక విలువలు, వీఎఫ్‌ఎక్స్‌తో రూపొందే ఈ చిత్రాన్ని పాన్‌ ఇండియా భాషలతో పాటు ఇంగ్లీష్‌లోనూ నిర్మిస్తున్నాం. ప్రపంచనాయకుడిగా మోదీ ఎదగడం వెనక ఆయన మాతమూర్తి హీరాబెన్‌ ఇచ్చిన ప్రేరణ, తల్లితో మోదీకి గల అనుబంధం ఈ చిత్రంలో భావోద్వేగాలను పంచనుంది. ఎన్నో పోరాటాల కన్నా తల్లి సంకల్ప బలం గొప్పదనే సందేశం ఈ కథలో కీలకాంశంగా ఉండనుంది. మచ్చలేని నాయకుడిగా దేశ సేవకే జీవితాన్ని అంకితం చేస్తున్న ప్రధాని మోదీ జీవిత విశేషాలను ఈ సినిమాటిక్‌ యూనివర్స్‌లో ప్రేక్షకులందరికీ నచ్చేలా ఆవిష్కరించబోతున్నాం’ అని చెప్పారు.