రాజ్‌భవన్‌ పేరు మార్పు సరికాదు

తమిళనాడు సీఎం స్టాలిన్‌ ఆగ్రహం
చెన్నై: తమిళనాడులో సీఎం, గవర్నర్‌ మధ్య మళ్లీ ఘర్షణ వాతావరణం నెలకొన్నది. గవర్నర్‌ అధికారిక నివాసమైన రాజ్‌ భవన్‌ పేరును ‘లోక్‌ భవన్‌’గా మార్చాలన్న ప్రతిపాదనను తమిళనాడు సీఎం ఎం.కె స్టాలిన్‌ తీవ్రంగా విమర్శించారు. కేంద్ర ప్రభుత్వం ఆదేశాల మేరకు ఆ రాష్ట్ర గవర్నర్‌ ఆర్‌.ఎన్‌ రవి ఈ చర్యకు సిఫారసు చేయడంపై ఆగ్రహం వ్యక్తం చేశారు. ముందు ఆలోచనా విధానాన్ని మార్చుకోవడం ముఖ్యమని సూచించారు. ప్రజాస్వామ్య సంస్థల పట్ల గౌరవం లేనప్పుడు రాజ్‌భవన్‌ పేరు మార్పు చర్య అనవసరమని ఎక్స్‌లో పేర్కొన్నారు. కాగా, ప్రజల ద్వారా ఎన్నికైన ప్రజా ప్రతినిధుల అధికారాన్ని గౌరవించడంలోనే నిజమైన జవాబుదారీతనం ఉంటుందని సీఎం ఎం.కె స్టాలిన్‌ తెలిపారు.

”పేరు మార్చడం అనేది మనస్తత్వాన్ని మార్చడం కంటే తక్కువే. శాసనసభ అనేది ప్రజల సభ. శాసనసభను గౌరవించని వారికి, లోక్‌ భవన్‌గా పేరు మార్చడం కేవలం సంజ్ఞా? ప్రజాస్వామ్య సూత్రాల కళ్లలో ఇసుక వేయడమేనా?’ అని ప్రశ్నించారు. మరోవైపు ప్రజలచే ఎన్నుకున్న ప్రభుత్వాలను, ప్రజల అభీష్టాన్ని నెరవేర్చే సార్వభౌమ శాసనసభను గౌరవించడం ప్రస్తుతం అవసరమని సీఎం స్టాలిన్‌ స్పష్టం చేశారు. ఆ ఆలోచన, ఆ చర్యలో మార్పు లేకపోతే రాజ్‌భవన్‌ పేరును లోక్‌భవన్‌గా మార్చడం అనవసరమని విమర్శించారు. శాసనసభ పాత్రను సమర్థించని వారు గవర్నర్‌ నివాసం పేరును మార్చడం ద్వారా ఆ విలువను భర్తీ చేయలేరని ఆయన ఆగ్రహం వ్యక్తం చేశారు.