క్రిస్మస్‌ కానుకగా విడుదల

ప్రశ్విత ఎంటర్‌టైన్‌మెంట్‌, నీలి నీలి ఆకాశం క్రియేషన్స్‌, ఎన్‌వీఎల్‌ క్రియేషన్స్‌ బ్యానర్స్‌పై రూపొందిన చిత్రం ‘బ్యాడ్‌ గాళ్స్‌’ (కానీ చాలా మంచోళ్ళు అనేది ట్యాగ్‌ లైన్‌). అంచల్‌ గౌడ, పాయల్‌ చెంగప్ప, రోషిణి, యష్ణ, రోహన్‌ సూర్య ముఖ్య తారాగణం. ’30 రోజుల్లో ప్రేమించడం ఎలా’ సినిమాతో మంచి విజయాన్ని అందుకున్న డైరెక్టర్‌ ఫణి ప్రదీప్‌ ధూళిపూడి దర్శకత్వంలో వస్తున్న మరో చిత్రమిది.
శశిధర్‌ నల్ల, ఇమ్మడి సోమ నర్సయ్య, రామిశెట్టి రాంబాబు, రావుల రమేష్‌ ఈ చిత్రానికి నిర్మాతలు. ఈ చిత్రాన్ని క్రిస్మస్‌ పండుగ కానుకగా ఈనెల 25న విడుదల చేస్తున్నారు. దర్శకుడు ఫణి ప్రదీప్‌ ధూళిపూడి మాట్లాడుతూ, ‘ఇది పూర్తి ఎంటర్టైనర్‌ చిత్రం.

‘జాతి రత్నాలు, మ్యాడ్‌’ లాంటి హిలేరియస్‌ చిత్రాలు అమ్మాయిలు చేస్తే ఎలా ఉంటుందో అలాంటి చిత్రమిది. సినిమా చాలా బాగా వచ్చింది. అందరికీ నచ్చుతుంది. మా చిత్రాన్ని క్రిస్మస్‌ పండుగ కానుకగా ఈనెల 25న విడుదల చేస్తున్నాం. అనూప్‌ రూబెన్స్‌ మంచి సంగీతం సమకూర్చారు. ఆస్కార్‌ విజేత చంద్ర బోస్‌ అని పాటలకు లిరిక్స్‌ అందించారు. పాటలు చాలా బాగా వచ్చాయి. ఇటీవల విడుదల అయిన ‘ఇలా చూసుకుంటానే’ పాటకు మంచి ఆదరణ లభించింది. యూట్యూబ్‌లో 6 మిలియన్‌ వ్యూస్‌తో దుసుకుపోతుంది. అలాగే తాజాగా రిలీజైన ‘బ్యాడ్‌ గర్ల్స్‌’ టైటిల్‌ సాంగ్‌ మంచి ఆదరణ పొందింది. మిగతా పాటలు, టీజర్‌, ట్రైలర్‌ త్వరలో విడుదల చేస్తాం’ అని చెప్పారు.