మత ప్రాతిపదికన దేశాన్ని విచ్ఛిన్నం చేసేందుకు కుట్ర
రాజ్యాంగ పరిరక్షణ అందరి బాధ్యత : సుప్రీంకోర్టు రిటైర్డ్‌ న్యాయమూర్తి జస్టిస్‌ సుదర్శన్‌రెడ్డి
నవతెలంగాణ బ్యూరో – హైదరాబాద్‌
దేశంలోని ప్రజల మధ్య అసమానతలు తగ్గి సామాజిక న్యాయం దక్కాలంటే రిజర్వేషన్లు అనివార్యమని సుప్రీంకోర్టు రిటైర్డ్‌ న్యాయమూర్తి జస్టిస్‌ బి.సుదర్శన్‌రెడ్డి అభిప్రాయ పడ్డారు. ఆదివారం హైదరాబాద్‌లోని సుందరయ్య విజ్ఞాన కేంద్రంలో ”75 ఏండ్ల భారత రాజ్యాంగం-లౌకికవాదం, సామాజిక న్యాయం” అనే అంశంపై హైకోర్టు సీనియర్‌ న్యాయవాది జి.విద్యాసాగర్‌ అధ్యక్షతన జరిగిన రౌండ్‌ టేబుల్‌ సమావేశంలో అయన ముఖ్య అతిథిగా పాల్గొని ప్రసంగించారు. ఎస్సీ, ఎస్టీల రిజర్వేషన్ల హక్కులకు రాజ్యాంగంలో రక్షణ ఉందనీ, అయితే బీసీ వర్గాలకు ఎలాంటి రక్షణ లేదని అన్నారు. ఫలితంగా ఇంకా సమాజంలో అసమానతలు తగ్గడం లేదని పేర్కొన్నారు. అట్టడుగు వర్గాలకు సంపూర్ణ సామాజిక న్యాయం దక్కాలంటే రిజర్వేషన్లు ఒక్కటే మార్గం కాదని అన్నారు. రాజ్యాంగం వారికి కల్పించిన అన్ని హక్కులను, చట్టాలను పకడ్బందిగా అమలు చేయాల్సిన అవసరం పాలకులపై ఉందనీ, అప్పుడే సామాజిక న్యాయం సాధ్యమని చెప్పారు. దేశాన్ని పాలిస్తున్న నియంతలు అనుసరిస్తున్న తీరుతో రాజ్యాంగం ప్రమాదంలో పడిందని ఆందోళన వ్యక్తం చేశారు.
మతాల ప్రాతిపదికన మనుషులను విడదీసేందుకు ప్రయత్నిస్తున్నారని విమర్శించారు. న్యాయ వ్యవస్థలు సైతం రాజ్యాంగం పరిధిని దాటి మత విశ్వాసాల ప్రాతిపదికన తీర్పులు ఇస్తున్నాయనే ప్రచారం నిజమైతే అది దేశానికి పెను ప్రమాదమని హెచ్చరించారు. రాజ్యాంగ పీఠికలో చేర్చిన లౌకిక వాదం, సామాజిక న్యాయం అనే అంశాలను తొలిగించేందుకు చేస్తున్న ప్రయత్నాలను ఆయన తప్పు పట్టారు. భిన్న మతాలు, భిన్న భాషల సమూహాలు కలిసి మెలిసి జీవిస్తున్న లౌకిక దేశాన్ని విచ్చిన్నం చేసేందుకు పన్నుతున్న కుట్రలను తిప్పి కొట్టాలని పిలుపునిచ్చారు. ఈ కార్యక్రమంలో ఐలు రాష్ట్ర ప్రధాన కార్యదర్శి కె పార్థసారథి, సీపీఐ(ఎం) సీనియర్‌ నాయకులు డీజీ నర్సింహరావు, రైతు సంఘం సీనియర్‌ నాయకులు సారంపల్లి మల్లారెడ్డి, కేవీపీఎస్‌ రాష్ట్ర ప్రధాన కార్యదర్శి స్కైలాబ్‌బాబు, టీడబ్ల్యూజేఎఫ్‌ రాష్ట్ర ప్రధాన కార్యదర్శి బి.బసవపున్నయ్య, రాజ్యాంగ పరిరక్షణ వేదిక సభ్యులు కామేశ్‌ బాబు, డిఏఎస్‌వి ప్రసాద్‌, కె.ఉమామహేశ్వర రావు, విదార్థి, యువజన, రైతు, కార్మిక, మహిళా, న్యాయవాద, జర్నలిస్టు, గిరిజన సంఘాలకు చెందిన ప్రతినిధులు, పలువురు రచయితలు పాల్గొన్నారు. ఈ సందర్భంగా చర్చకు వచ్చిన పలు ప్రశ్నలకు జస్టిస్‌ సుదర్శన్‌రెడ్డి సమాదానమిచ్చారు. ఆ వివరాలు….
రాజ్యాంగ పీఠికలోని లౌకిక వాదం, సామాజిక న్యాయం అనే అంశాలను మధ్యలో చేర్చారనే ప్రచారాన్ని ఇటీవల కొంతమంది విసృతంగా ప్రచారం చేస్తున్నారు. వాటిని తొలగించేందుకు పాలకులు ఎందుకు ప్రయత్నిస్తున్నారు?
లౌకక వాదం, సామాజిక న్యాయం కొత్తగా భారత రాజ్యాంగంలో చేర్చలేదు. ఈ అంశాలు ఆరంభం నుంచి చివరి వరకు రాజ్యంగంలో అంతర్లీనమై ఉన్నాయి. సుదీర్ఘ మేధోమథనం తర్వాత వీటిని 42వ రాజ్యాంగ సవరణ ద్వారా పీఠికలో పొందు పర్చారు. దేశంలో అధికారంలో ఉన్న పాలకులు తమ అజెండాను అమలు చేసే కుట్రలో బాగంగా వాటిని తొలిగించేందుకు చేస్తున్న ప్రయత్నాలను లౌకిక వాదులు అడ్డుకుంటూనే ఉన్నారు.
రిజర్వేషన్లను 50 శాతానికి మించకూడదని ఇందిరా సహాని కేసులో ఇచ్చిన తీర్పు ఎంతవరకు సమంజసం?
దేశంలో ఎస్సీ, ఎస్టీ, బీసీ తదితర బలహీన వర్గాలకు చెందిన వారు 86 శాతానికి పైగా ఉన్నారు. ఏండ్లుగా కొనసాగుతున్న అసమానతలను రూపు మాపాలంటే రిజర్వేషన్ల పరిధి పెరగాల్సిన అవసరం ఉంది. ఇందిరా సహాని కేసులో ఇచ్చిన తీర్పు నా దృష్టిలో సరికాదని భావిస్తున్నాను.
బీహర్‌లో జరిగిన కులగణన సరైందేనా? దాని ప్రభావం ప్రజలపై ఏ విధంగా ఉంది?
బీహార్‌లో జరిగిన కులగణన సరైంది కాదని భావిస్తున్నాను. దాన్ని ఆధారంగా చేసుకుని సర్‌ను అమలు చేస్తున్నారు. మత ప్రాతిపదికన ఓటర్ల జాబితాను తయారు చేస్తున్నారు. ఇది లౌకిక, ప్రజాస్వామ్యానికి ప్రమాదం.
ఈబీసీ రిజర్వేషన్లు సరైనవేనా?
ఈబీసీ రిజర్వేషన్లు నా దృష్టిలో సరైనవి కాదు. అన్నింటా అభివృద్ధి చెందిన వారికి కొనసాగించడం వల్ల అట్టడుగు వర్గాలు నష్ట పోతున్నారు. ఓపెన్‌ కేటగిరిలో సరైన ప్రాతినిద్యం పొందుతున్న వారు ఇంకా రిజర్వేషన్లను పొందడం ఏ మాత్రం ఆమోదయోగ్యం కాదు.
రాజ్యాంగంలో అన్ని వర్గాల ప్రస్తావన ఉంది. కాని మీడియా ప్రస్తావన ఎందుకు లేదు? పౌర స్వేచ్ఛనే మీడియా స్వేచ్ఛ అనే విధానం సరైనదేనా?
మీడియా అనే కాదు చాలా వర్గాలకు చెందిన ప్రస్తావన రాజ్యాంగలో లేదు. ఉదాహారణకు రాజకీయ పార్టీలు, నాయకుల ప్రస్తావన లేదు. అంత మాత్రాన వారు తమ హక్కులను పొందలేక పోతున్నారా? మీడియాకు హక్కుల విషయంలో సుప్రీంకోర్టు అనేక సార్లు ప్రస్తావించింది. మీడియా పై ఎలాంటి నియంత్రణ ఉండదని భావిస్తున్నాను. దేశంలోని ఎస్సీలు, ఎస్టీలు, ఇతర బలహీన వర్గాలు ఎదుర్కొంటున్న అనేక సమస్యలను పలువురు ప్రస్తావించారు. ఇప్పటి వరకు జరిగిన రాజ్యాంగ సవరణలను పాఠ్యాంశాల్లో చేర్చి విద్యార్థులకు అవగాహన కల్పించాలని పలువురు చేసిన సూచనలతో జస్టిస్‌ సుదర్శన్‌రెడ్డి ఏకీభ వించారు. పౌరులు వ్యక్తంచేసిన అభిప్రాయాలపై ఆయన సానుకూలంగా స్పందించారు.
రాష్ట్రంలో జరిగిన కులగణనలో మొదట్లో ఆస్తుల వివరాలు వెల్లడించాలని అన్నారు. ఆ తర్వాత వివిధ వర్గాల నుంచి వచ్చిన ఒత్తిడితో ఆ క్లాజ్‌ను తొలిగించడం సరైనదేదా?
దాని వల్ల పెద్దగా నష్టం జరుగుతుందని నేనుకోవడం లేదు. ఈ రోజు ఆర్టీఐ ఇతర విధానాలతో అన్ని వివరాలను పొందుతున్నారు. ఇంతకంటే నేను ఎక్కువగా చెప్పలేను. ఇందుకు సంబంధించి ప్రభుత్వం వేసిన కమిటీలో నేను భాగస్వామిగా ఉన్నాను.
