హాస్టళ్లలో విద్యార్థినుల ఆరోగ్య పర్యవేక్ష్షణకు ఎంబీబీఎస్‌ డాక్టర్‌ను కేటాయించాలి : ఎస్‌ఎఫ్‌ఐ రాష్ట్ర గర్ల్స్‌ కన్వెన్షన్‌ ముగింపులో జాతీయ ఉపాధ్యక్షులు శిల్ప
శాస్త్రీయ విద్యకోసం ఉద్యమించాలని పిలుపు
ఎస్‌ఎఫ్‌ఐ రాష్ట్ర గర్ల్స్‌ కన్వీనర్‌గా మమత ఎన్నిక
నవతెలంగాణ-నిజామాబాద్‌ ప్రాంతీయ ప్రతినిధి
రక్షణ చట్టాలను పకడ్బందీగా అమలు చేయాలని, హాస్టళ్లకు సొంత భవనాలు నిర్మించి, ఆరోగ్య పర్యవేక్షణకు ఎంబీబీఎస్‌ డాక్టర్‌ను కేటాయించాలని ఎస్‌ఎఫ్‌ఐ జాతీయ ఉపాధ్యక్షులు శిల్ప డిమాండ్‌ చేశారు. నిజామాబాద్‌ జిల్లా కేంద్రంలో మూడు రోజుల పాటు నిర్వహించిన ఎస్‌ఎఫ్‌ఐ రాష్ట్ర గర్ల్స్‌ కన్వెన్షన్‌ శుక్రవారం ముగిసింది. ఈ కన్వెన్షన్‌లో 12 తీర్మానాలను ఏకగ్రీవంగా ఆమోదించారు. అనంతరం ఎస్‌ఎఫ్‌ఐ గర్ల్స్‌ కన్వీనర్‌గా మమతను ఎన్నుకున్నారు. మరో 11 మంది కో కన్వీనర్‌లను ఎన్నుకున్నారు. ఈ సందర్భంగా నిర్వహించిన సమావేశంలో శిల్ప మాట్లాడుతూ.. నూతన జాతీయ విద్యా విధానం వల్ల విద్యార్థులకు తీవ్ర నష్టం ఉందని, దాన్ని రద్దు చేయాలని డిమాండ్‌ చేశారు. అమ్మాయిలకు రక్షణ కల్పించేలా తెచ్చిన చట్టాలను పకడ్బందీగా అమలు చేయాలని, అలాగే జీఎస్‌ క్యాష్‌ (జండర్‌ సెన్సిటైజేషన్‌ సెక్సువల్‌ హరాస్‌మెంట్‌ కమిటీలు) అనేవి కేవలం సెంట్రల్‌ యూనివర్సిటీలో మాత్రమే ఉన్నాయని, వాటిని అన్ని యూనివర్సిటీల్లో, కళాశాలల్లో కూడా వేయాలని డిమాండ్‌ చేశారు.
రాజ్యాంగానికి బదులుగా మనుస్మృతిని అమలు చేయాలని చూస్తున్న కేంద్రంలోని బీజేపీ ప్రభుత్వానికి వ్యతిరేకంగా పోరాటాలకు సిద్ధం కావాలని పిలుపునిచ్చారు. ఎన్సీఈఆర్టీ పుస్తకాల్లో స్వాతంత్య్ర సమరయోధుల జీవిత చరిత్రలను తీసేసే ప్రయత్నం చేస్తున్నారని, యూనివర్సిటీల్లో ఎల్‌ఓసీఎఫ్‌ పేరుతో ప్రభుత్వ వర్సిటీలను నిర్వీర్యం చేస్తున్నారని అన్నారు. విద్యా కాషాయీకరణకు వ్యతిరేకంగా విద్యార్థినులు పోరాటం చేయాలని తెలిపారు. రాష్ట్రంలో విద్యారంగానికి ఇప్పటివరకు కూడా విద్యాశాఖ మంత్రి లేకపోవడం సిగ్గుచేటని, విద్యార్థుల భవిష్యత్తు ప్రశ్నార్థకంగా మారుతుందని అన్నారు. విద్యార్థుల జీవితాలతో చెలగాటమాడొద్దని వెంటనే మంత్రిని నియమించాలని డిమాండ్‌ చేశారు. అధికారులు కళాశాలలో అదేవిధంగా యూనివర్సిటీలల్లో తక్షణమే తనిఖీ చేసి అక్కడున్న సమస్యలను పరిష్కరించాలని డిమాండ్‌ చేశారు. ఈ కార్యక్రమంలో ఎస్‌ఎఫ్‌ఐ రాష్ట్ర అధ్యక్ష, కార్యదర్శులు రజనీకాంత్‌, నాగరాజు, నాయకులు పూజ, దీపిక, రమ్య, కావ్య, సుమ, జిల్లా కార్యదర్శి రాచకొండ విఘ్నేష్‌, నగర కార్యదర్శి ఆజాద్‌ తదితరులు పాల్గొన్నారు.
