నవతెలంగాణ – హైదరాబాద్: నందమూరి బాలకృష్ణ కథానాయకుడిగా వచ్చిన ‘భగవంత్ కేసరి’ చిత్రం ప్రతిష్ఠాత్మక పురస్కారాన్ని గెలుచుకుంది. 71వ జాతీయ చలనచిత్ర అవార్డులలో 2023 సంవత్సరానికి గానూ ఉత్తమ తెలుగు చిత్రంగా ఈ సినిమా ఎంపికైంది. ఈ నేపథ్యంలో చిత్రంలో కీలక పాత్ర పోషించిన యువ కథానాయిక శ్రీలీల తన ఆనందాన్ని పంచుకుంటూ, ఈ విజయాన్ని దేశంలోని ఆడపిల్లలందరికీ అంకితమిస్తున్నట్లు తెలిపారు.
ఈ గొప్ప విజయంపై శ్రీలీల స్పందిస్తూ ఒక ప్రకటన విడుదల చేశారు. “పెద్ద కలలు కని, గట్టిగా గర్జించే ప్రతి ఆడపిల్లకూ ఈ విజయం అంకితం!” అని ఆమె పేర్కొన్నారు. ఈ విజయం సాధ్యమవడానికి కారణమైన జ్యూరీ సభ్యులకు, అచంచలమైన మద్దతునిచ్చిన తన సహనటుడు నందమూరి బాలకృష్ణకు ఆమె హృదయపూర్వక కృతజ్ఞతలు తెలిపారు. ‘భగవంత్ కేసరి’ చిత్రంలో భావోద్వేగభరితమైన నటనతో శ్రీలీల విమర్శకుల నుంచి విశేష ప్రశంసలు అందుకున్నారు. ఆమె నటన సినిమా విజయానికి ఒక ముఖ్య కారణంగా నిలిచింది. ఈ చిత్రంలోని పాత్ర ద్వారా ఆమె ప్రేక్షకులకు మరింత దగ్గరయ్యారు. అతి తక్కువ సమయంలోనే తెలుగు చిత్ర పరిశ్రమలో అగ్రతారగా ఎదుగుతున్న శ్రీలీల కెరీర్‌లో ఈ జాతీయ పురస్కారం ఒక మైలురాయిగా నిలవనుంది. ప్రస్తుతం బాలీవుడ్ అరంగేట్రానికి సిద్ధమవుతున్న శ్రీలీల, ఈ జాతీయ అవార్డుతో మరింత ఉత్సాహంగా ముందుకు సాగుతార‌న‌డంలో ఎలాంటి సందేహం లేదు.
