సయ్యద్‌ మోడీ బ్యాడ్మింటన్‌ టోర్నీ
లక్నో: సయ్యద్‌ మోడీ ఇంటర్నేషనల్‌ బ్యాడ్మింటన్‌ టోర్నీలో భారత సీనియర్‌ షట్లర్‌ కిడాంబి శ్రీకాంత్‌ ఫైనల్లోకి దూసుకెళ్లాడు. శనివారం జరిగిన పురుషుల సింగిల్‌ సెమీఫైనల్లో శ్రీకాంత్‌ 21-15, 19-21, 21-13తో మిథున్‌ మంజునాథ్‌పై అద్భుత విజయం సాధించాడు. మూడు గేమ్‌ల పాటు హౌరాహౌరీగా సాగిన సెమీస్‌ పోరులో మంజునాథ్‌ను ఓడించాడు. తొలి గేమ్‌ను 21-15తో దక్కించుకున్న సీనియర్‌ షట్లర్‌కు రెండో గేమ్‌లో మంజునాథ్‌ నుంచి ప్రతిఘటన ఎదురైంది. 19-21తో రెండో గేమ్‌ గెలిచి పోటీలోకి వచ్చిన మంజునాథ్‌..చివరి గేమ్‌లో తడబడ్డాడు.
శ్రీకాంత్‌..21-13తో గేమ్‌తో సహా మ్యాచ్‌ను కైవసం చేసుకున్నాడు. మరోవైపు మహిళల డబుల్స్‌ సెమీస్‌లో భారత యువ జోడీ గాయత్రి గోపీచంద్‌, త్రిసా జాలీ 21-11, 21-15తో ఆంగ్‌ జిన్‌ యి, కార్మెన్‌ తింగ్‌ ద్వయంపై అలవోక విజయం సాధించింది. భుజం గాయం కారణంగా ఐదు నెలల తర్వాత బరిలోకి దిగిన గాయత్రి..త్రిసాతో కలిసి స్థాయికి తగ్గ ఆటతీరును ప్రదర్శించింది. మహిళల సింగిల్స్‌ సెమీస్‌లో ఉన్నతి హుడా 15-21, 10-21తో నెస్లిహన్‌ అరిన్‌(టర్కీ) చేతిలో ఓడగా, సంచలన విజయాలతో ఆకట్టుకున్న యువ షట్లర్‌ తన్విశర్మ 17-21, 16-21తో హినా అకెచి(జపాన్‌)పై ఓడి టోర్నీ నుంచి నిష్క్రమించింది. మిక్స్‌డ్‌ డబుల్స్‌లోనూ హరిహరణ్‌, త్రిసా జోడీ 17-21, 19-21తో ఇండోనేషియా చేతిలో ఓడి వైదొలిగింది.
