– ప్రజలు నిర్భయంగా పోలింగ్‌ లో పాల్గొనాలి
– మహ్మదాపూర్ లో పోలీసుల ఫ్లాగ్ మార్చ్
నవతెలంగాణ – హుస్నాబాద్ రూరల్
స్థానిక ఎన్నికల సందర్భంగా శాంతిభద్రతలకు విఘాతం కలిగించే వారి పట్ల పోలీసులు కఠినంగా వ్యవహరించేందుకు పూర్తి సన్నద్ధంగా ఉన్నారని హుస్నాబాద్ ఏసీపి సదానందం అన్నారు. ఎన్నికల ప్రక్రియ ప్రశాంతంగా, నిష్పక్షపాతంగా నిర్వహించడంలో ప్రజలకు పూర్తి భరోసా కల్పించడానికి ఆదివారం హుస్నాబాద్ మండలం మహ్మదాపూర్ గ్రామంలో పోలీసులు ఫ్లాగ్ మార్చ్ నిర్వహించారు. ఈ సందర్భంగా హుస్నాబాద్ ఏసిపి సదానందం, సీఐ శ్రీనివాస్ మాట్లాడుతూ ఎన్నికల కోడ్ అమలులో ఉన్నందున, ఎలాంటి అవాంఛనీయ ఘటనలకు తావులేకుండా ప్రజలు నిర్భయంగా పోలింగ్‌లో పాల్గొనాలని సూచించారు.
ఎన్నికల నియమావళిని ప్రతి ఒక్కరూ ఖచ్చితంగా పాటించాలని సూచించారు. ఎలాంటి ప్రలోభాలు, బెదిరింపులకు పాల్పడరాదని ప్రజలను హెచ్చరించారు. ఎవరైన ఎన్నికల ప్రచారంలో భాగంగా ఏదైనా ర్యాలీ లేదా బహిరంగ సభ నిర్వహించాలంటే తప్పనిసరిగా సంబంధిత మండల తహసీల్దార్ మరియు పోలీస్ వారి నుండి ముందస్తు అనుమతి తీసుకోవాలన్నారు. ముందస్తు అనుమతి లేకుండా ఎవరైనా ర్యాలీలు లేదా సమావేశాలు నిర్వహించినట్లయితే, అట్టి వారిపై ఎన్నికల నిబంధనల ప్రకారం చట్టపరమైన కఠిన చర్యలు తీసుకుంటామన్నారు.
ఈ సందర్భంగా హుస్నాబాద్ ఎస్సై లక్ష్మారెడ్డి మాట్లాడుతూ గ్రామ పంచాయతీ ఎన్నికలు ప్రశాంత వాతావరణంలో జరిగేందుకు అన్ని చర్యలు తీసుకుంటున్నామన్నారు. ఎలాంటి ఫిర్యాదులు, అనుమానాలు ఉన్నా తక్షణమే నంబర్ 8712667352 కు తెలియజేయాలని విజ్ఞప్తి చేశారు. అల్లర్లు సృష్టించాలని చూసే వారిపై చట్టపరంగా కఠిన చర్యలు తీసుకుంటాం” అని స్పష్టం చేశారు.ఈ కార్యక్రమంలో కోహెడ ఎస్సై అభిలాష్, ఎ.ఎస్సై మనమ్మ , మరియు పోలీస్ సిబ్బంది పాల్గొన్నారు.
