ఈ ఏడాది 25 వేల టన్నులు మాత్రమే గానుగ
తగ్గిపోయిన చెరుకు దిగుబడి
నవతెలంగాణ- కల్లూరు
ఖమ్మం జిల్లా కల్లూరులోని కాకతీయ షుగర్‌ ఫ్యాక్టరీలో 2025-26 సీజన్‌ చెరుకు క్రషింగ్‌ను ఫ్యాక్టరీ వైస్‌ ప్రెసిడెంట్‌ చల్లగొండ్ల నాగేశ్వరరావు ఆదివారం ప్రారంభించారు. సీజన్‌కు కేవలం 25 వేల టన్నులు మాత్రమే చెరుకు క్రషింగ్‌ చేసే అవకాశం ఉందని వైస్‌ ప్రెసిడెంట్‌ చల్లగొండ్ల నాగేశ్వరరావు, సివిల్‌ ఇంజనీర్‌ రఘునాథ్‌ బాబు తెలిపారు. చెరుకు మద్దతు ధర పెరగకపోవడంతో రైతులు వరి సాగు వైపు మొగ్గు చూపడంతో చెరుకు సాగు విస్తీర్ణం పూర్తిగా తగ్గిపోయిందన్నారు.
చెరుకు సాగుకు ఏడాదికి టన్నుకు మద్దతు ధర 3,210 రూపాయలు, ఫ్యాక్టరీ 290 రూపాయలు ప్రోత్సాహంగా చెల్లిస్తుందన్నారు. మొత్తం రైతుకి రూ.3500 ఇస్తున్నా గిట్టుబాటు కావట్లేదని వరి పంట సాగు చేస్తున్నారని తెలిపారు. రైతులకు చెరుకు పంట సాగు చేస్తే విత్తనం కింద రెండు టన్నులు చెరుకు ఫ్రీగా ఇస్తామని, సాగు కోసం రుణాలు ఇస్తామని, ఫెన్సింగ్‌ వేసుకోవడానికి కూడా రుణాలు ఇస్తామని చెప్పారు. ఈ ఏడాది వారం రోజులు మాత్రమే క్రషింగ్‌ జరుగుతుందని తెలిపారు. చెరుకు పంట వల్ల నష్టం కంటే లాభమే ఎక్కువగా ఉంటుందని, ప్రకృతి వల్ల సంభవించే నష్టాలు కూడా అధిగమించొచ్చని అన్నారు. రైతులు చెరుకు సాగు వైపు దృష్టి సారించాలని సూచించారు.
