సూపర్‌ఫుడ్స్‌

వర్షాకాలం అంటే చాలా ఇష్టపడతారు. చిరుజల్లులు, చల్లటి వాతావరణం మనసుకు ఆహ్లాదం కలిగిస్తాయి. ఈ కాలం వర్షాలనే కాదు.. వ్యాధులను తన వెంట మోసుకొస్తుంది. ఈ సీజన్‌లో ఇన్ఫెక్షన్లు, అంటువ్యాధుల ముప్పు పెరుగుతుంది. ఈ వ్యాధులతో పోరాడటానికి.. రోగనిరోధకశక్తి చాలా ముఖ్యం. మీ ఆహారంలో కొన్ని సూపర్‌ఫుడ్స్‌ చేర్చుకుంటే ఇమ్యూనిటీ స్ట్రాంగ్‌గా ఉంటుంది. అవేంటో చూద్దాం…
అల్లం: అల్లంలో యాంటీ ఇన్ఫ్లమేటరీ, యాంటీఆక్సిడెంట్‌ గుణాలు సమృద్ధిగా ఉంటాయి. అల్లం శరీర కణజాలాలకు పోషకాలను సమీకరించడానికి, రవాణా చేయడానికి తోడ్పడుతుంది. ఈ రోజుల్లో జలుబు, దగ్గు వంటి సమస్యలు సర్వసాధారణం. అల్లం కఫాన్ని తగ్గిస్తుంది. అల్లం టీ తాగితే జలుబు, దగ్గు దూరమవుతాయి. ఫ్లూ సమస్యతోనూ పోరాడటానికి అల్లం తోడ్పడుతుంది. అల్లంలోని యాంటీ ఇన్ఫ్లమేటరీ గుణాలు శరీరంలోని వాపును తగ్గించడంతో పాటు, రోగనిరోధక శక్తిని మెరుగుపరుస్తాయి. వర్షకాలం టీలు, సూప్‌లు, కూరల్లో అల్లాన్ని ఎక్కువ ఉపయోగిస్తే ఇమ్యూనిటీ బూస్ట్‌ చేసుకోవచ్చు.
నేరేడు పండు: ఈ కాలంలో విరివిగా దొరికే పండు ఇది. నేరేడు పండులో ఉండే విటమిన్‌ సి, యాంటీ ఆక్సిడెంట్లు మీ రోగనిరోధక శక్తిని మెరుగుపరుస్తాయి. నేరేడులో కెలరీలు తక్కువ. ఎ, సి-విటమిన్లూ ఖనిజాలూ ఫైటోకెమికల్సూ పుష్కలంగా ఉంటాయి. వానాకాలంలో వచ్చే అతిసారం, కలరా వ్యాధులతో పాటు ఇతరత్రా ఇన్ఫెక్షన్లకు నేరేడు ఔషధంలా పనిచేస్తుంది. కడుపులో పేరుకుపోయిన మలినాలను, శరీరంలోని వ్యర్థాలను బయటకు పంపడానికి ఇందులోని పోషకాలు చక్కగా పనిచేస్తాయి. ఈ కాలంలో వ్యాధుల నుంచి రక్షణ పొందడానికి నేరేడు పండు కచ్చితంగా తినాలని నిపుణులు చెబుతున్నారు.
కరివేపాకు: వంటల్లో కరివేపాకు ఎక్కువగా వాడుతుంటాం. చాలామంది కూరల్లో కరివేపాకు తీసి పక్కన పెట్టేస్తారు. అయితే ఈ ఆకు ఇమ్యూనిటీ బూస్ట్‌ చేయడానికి ఎఫెక్టివ్‌గా పనిచేస్తుందని నిపుణులు చెబుతున్నారు. కరివేపాకులో లినాలూల్‌, ఆల్ఫా-టెర్పినేన్‌, మైర్సీన్‌, మహానింబైన్‌, కారియోఫిలీన్‌, ముర్రాయనాల్‌, ఆల్ఫా-పినేన్‌ వంటి అనేక సమ్మేళనాలు ఉంటాయి. ఈ సమ్మేళనాలు శరీరంలో యాంటీఆక్సిడెంట్లుగా పనిచేస్తాయి. ఇవి ఇన్ఫెక్షన్లు, వ్యాధుల నుంచి మిమ్మల్ని రక్షిస్తాయి.
తులసి: ఈ కాలంలో రోజూ తులసి ఆకులను నమలడం వల్ల అనారోగ్యాల నుంచి రక్షణ పొందవచ్చు. ఐదు తులసి ఆకులను రాత్రంతా నీటిలో నానబెట్టి మరుసటి రోజు ఉదయం పరగడుపునే ఆ ఆకులు తినాలి.. నీటిని తాగాలి. తద్వారా దగ్గు, జలుబు లాంటి ఇన్ఫెక్షన్ల నుంచి తక్షణ ఉపమశమనం పొందచ్చు.
నిమ్మకాయ: నిమ్మరసంలో విటమిన్‌ సి సమృద్ధిగా ఉంటుంది. ఇది శక్తివంతమైన యాంటీఆక్సిడెంట్‌గా పనిచేస్తుంది. ఇది మన రోగనిరోధక శక్తిని బూస్ట్‌ చేస్తుంది. విటమిన్‌ సి మన శరీరంలో తెల్ల రక్త కణాల ఉత్పత్తిని పెంచుతుంది. ఇది ఇన్ఫెక్షన్లు, అంటువ్యాధుల నుంచి శరీరాన్ని రక్షిస్తుంది.