నవతెలంగాణ – కంఠేశ్వర్
గవర్నమెంట్ హై స్కూల్, దుబ్బా నిజామాబాద్ పాఠశాల లో పని చేస్తోన్న చల్లా ముద్దుకృష్ణ, స్కూల్ అసిస్టెంట్ (ఫిజికల్ సైన్స్), ప్రతిష్టాత్మకమైన ఇండియా ఇంటర్నేషనల్ సైన్స్ ఫెస్టివల్ (ఐ ఐ ఎస్ ఎఫ్ ) – 2025 లో రెండు ప్రధాన విభాగాల్లో పాల్గొనడానికి ఎంపికై అధికారిక ఆహ్వానం అందుకున్నారు. సైన్స్ సఫారీ – సైన్స్ టాయ్స్ అండ్ గేమ్స్ అడ్వెంచర్ విభాగం లో వినూత్నమైన ప్రయోగశాల కృత్యాల ద్వార ఎన్నిక జరిగింది.
ఎంపవరింగ్ ఇండియా – యంగ్ సైంటిస్ట్ కాన్‌క్లేవ్ విభాగం లో తాను పంపిన పరిశోధనా పత్రం ద్వారా ఎన్నిక జరిగింది అని ఈ రెండు ఈవెంట్ లలో పాల్గొంటున్నట్లు ముద్దు కృష్ణ తేలిపారు. ఇదివరకు 2023 ఢిల్లీ , 2024 గౌహతి లో పాల్గొన్నాను.ఇప్పుడు పాల్గొనడం ఇది 3 వ సారి అని తెలిపారు.ఇండియా ఇంటర్నేషనల్ సైన్స్ ఫెస్టివల్ (ఐ ఐ ఎస్ ఎఫ్ ) 2025 ప్రధాన వేదిక పంజాబ్ విశ్వవిద్యాలయం, చండీగఢ్. ఈ కార్యక్రమం 2025 డిసెంబర్ 6–9 తేదీల్లో నిర్వహించబడుతుంది.
విజ్ఞాన్ సే సమృద్ధి ఫర్ ఆత్మనిర్భర్ భారత్ అనే లక్ష్యంతో ఐ ఐ ఎస్ ఎఫ్ 2025, స్వయంప్రతిపత్తి సుసంపన్నమైన భారత నిర్మాణంలో విజ్ఞాన ఆధారిత అభివృద్ధిని వేడుకగా జరుపుకుంటూ ముందుకు తీసుకెళ్లడం ప్రధాన ధ్యేయంగా కలిగి ఉంది. ఇన్నోవేషన్, ఆత్మనిర్భర్త, ఇండియా ఫర్ గ్లోబల్ గుడ్ అనే దృష్టితో, శాస్త్రవేత్తలు, ఆవిష్కర్తలు, విద్యావేత్తలు, విద్యార్థులు, పరిశ్రమ ప్రతినిధులు, సైన్స్ కమ్యూనికేటర్లు, విధాన రూపకర్తలు అందరు ఒక్క వేదికపైకి వచ్చి సహకారం, సృజనాత్మకత, జ్ఞాన వినిమయాన్ని ప్రోత్సహించడం ఈ ఉత్సవం లక్ష్యం.
విజ్ఞాన్ సే సమృద్ధి ఫర్ ఆత్మనిర్భర్ భారత్ అనే ఇతివృత్తం, శాస్త్రీయ జ్ఞానాన్ని సమర్థవంతంగా వినియోగించడం ద్వారానే నిజమైన సంపద, అభివృద్ధి, సమాజ సంక్షేమం సాధ్యమవుతాయని ప్రతిబింబిస్తుంది, అంటే భావాలను ఆవిష్కరణలుగా, ఆవిష్కరణలను అభివృద్ధిగా, శాస్త్రాన్ని సమాజ శ్రేయస్సుగా మార్చడం.ఈ ఘనత సాధించినందుకు ప్రభుత్వ ఉన్నత పాఠశాల దుబ్బా ప్రధానోపాధ్యాయుడు టి శ్రీనివాస్, బోధనా సిబ్బంది ముద్దుకృష్ణను అభినందించారు.
