హైదరాబాద్‌లో ట్రంప్‌ ఎవెన్యూ, గూగుల్‌ స్ట్రీట్‌

అంతర్జాతీయ టెక్‌ కంపెనీల పేర్లతో రోడ్లు
ప్యూచర్‌ సిటీ ప్రధాన రోడ్డుకు రతన్‌టాటా పేరు : సీఎం రేవంత్‌రెడ్డి వినూత్న ప్రతిపాదన
నవతెలంగాణబ్యూరో-హైదరాబాద్‌
తెలంగాణ రైజింగ్‌ గ్లోబల్‌ సమ్మిట్‌ నేపథ్యంలో ముఖ్యమంత్రి రేవంత్‌రెడ్డి వినూత్న ప్రతిపాదన చేశారు. ఇప్పటికే అంతర్జాతీయ ఖ్యాతి గడించిన హైదరాబాద్‌కు మరింతగా గ్లోబల్‌ మ్యాప్‌లో చోటు కల్పించేలా సీఎం సంకల్పించారు. అందుకనుగుణంగా ప్రపంచ ప్రఖ్యాత వ్యక్తులు, కంపెనీల పేర్లను హైదరాబాద్‌లో ప్రధాన రహదారులకు పెట్టాలని నిర్ణయించారు. నెహ్రు ఔటర్‌ రింగ్‌ రోడ్‌ వద్ద రావిర్యాలను నుంచి ప్రారంభమై ప్రతిపాదిత ప్యూచర్‌ సిటీని అనుసందానం చేసే 100 మీటర్ల గ్రీన్‌ఫిల్డ్‌ రేడియల్‌ రోడ్‌కు పద్మవిభూషణ్‌ రతన్‌ టాటా పేరు పెట్టాలని ప్రభుత్వం నిర్ణయించింది. రావిర్యాల ఇంటర్‌చేంజ్‌కు ఇప్పటికే ‘టాటా ఇంటర్‌చేంజ్‌’ అని పేరు పెట్టారు. యూఎస్‌ కాన్సులేట్‌ రోడ్డుకు డోనాల్డ్‌ ట్రంప్‌ ఎవెన్యూగా నామకరణం చేసింది. అలాగే ప్రపంచంలోనే తొలిసారిగా హైదరాబాద్‌లోని అమెరికా కాన్సులేట్‌ జనరల్‌ ముందు నుంచే వెళ్లే ప్రధాన రహదారికి అమెరికా అధ్యక్షులు డొనాల్డ్‌ ట్రంప్‌ పేరుతో ‘డోనాల్డ్‌ ట్రంప్‌ అవెన్యూ’ అనే పేరు నిర్ణయించారు. ఈ నిర్ణయంపై కేంద్ర విదేశాంగ మంత్రిత్వ శాఖకు అమెరికా రాయబార కార్యాలయానికి ప్రభుత్వం లేఖ రాయనుంది.

మరిన్ని ప్రధాన రహదారులకు గ్లోబల్‌ దిగ్గజ కంపెనీల పేర్లు
ఢిల్లీలో ఇటీవల జరిగిన యూఎస్‌-ఇండియా స్ట్రాటజిక్‌ పార్టనర్‌ షిప్‌ ఫోరం వార్షిక సదస్సులో సీఎం రేవంత్‌రెడ్డి చేసిన ప్రకటన ప్రకారం హైదరాబాద్‌లోని ముఖ్యరహదారులకు ప్రముఖ అంతర్జాతీయ కంపెనీల పేర్లు పెట్టాలన్న దృష్టిలో భాగంగా మరిన్ని ప్రతిపాదనలు చేసినట్టు తెలిపారు. గ్లోబల్‌ టెక్‌ దిగ్గజం గూగుల్‌ సేవలను గుర్తిస్తూ ఒక ముఖ్య రహదారిని గూగుల్‌ స్ట్రీట్‌ అని ప్రకటించేందుకు సర్కారు ప్రణాళిక రూపొందించింది.
మైక్రోసాప్ట్‌ రోడ్‌, విప్రో జంక్షన్‌ పేర్లను పరిశీలిస్తున్నది. ప్రపంచ వ్యాప్తంగా ప్రభావిత వ్యక్తులు, ప్రముఖ కంపెనీల పేర్లను రహదారులకు పెట్టడం ద్వారా వారికి సముచిత గౌరవం ఇవ్వటంతోపాటు హైదరాబాద్‌కు అంతర్జాతీయ గుర్తింపు వస్తుందని సీఎం భావిస్తున్నారు. ఆ రోడ్‌పై ప్రయాణించే వారికి కూడా స్ఫూర్తిమంతంగా ఉంటుందనే ఉద్దేశంతో ఆయన ఈ సందర్భంగా ప్రతిపాదన చేశారు.