సైబర్‌ నేరస్తులకు సహకరిస్తున్న ఇద్దరి అరెస్ట్‌

ముంబయిలో పట్టుకున్న సైబర్‌ క్రైమ్‌ పోలీసులు

నవతెలంగాణ-సిటీబ్యూరో
ట్రేడింగ్‌ పేరుతో మోసం చేస్తున్న సైబర్‌ నేరస్థులకు సహకరిస్తూ తప్పించుకుని తిరుగుతున్న ఇద్దరు నిందితులను హైదరాబాద్‌ సైబర్‌ క్రైమ్‌ పోలీసులు మహారాష్ట్రలోని నవీ ముంబయిలో అరెస్టు చేశారు. కొద్ది నెలల కిందట ట్రేడింగ్‌ పేరుతో సైబర్‌ నేరస్థులతో కలిసి అందినకాడికి దండుకున్నారు. నిందితులపై సైబర్‌ క్రైమ్‌పోలీస్‌ స్టేషన్‌లో కేసు నమోదైంది. అప్పటి నుంచి తప్పించుకుని తిరుగుతున్న ఇద్దరిపై దేశవ్యాప్తంగా మొత్తం 12 కేసులు నమోదైనట్టు పోలీసులు గుర్తించారు. అందుకు సంబంధించి శనివారం సీసీఎస్‌ పోలీసులు వివరాలు వెల్లడించారు. నవీ ముంబయిలోని వాషి ప్రాంతానికి చెందిన రవి కుమార్‌లాల్‌ రియల్‌ ఎస్టేట్‌ వ్యాపారం చేస్తుంటాడు. ఏపీకే ఫైల్‌ ద్వారా పూణేకు చెందిన విరాజ్‌ (ప్రస్తుతం పరారీలో ఉన్నాడు)తో కలిసి బ్యాంక్‌ ఆఫ్‌ బరోడా అకౌంట్‌ను ఆపరేట్‌ చేయడంలో సైబర్‌ నేరస్థులకు సహాయం చేశాడు. మరో నిందితుడు శివేంద్ర అశోక్‌సింగ్‌ ‘మ్యూల్‌ బ్యాంక్‌ అకౌంట్స్‌’ (మోసాలకు ఉపయోగించే అకౌంట్లు) తెరిచి, వాటిని సైబర్‌ నేరస్థులకు సరఫరా చేశాడు.

ఇద్దరు నిందితులు సైబర్‌ నేరస్థులతో చేతులు కలిసి నగరానికి చెందిన 53 ఏండ్ల వృద్ధున్ని టార్గెట్‌ చేశారు. స్టాక్‌ మార్కెట్‌లో పెట్టుబడులు పెట్టాలని, వాట్సప్‌ ద్వారా పరిచయం చేసుకున్నారు. ఈ ఏడాది ఆగస్టు 13 నుంచి 28 వరకు ట్రేడింగ్‌ పేరుతో రూ.12,30,000 డిపాజిట్‌ చేయించుకున్నారు. వారిపై అనుమానం వచ్చిన వృద్ధుడు తాను పెట్టిన డబ్బులను తిరిగివ్వాలని డిమాండ్‌ చేయడంతో, మరికొంత డబ్బులు పెట్టుబడిగా పెడితే తిరిగి డబ్బులు ఇస్తామని, లేకపోతే పెట్టిన డబ్బులను కోల్పోతారని బెదిరించారు. మోసపోయినట్టు గుర్తించిన బాధితుడు సీసీఎస్‌లో ఫిర్యాదు చేశాడు. అన్ని కోణాల్లో విచారించిన ఇన్‌స్పెక్టర్‌ పి.ప్రమోద్‌ కుమార్‌ నేతృత్వంలోని బృందం, ఎస్‌ఐ షేక్‌ అజీజ్‌, ఇతర సిబ్బంది.. దర్యాప్తు ప్రారంభించారు. సైబర్‌ నేరస్థులకు సహకరిస్తున్న నిందితులను అరెస్టు చేశారు. సైబర్‌ క్రైమ్‌, ఆర్థిక మోసాలపై ప్రజలు అప్రమత్తంగా ఉండాలని పోలీసులు సూచించారు. తక్కువ సమయంలో భారీ రాబడి, మల్టీ-బ్యాగర్‌ స్టాక్‌ సూచనలు, ఐపీఓలు, మ్యూచువల్‌ ఫండ్స్‌లో పెట్టుబడులు వంటి ఆన్‌లైన్‌ స్టాక్‌ ట్రేడింగ్‌ ఆఫర్ల పట్ల అతి జాగ్రత్త వహించాలన్నారు.