దిష్టి

దిష్టి తగిలిందనే మాట ఇండ్లల్లో అమ్మమ్మలు, తాతమ్మలు అంటుంటే వినే వుంటాము. ఈ మధ్యకాలంలో ఆ మాట వినపడక చాలా యేండ్లే దాటింది. కానీ ఇప్పుడు మళ్లీ మొదలయిందనే అనిపిస్తున్నది. ఈ దిష్టి తగిలిందని ఉప్పు చేతుల్లో పట్టుకుని చిన్నపిల్లల ముఖంపై తిప్పి పొయ్యిలో వేసేది అమ్మమ్మ. అది చిటపటమని మండేది. అప్పుడుగానీ ఏడ్చే పిల్లోడు చిన్న చిన్నగా మామూలు స్థితిలోకి వచ్చేస్తాడని ఆమెకు ప్రగాఢ నమ్మకం. ఈ దిష్టి తీయడంతోనే ఆగిపోయేది కాదు. కడుపులోకి ఏదో ఒక మందు కూడా తాగించేది. అన్నిరకాల చికిత్సలు చేసాక, దిష్టి తీయటముతోనే ఏడుపు మానాడని అనుకునేవాళ్లు. ఈ దిష్టి మనుషులకే కాదు, భవనాలకు, మోటారు వాహనాలకు, పంటలకు, పచ్చదనాలకు అన్నింటికీ ఉంటుందనే మూఢవిశ్వాసం కొనసాగుతున్నది. దిష్టి అనేది వికృతి.

‘దృష్టి’ అంటే చూపు. నరదృష్టి మరీ భయంకరం! శివుడి మూడోకన్ను తెరిస్తే ఎలా బుడిదవుతారో, అలా మానవుని దృష్టిపడితే అవుతారని భయం జనంలో ఉంది. మంచిగా ఉండటం అరుదైనప్పుడు కలిగే భయాలవి. ఇండ్ల మీద కూడా దిష్టి బొమ్మలు పెడతారు భయంకరమైనవి. ఇంకా కొంత లోపలికిపోతే మంత్రాలు, యంత్రాలూ కడతారు దిష్టిపోవడానికి. అదేపని ఆధారంగా కొందరు బతికేస్తుంటారు. చాలా పెద్ద ఫీల్డే అది. గత పదేండ్ల నుండి ఈ మూఢత్వం మరింత పెరిగింది. యూనివర్సిటీలలో కూడా ఈ యంత్ర, తంత్ర జ్యోతి శాస్త్ర కోర్సును ప్రవేశపెట్టి మరీ బోధిస్తున్నారు మరి! ఏం చేద్దాం! ఆదిమకాలంలోని మానవ సమూహాల నమ్మకాలవి. మధ్యయుగాల నాటి విశ్వాసాలవి. ఏది ఎందుకు జరుగుతున్నదో, కార్యాకారణాలు తెలవనపుడు, ఏదో ఒకటి మన కండ్లకు కనపడని శక్తి వల్ల జరుగుతున్నదని భయ పడి ఆచరించిన ఆచరణలవి. ఆధునిక కాలం విజ్ఞాన యుగం. కారణాలు తెలుసుకుని, పరిష్కారాలను శాస్త్రీయంగా సూచిస్తున్నారు. ఇలాంటికాలంలోనూ మూఢత్వాన్ని పోషించడమంటే, అసలు కారణాలు, పరిష్కారాలు జనానికి తెలియకూడదనే కుట్ర కూడా ఇందులో ఉన్నది. తెలిస్తే నిలదీస్తారు కదా!

అట్లాంటి ఒక మూఢవాక్చాతుర్యాన్ని ప్రదర్శించాడు ఆంధ్రప్రదేశ్‌ ఉప ముఖ్యమంత్రి, సినీ హీరో పవన్‌ కళ్యాణ్‌. ఈ మధ్య ఆయన అంబేద్కర్‌ కోనసీమ జిల్లాలో పర్యటించి, అక్కడ దెబ్బతిన్న కొబ్బరి చెట్లను పరిశీలించారు. అనంతరం నష్టపోయిన కొబ్బరి రైతులతో మాట్లాడుతూ కోస్తాకు తెలంగాణ దిష్టి తగిలిందని, గోదావరి జిల్లాలలో పచ్చదనం వాళ్త కండ్లల్లో పడి దిష్టితో కొమ్మలన్నీ పోయి మొండాలు మిగిలాయని, తెలంగాణ నేతల దిష్టి ఫలితమే ఇదని సెలవిచ్చారు. అంతేకాదు, రాష్ట్రం విడిపోవడానికి ప్రధాన కారణం గోదావరి జిల్లాల పచ్చదనమే అని ఇంకొంత జోడించారు. ఆ తర్వాత వెంటనే ఉప ముఖ్యమంత్రిగా ఆయన చెప్పిన మాటేమిటంటే, మీకు నిధులు ఇవ్వటానికి నేను ముఖ్యమంత్రిని కాదన్నారు. ఆర్థిక అంశాలు నేనుచూడననీ చెప్పారు. అంటే, మీ నష్టాన్ని భరించాల్సింది మీరేనని చేతులెత్తేసారు. ఒక రాజ్యాంగ నియమిత నాయకుడు, ఇంత అశాస్త్రీయంగా మాట్లాడటమేమిటి? అక్కడి రైతుల కష్టాలకు తెలంగాణ కారణమని చెప్పటం, వారి బాధ్యత నుంచి తప్పుకోవటం కాదా! ”వందల పుస్తకాల అధ్యయన శీలి”, ” చెగువేరా ప్రేమికుడు” మాట్లాడాల్సిన మాటలేనా ఇవి! అయినా ఎన్డీయే మతతత్వ అంధ విశ్వాస కూటమిలో నిండా మునిగాక ఇలాగాక ఎలా మాట్లాడగలరులే.

ఇక తెలంగాణ మాజీ మంత్రి జగదీశ్‌రెడ్డి దీనిపై స్పందిస్తూ, ”మాట్లాడేటప్పుడు కాస్త బుర్రకు పనిపెట్టాలి. అసలు మేము చూస్తే కదా దృష్టి పడేది. మేమెందుకు పోతాం అక్కడికి? వాళ్లే మా హైదరాబాద్‌కు వస్తుంటారు. వాళ్ల దిష్టే మా మీద పడింది” అంటూ ఈ దిష్టి తగాదాలోకి దిగారు. ఈయనా దిష్టి ఉందనే వాదనలోనే మునిగాడు. ప్రాంతీయ వైరుధ్యాలలోంచి తమ ఉనికిని ప్రకటించుకోవాలనే ప్రయత్నం వీళ్లది. వారి వారి రాజకీయ ప్రయోజనాలే తప్ప అసలు సమస్యలపై దృష్టే ఉండదు. కోనసీమకు ఇప్పుడే దిష్టి తగిలిందా, ఇన్నేళ్లుగా పచ్చగానే ఉంది కదా! కొబ్బరిచెట్లు మొండాలుగా మిగలటానికి అసలు కారణం వాతావరణంలో వచ్చిన మార్పులు, తుఫానులు, సముద్రపు నీరు తోటల్లోకి రావటం, మానవ తప్పిదాలు. వీటిని ఎలా అధిగమించాలో ఆలోచనలేదు. పరిష్కారం చేద్దామన్న భరోసా లేదు. పక్క రాష్ట్రాన్ని శత్రువుగా చూపేందుకు మూఢ విశ్వాసాన్ని ప్రచారం చెయ్యటం చేతగాని దద్దమ్మల పని మాత్రమే. సమస్యల పరిష్కారానికి దూరదృష్టి, ప్రజలను ఆదుకోవాలనే ఉద్దేశ్యం ఉన్న వాళ్లు ఇలాంటి వివాదాలకు అవకాశం ఇవ్వరు. ఇదేండ్లూ ప్రజల బాధలను, ఇక్కట్లను తొలగించటానికి అధికారం ఇచ్చారనే సోయితో బాధ్యతగా పని చేయాలి తప్ప, ప్రజల మధ్య విభజననూ, అంధ విశ్వాసాన్ని పెంచటానికి కాదు. దిష్టికాదు మీ దృష్టి లోపమే అసలు సమస్య.