నవతెలంగాణ – అశ్వారావుపేట
భవన నిర్మాణ కార్మికుల సంక్షేమానికి వెల్ఫేర్ బోర్డు ద్వారా సేకరించిన నిధులను కార్మికుల సంక్షేమానికే ఖర్చు చేయాలని, రాష్ట్ర వ్యాప్తంగా బకాయి పడ్డ క్లైమ్ లను తక్షణమే పరిష్కరించాలని భవన నిర్మాణ కార్మిక సంఘం సీఐటీయూ రాష్ట్ర ప్రధాన కార్యదర్శి కోటంరాజు డిమాండ్ చేశారు. మంగళవారం భవన నిర్మాణ కార్మిక సంఘం కార్యాలయంలో తాపీ కార్మికుల మండల కమిటీ సమావేశం కణితి సరసా రావు అధ్యక్షతన నిర్వహించారు.
ఈ సందర్భంగా కోటం రాజు మాట్లాడుతూ రాష్ట్ర ప్రభుత్వం సంక్షేమ బోర్డు లో ఉన్న నిధులను సక్రమంగా కార్మికుల సంక్షేమానికి ఉపయోగించకుండా “సొమ్మొకడిది సోకు మరొకరిది” అన్నట్లు రాష్ట్ర ప్రభుత్వం వ్యవహరిస్తూ నిధులను దారి మల్లి స్తుందని అని, కార్మికులు కు అవసరంలేని వాటిపైన వృధా ఖర్చు పెడుతుందని అన్నారు.
లేబర్ కోడ్ ల పేరుతో భవన నిర్మాణ కార్మికుల సంక్షేమ బోర్డును సోషల్ సెక్యూరిటీ కోడ్ లోకి చేర్చి,ఇప్పుడు అందుతున్న సంక్షేమ పథకాలను కూడా కార్మికుల అందకుండా మోడీ సర్కార్ చేస్తుందని అన్నారు.1996 కేంద్ర చట్టంలో ఉన్న అన్ని స్కీములు ను రాష్ట్రంలో అమలు చేయటం లేదని,60 సంవత్సరాలు వయసు పైబడిన వారికి పెన్షన్ కార్మికుల పిల్లల చదువులకు స్కాలర్షిప్ లు గృహవసతి వంటి అనేక సంక్షేమ పథకాలు అమలు చేయడంలో రాష్ట్ర ప్రభుత్వం వైఫల్యం చెందింది అని అన్నారు. ప్రతి ప్రభుత్వ ప్రైవేటు నిర్మాణాల నుండి సెస్ నిధులు వసూలు చేయడంలో వసూలు అయిన నిధులు కార్మికుల్లో సంక్షేమం కోసం ఖర్చు చేయడంలో కార్మిక శాఖ ఘోరంగా విఫలం చెందిందని అన్నారు.
పెండింగ్ లో ఉన్న నష్ట పరిహారాలకు నిధులు వెంటనే విడుదల చేయాలని,ప్రమాద మరణాలకు ఇస్తున్న ఆరు లక్షల రూపాయలు నుండి పది లక్షలకు పెంచాలని సహజ మరణాలకు ఇస్తున్న రూ. లక్ష నుండి రూ.5 లక్షలకు పెంచాలని, 2009 నుండి నమోదు చేసుకున్న కార్మికుల కార్డులు యుద్ధ ప్రాతిపదికన రెన్యువల్ చేయాలని డిమాండ్ చేశారు. ఈ సమావేశంలో సీఐటీయూ జిల్లా అధ్యక్షులు కే.బ్రహ్మచారి, ఉపాధ్యక్షులు పిట్టల అర్జున్, భవన నిర్మాణ కార్మిక సంఘం మండల నాయకులు చెన్నారావు,తిరుమల శెట్టి వెంకన్న బాబు,శ్రీనివాస్, అప్పారావు తదితరులు పాల్గొన్నారు.
